Read Hatam NITRITI 27 Bible Online

NITRITI 27 - Hatam bible

NITRITI 27

¹Tirigi Ishak ninghim koi ba, niyai cem mmui su lene noni hig nipmot mighumbou Esau kwei. Lene pai binoni “Dipmot na e?” Lene Esau miap nihyet bipai “We? Da rini.”

²Lene Ishak pai binoni “Dinghim koi su ba, son dideu diyaijo ningwig honti tu.

³Ma ayai ade hampiap kin ade singau tibor ba, angim ser mindhe gom ba, apilei.

⁴Lene ma abam mikwau di ninghap ngge kei nok gi dani dijoi sutti bida leu binhyepo diyem kep dikimam. Tirigi diyem bingwig lene midikes dinda ei na dip bidinjei mun di kei nya hagom bina di munggwom mighumbou nipou tirigi dimai bigyo.”

⁵Lene Ribka ngig nitingou mem mun di Ishak pai bak Esau pima. Gima rino niabiati Esau ug ngim leu su lene,

⁶Ribka ug pai bak Yakub “Nogindi pa dimiap acig nihyet di cuk akindig Esau.

⁷Ba, noni cuk Esau buug huk mikwau bingei kwei binoni. Tirigi acig yem bingwig lene noni minjei mun di kei nya hagom bak Esau nipou tirigi noni mai bigyo.

⁸Gima rino mot de e, suar abit dihyet ba, ayai hagom bit leu dingon kanti hak.

⁹Aug ei mpia di side domba igyati ba, abui kambir pmot di nehen pap ningut can kwei leu binhyepo dibam bak acig biyem kep nikimamti.

¹⁰Leu api angei mikwau binoni leu binhyepo noni njei mun di kei nya hagom bina nipou tirigi noni mai bigyo.”

¹¹Noro Yakub srep bipai “Nok bi! Lewo Esau ningkek dip nta-nta noro dingkek dip dia kei.

¹²Leu ma dicig miprios dingkek dip leu api kan tut bipia diris noni e? Lene noni misigion da drek dip binjei mun di kei hi bida bi.”

¹³Lene nipmem buhup “Attin tut au. Gino noni sigion na lene midibiang nibuhunti. Suar ayai igbit leu dingon kanti hak ug ba, abui kambir nya kwei bida.”

¹⁴Lene Yakub bit nipmem nihyet bibui kambir nya kwei lene nipmem bam igbit Yakub nicig nijoi sutti biyem.

¹⁵Lene Ribka ug yai Esau de sinsun di nibok kak leu nijoti ei ig bei nsi bijuk ei Yakubti.

¹⁶Lene noni ba kambir ninta binggai ser Yakub ninda pang kin nikimam bei kin ninggibi dip di dia kei pima cem.

¹⁷Lene kon mikwau di ninghap ngge kei kin roti di noni kang ei su bikes hagom ei Yakub nindati.

¹⁸Lene Yakub ug ngat nicig bihig noni “Arig e?” Lene nicig miap bipai “We? Dipmot na tou i?”

¹⁹Lene Yakub ris bak nicig bipai “Dani ne Esau apmot mighumbou pima ri. Diyai hagom bit leu nok gi po acuk dati pima tu. Gima rino akiju ba, agwam pijum leu binhyepo ayem mikwau di dingei mem na leu api anjei mun di kei pima hagom bak dani hak ug.”

²⁰Noro Ishak hig ser noni “Angim notou di jei bi akwei tau haninyai sut mikwau dini i?” Lene Yakub buhup “Ade Allah sindem tut da.”

²¹Lene Ishak pai binoni “Akwei ya kui da leu binhyepo diprios angkek dip mbigom ug e. Nani ne Esau jit rin e?”

²²Gima rino Yakub son dideu nicig leu api nicig prios ser ningkek dip bipai “Ahyet ne dem kep Yakub nihyet lo, anda pang nta-nta dem kep Esau ninda pang ri.”

²³Noni kan igbit Yakub bi lewo Yakub ninda pang nta-nta dem kep Esau ninda panga. Tirigi Ishak pi binjei mun di kei pima binoni,

²⁴lene hig ser noni mbigom bu “Nani ne Esau jit rin e?” Lene Yakub ce nihyet bipai “I, da pa ri.”

²⁵Lene Ishak pai binoni “Ason mikwau dima dideu da bidiyem leu api midinjei mun di kei bak nani.” Lene Yakub son mikwau dideu nicig leu lene hug ba anggur ningei cem binoni bidut.

²⁶Lene nicig pai binoni “Mot de ug o, atta tti ndam da ba, amei da mbigom ug e.”

²⁷ Lene Yakub nitta tti ndam nicig bimei leu api nicig tinip Esau de sinsun ninghap lene sindi njei mun di kei bak Yakub bipai “Dipmot ninghap dem kep sus di Allah njei mun di kei eisi.

