Read Hatam NITRITI 26 Bible Online

NITRITI 26 - Hatam bible

NITRITI 26

¹Mpe dima lene ninggum nindig bibor hwen minu dima hagom bit leu nok ninggum di hwen yok mem nijam Abraham. Gima rino Ishak ug ei Gerar bahara Abimelekh di nok nibou ndig mem mben Filistin leu binhyepo bong ningkiaisi ei nide minu ndig dima.

²Ishak ug ei sirima lewo TUHAN tau kep noni nipou su bipai binoni “Ma aug kikau ug ei minu Mesir au. Noro ma abong ser minu jep dini bit leu nok dicuk nati.

³ Leu mporo midinyohou nani ba, dinjei mun di kei bak nani cem. Mporo midipek minu dini hagom bina kin ade nintun him yamti di bram yam nya. Mun po dipreu ei mem acig Abraham pima mijo ei mem nani cem bu.

⁴Midibindei ba, ade nintun him yamti di bram yam nya imangti dem ham mpia-bbed him. Lene midikes minu dini titut yam biyok ba, hagom minok ide minu ninda rom. Mben dihyeisi dini hagom mporo mijoi sut mem gima dinjei mun di kei bak yoni bit leu nok dinjei mun di kei bak yo di intun nani him.

⁵Midinjei mun di kei bak nani drek dip Abraham di bit dihyet cem kuk no bak Ditde nikos tutti kin nicuk noti nya hagom cem tu.”

⁶Gima rino Ishak hok nide prak meng yati ei Gerar bibong ei sirima.

⁷ Mpe di gom lene timiei minu Filistin nya ihig simber Ishak tut nitnem lene noni ris bipai bipia nikwohop ri. Leu gino noni pai sut Ribka bipia nitnem rin lene kan bigya timiei minu Filistin mitot noni leu nitnem lewo Ribka ne sop di ubbu bibor ri.

⁸Mpe di gom tirigi Ishak bong ei Gerar ninno tu lene nibou ndig Abimelekh ya hak kui kendera mihyeti bicap minu ndig bingat lo, Ishak kin nitnem igyem njita tut yam.

⁹Gima rino noni hig Ishak kwei bihig ser noni “Sop dini ne atnem nijit rin bi e? Nggon rino apai sut noni bipia akwohop i?” Lene Ishak buhup “Dikan bigya ade limwa mitot da leu ditnem.”

¹⁰Lene Abimelekh hig ser noni bu “Anggon ndei nye i? Abon nok gima ba, ditde limwa hi micut tut noni. Lene tug hon nisinati dima abindei ba, nyeni ningon mui drek dip.”

¹¹Lene Abimelekh sok kep nide limwa nya yahagom bingkiem ser bipai “Tungwa tou rino waisi no dini nitnem yoni lene no dima mitug ndei nimai hak ug.”

¹²Gima ngwig lene Ishak yai miai ei minu dima apino nide njita ngan di ndim ngat ningat sratus gom bibikwop nok lewo TUHAN joi sut noni.

¹³Leu api noni tri mun bibipek mitiei nindig bibor bikum eisi bu bikui dip gi noni nyeng bibor.

¹⁴Noro timiei minu Filistin nya ingon kinei sut noni drek dip nide mindhe-ndhe nya nok domba nya kin sapi nya mang bibor bitut nide awak nya cem imang bibor.

¹⁵Gima rino iji kep minyei bousi nya di Ishak nicig Abraham de awak nya itig ei nipou su hagom.

¹⁶Lene Abimelekh pai bak Ishak “Ma aug leu minu dini lewo anyeng jei ba, asindem bibor dor njiriek nye tu.”

¹⁷Gima rino Ishak nya ijo leu sirima biyuug bong ei Gerar nyai mem nijam di jei.

