Read Hatam NITRITI 25 Bible Online

NITRITI 25 - Hatam bible

NITRITI 25

¹Lene Abraham wak nitnem mien Ketura.

²Lene Ketura gwam tut nipmot bat nya ibou muhwindagom bak Abraham ba, inyeng rino Zimran kin Yoksan kin Medan kin Midian kin Isybak kin Suah.

³Lene Yoksan yai nipmot bat cin di inyeng Syeba kin Dedan. Yo di intun Dedan him ne mben Asyur kin mben Letus kin mben Leum ri.

⁴Lene Midian nipmot bat nya inyeng rino Efa kin Efer kin Henokh kin Abida kin Eldaa. Yo dini yahagom intun Ketura him.

⁵Mbro nok gino Abraham kes mun di noni nyeng tut hagom bak nipmot Ishak lo,

⁶tirigi nide njap ngwig hon bigyo lene noni njei munkwas mang bibor bak nipmot bat nindigsi nya di nitnem mien nya igwam tut yok. Lene noni cuk nipmot bat nindigsi dini yok yahagom ug ei hanjop nite bei mpia nipriti ei minu ting leu nipmot Ishak niyati.

⁷Abraham de njap ug ei ari bingwam sratus gom ningot muhwindacan ba, muhwi.

⁸Niyati nddong leu api ninnei kimbas ba, noni ug bong bit nidigup bat-nidigai bat nya.

⁹Leu api nipmot cin di Ishak Ismael nya itig ei hak mihyeti Makhpela dideu Mamre nite bei mpia nipriti. Ei hanjop nsi po Efron de pima ba, nicig Zohar ne mben Het pima ri.

¹⁰ Abraham pek mpia dima leu mben Het nipou su ba, nitnem Sara ningut cem jo ei sirima.

¹¹Niabiati Abraham mai leu su lene Allah njei mun di kei bak nipmot Ishak. Noni bong dideu minyei bousi di ninyeng No Di Niyaijo Ngig Niyai Kep Da Nide Minyei Bousi Ri.

¹²Ismael nicig Abraham ba, nipmem Hagar di Sara de awak leu minu Mesir.

¹³Lene Ismael yai nipmot bat nya ibou simnaibrimigcan di inyeng rino Nebayot kin Kedar kin Abdeel kin Mibsam,

¹⁴kin Misyma kin Duma kin Masa,

¹⁵kin Hadad kin Tema kin Yetur kin Nafis kin Kedma.

¹⁶Yo dini inok pung di keret simnaibrimigcan intun him ba, ijem ide minu nya cem bibit leu nok tungwagom-gom ninyenga.

¹⁷Ismael de njap ug ei ari bingwam sratus gom ningot ningai ba, muhwindacan ug api noni mai.

¹⁸Ismael de nintun him yamti di ibram yam nya ibong ei minu Hawila kin Syur nikieti ba, minu ndig dini jo dideu minu Mesir nite bei mpia nipriti kikau ug ei minu Asyur. Ba, yahagom imbres yok bibong minu ting leu yo di intun Abraham him nindigsi nya.

¹⁹Ayat dini yok pai sut Abraham nipmot Ishak.

²⁰Tirigi Ishak de njap ug ei ari bingwam ningot bitai lene noni wak nitnem Ribka pima ba, Ribka nikijam rino Laban lene nicig rino Betuel di mben Aram ba, nitimieisi ei Mesopotamia.

²¹Mpe dima lene Ishak ngat nadi tindei nitnem lewo Ribka pijet leu api TUHAN buhup nide nadi bibindei ba, Ribka nghop.

²²Noni tta buhun tut munggwom nggre ba, tirigi munggwom nggre cin dima isrek bigyo lene idahat kukwei yam ei Ribka ninghopti. Gima rino noni lua sok bipai “Aye! Mun dini yok bon da nok tut nggon i?” Gima rino noni ug ba, hig ser TUHAN ningon kanti tut.

²³ Lene TUHAN buhup “Atta buhun tut pung di intun him ningat can rin ba, mporo agwam tut munggwom nggre di inok pung di keret can di iba nitok biyam intun him. Keret gom misindem dor njiriek keret gom ba, munggwom mighumbou nok awak mem nikinjoi.”

²⁴Tto bou dem tu lene Ribka gwam tut munggwom nggre nipinai hacem.

²⁵Gi hi di mighumbou ningkek ngwoi ba, ningkek dip nta-nta. Gima rino ijem ninyeng Esau.

²⁶Hammi tirigi Ribka gwam tut Esau rino nikinjoi kat nikindig nikien bingkiem bibor. Gima rino ijem ninyeng Yakub. Mpe dima lene Ishak de njap ug ei ari bingwam ningot muhwindagom.

²⁷Tirigi munggwom cin dini indig nut tu lene Esau ngim igkei bibong kep susti noro Yakub nibou nddong ba, tot mpia ei ig bei.

²⁸Lene Ishak ningon ngakei Esau tut mikwau di noni pilei bibam noro Ribka ningon ngakei Yakub.

²⁹Mpe di gom lene Yakub kwen kiju nikwai koi ei yengti leu api Esau tau kwei leu ningimti ba, nggum bibor.

³⁰Lene noni hara Yakub bipai “Ayo! Dimai dinggum ug ri! Ma aket kiju dima poi mien bidiyem i!” (Gima rino ijem ninyeng hi Edom.)

³¹Lene Yakub pai “Yo, gi nok ne ma atri mun di anyeng tut tug hon gi anok munggwom mighumbou bida bibie ug e leu api midiket kiju dima hi tut na.”

³²Lene Esau buhup “Mun di dinyeng tut tug hon gi dinok munggwom mighumbou dima bon ninyeng mem da bi ba, ditri bina hak ug lewo dimai dinggum ug ri.”

³³ Noro Yakub pai binoni “Suar aheng bida tut gima nipou ug e.” Apino Esau heng bak Yakub bibitri mun di ninyeng tut tug hon gi nok munggwom mighumbou bak.

³⁴Leu api Yakub ki roti biket kiju pima hi tut Esau biyem. Tirigi noni yem kiju bingwig bidut minyei leu lene kiju bimbut. Gima rino ningkek ndok tut mun di ninyeng tut tug hon gi nok munggwom mighumbou.