²⁸Nna ba Allah bindei ba, nggou cut kwei leu mpia-bbed him mem na cem ade miai ngwoisi nya minnum kei cem! Nna ba Noni bindei ba, ade njita ngan di andim ngat ningat nindig bibor lene ade ba anggur ningat bon ningei nindig bibor!

²⁹ Nna ba mben nya hagom ibon yonti nok awak mem na bibit ahyet. Nna ba anyeng tak kep ade bat nya yahagom leu binhyepo yo di intun apmem him yahagom ikuk yok ei amig him. Nna ba yo di isigion na yahagom itug ndei nisigionti hanyen ba, yo di ingon kei sut na lene yoni cem mitug ndei mun di kei bu.”

³⁰Hammi tirigi Ishak njei mun di kei nya hagom bak Yakub leu ba, Yakub sindi hei leu ig bei nsi tu rino nikindig Esau tau kwei leu ninggok mikwausi.

³¹Lene noni cem bam mikwau di ninghap ngge kei bingei bak nicig bipai binoni “Arig e, akiju ba, agwam pijum lene ma ayem mikwau di dingei kwei bina leu binhyepo anjei mun di kei nya hagom bak dani.”

³²Lene nicig hig ser noni “Na tou i?” Lene Esau buhup “Dani ne apmot mighumbou Esau pima ri.”

³³Lene Ishak ninghuisi mpig sut nindig bibor bihig ser noni “Tou ribui mikwau bibam kwei bida aponi pini i? Diyem nide mikwau hammi tirigi atausi dini bidinjei mun di kei nya hagom bak noni bihigom tu lene bit bon ditug gima hanyen kwei leu noni kan bi.”

³⁴Tirigi Esau miap nicig nipaisi nok rino ba ningon di ngguk bibor bicot tut lene hara nicig bipai “Arig e, suar anjei mun di kei hi bidani cem!”

³⁵Lene Ishak buhup “Akinjoi kwei ris bida biyai mun di kei di dipreu kep na tut hagom leu na tu.”

³⁶ Lene Esau simbot dat “Noni ris bida mbican tu. Gima rino ninyeng Yakub dima ne igbit ri. Nipou lene noni ya luei dohoti nok munggwom mighumbou leu api nogindi pa noni pos mun di kei nya hagom bingwig leu da tu. Arig e, abet mun di kei niken hi mem da bi e?”

³⁷Lene Ishak buhup “Dita noni bininyeng tak kep nani lene dibon nide bat nya yahagom binok awak mem noni ba, dinjei njita ngan kin ba anggur nikioi hagom binoni tu. Dipmot ndia ug o, niken hi jo mem na bu bi.”

³⁸ Noro Esau bidip huk nicig didiyam bipai “Arig e! Mun di kei ninyeng gom ngat jo mem da bi e? Arig e! Suar anjei mun di kei hi bidani cem! Lene noni pim kui jei sut biniyai nggwei kibor.”

³⁹ Lene nicig pai bak “Nggou micut kwei leu mpia-bbed him ba, njita ngan ngat ningat nindig bibor mem nani bi sren.

⁴⁰ Mporo ayaijo tug hon ade simeda lene dibindei ba, hon kep ammani kui anok awak mem akinjoi. Noro mpe di gom bu tirigi aham ambuk kep noni[17] lene mporo angwes ngun leu api Yakub ninyeng mitak kep na bu bi.”

⁴¹Gima rino Esau ningon dindi bibor tut Yakub drek dip gi nicig njei mun di kei nya hagom bak noni leu su. Apino noni kan-kan nyen “Son dideu sicig niyaijo ningwig honti tu ba, mpe dino nijam mem singon ngguk bram noni ngwig leu su lene misiyai nimai bak Yakub.”

⁴²Mpe dino Ribka miap tut Esau ningon kanti dima rino noni jem Yakub kwei bipingok ningonti bipai “Amiap e, akindig kos tut bipia mibirop hanyen bina biyai nimai bina yo.

⁴³Gima rino ma ace tut ba, abit dingon kanti gom dini. Akiju ba, anang ndam dikijam Laban ei minu Haran ug.

⁴⁴Lene abong bit noni bibou akindig ningon di kui mem gima yai nimai bina cut leu ug e.

⁴⁵Tirigi ningon prion ser mun di abon binoni pini tu lene mporo midicuk tungwagom ug ei minu Haran leu binhyepo buwak na hanyen kwei bida. Lewo dikou sut gima dipmot bat cin yahacem mimai bingwig leu da mem njap gom ngat a.”

⁴⁶Lene Ribka lua sok bak Ishak bipai “Dingon kou sut ningat Esau nitnem bat sop ngkiai dima yok ba, dikou ser yok tu. Gino Yakub cem ug wak sop timiei minu Het gom lene nna ba dimai hak ug!”