¹⁸Lene noni kinding minyei bousi nya po Abraham tig nipou su lo, timiei minu Filistin nya iji kep hanyen pima niabiati Abraham mai leu su. Lene noni jem minyei bousi dima inyeng hanyen bit leu nok inyeng timiei di nicig jem nipou su.

¹⁹Lene nide awak nya itig minyei bousi nijep bu ei mbang briep Gerar ba, yuum minyei ningei di nindig bibor.

²⁰Noro gembala di timiei Gerar nya iba minyei bousi dima biki Ishak de gembala nya bicuon ser yok bipai “Gini nyende minyei bousi.” Gima rino Ishak jem minyei bousi dima ninyeng “Minyei Bousi Nibiki Yamti”.

²¹Lene nide awak nya itig minyei bousi nijep hi kin bu noro yo dima iba minyei bousi dima cem biki noni bu. Gima rino noni jem ninyeng “Minyei Bousi Niba nitok Biyam”.

²²Lene noni ug leu hanjop dima bitig minyei bousi nijep gom kin bu. Lene yo dima iba minyei bousi dini biki noni drek dip minyei bousi dini bi. Gima rino noni jem ninyeng “Minyei Bousi Nikes Tut”. Lene noni bitri tut “TUHAN bon nibresti ei minu dini mem nye tu. Gima rino nyeni minidigek kep mpia ei sirini bu.”

²³Mpe hi bu lene noni mbut buug ei Bersyeba.

²⁴Himmun gom lene TUHAN tau kep noni bipai bak “Dani ne acig Abraham de Allah rin ba, attin tut Dani au. Midinyohou nani bidinjei mun di kei bak nani cem leu binhyepo ade nintun him yamti di bram yam nya idigek kep mpia bit leu nok gi dipreu ei mem Ditde awak di Abraham nipou su.”

²⁵Lene Ishak dingug tig bijo-jo yam dip nok nimbar hum dok bikuk no bak TUHAN ei mpia dima. Lene noni hok nide prak meng yati ei sirima leu api nide awak nya itig minyei bousi gom kin bu.

²⁶ Mpe hi bu lene Abimelekh kin nitom Ahuzat kin nibou tentara Pikhol yahagom ijo leu Gerar bikwei ngat Ishak.

²⁷Lene Ishak hig ser yok “Jikwei ngat da bu tut nggon i? Lewo nipou ne jiba jingon di dindi bijji da leu jide minu.”

²⁸Lene ibuhup “Jo nibreisi bipia TUHAN nyohou na nok gi kei. Gima rino nikan bipia nna ba nyeni yahagom ipreu mun ei bit yam. Ma apreu ei mem nye bipia,

²⁹ambuk tut nye bu bi bit leu nok gi po nyeni cem nimbuk tut na bi sren pima. Nipou lene niba ningon di kwes kin na bikes na tirigi po ambut leu nyende minu pima. Jo nibreisi mem nye bipia TUHAN nyohou na nok gi kei.”

³⁰Lene Ishak bon pesta mem yok. Lene igyem njita ba, idut ba anggur ngei bit yam.

³¹Njap bigyoti lene ipreu mun ei bit yam bikwam minggwen ser leu api Ishak pigo yok. Lene iba ingon di kwes kin yam bikwas yam.

³²Njap gom ndia lene Ishak de awak nya ikwei pui sut minyei bousi di nijep bu di yoni itig ei su. Ipai binoni “Ningat minyei di biam kwei leu dihyei jou tu.”

³³Lene Ishak jem minyei bousi dima ninyeng “Nikwam Minggwen”. Gima ne nimbie him ngat di ijem minu ndig dima ninyeng Bersyeba.

³⁴Tirigi Esau de njap ug ei ari bingwam ningot bitai lene noni wak sop timiei minu Het nya ibou can. Hi ninyeng Yudit di nicig Beeri lene hi ninyeng Basmat di nicig Elon.

³⁵Noro sop cin dini ibindei ba, Ishak kin Ribka ingon buhun.