Read Hatam NITRITI 28 Bible Online

NITRITI 28 - Hatam bible

NITRITI 28

¹Gima rino Ishak hig Yakub kwei bikwei ngat noni lene ba ningon di kei bipigo noni tug hon Allah ninyenga. Lene sok kep noni bipai “Ma awak sop minu Kanaan jit au!

²Noro ma akiju ba, aug ei agnyon Betuel de minu Mesopotamia hak ug ba, abuwak apmum Laban nipmisop hi nok atnem.

³Nna ba Allah Di Sindem Bibor njei mun di kei bak nani tirigi awak atnem leu api bindei ba, amunggwom bat nya imang bibor intun nani him leu binhyepo anok pung di mben mang bibor intun him!

⁴ Nna ba Allah njei mun di kei bak nani kin ade nintun him yamti di bram yam nya bit leu nok Noni njei mun di kei bak Abraham! Nna ba anyeng tak kep minu di abong ser dini di Allah pek bak Abraham nipou su!”

⁵Lene Ishak kes Yakub leu api Yakub mbut ug ei Mesopotamia leu binhyepo bong bit Laban di nicig Betuel di timiei minu Aram. Laban ne Ribka nikijam rin ba, noni jem Yakub kin Esau nok ninggwo bat nya ri.

⁶Lene Esau miap tut bipia Ishak njei mun di kei bak Yakub bicuk noni ug ei Mesopotamia leu binhyepo wak sop ei minu dima. Gima cem noni miap tut bipia tirigi nicig njei mun di kei nya hagom bak Yakub tu lene sok kep noni ngkiem ser bipia wak sop timiei minu Kanaan au.

⁷Lene noni miap tut bipia Yakub bit nicig nipmem nya ighyet buug ei Mesopotamia tu.

⁸Lene ningon dorti tut bipia nicig joi sut sop timiei minu Kanaan nya bi.

⁹Gima rino noni ug ngat Ismael di Abraham nipmot bibuwak nipmisop Mahalat di Nebayot nikwohop nok nitnem ndrim.

¹⁰Lene Yakub jo leu Bersyeba buug ei minu Haran.

¹¹Mpia jinjui su lene noni kwei krau gumihyep gom di kwes-kwau. Lene noni ug yai tig gom mem bitau bibong bas.

¹² Lene noni mumpriem bingat lo, lin mbrei gom di itas ei dihyeisi bikui ug ei mpia-bbed him lene malaikati nya iti ba, bihi ijuk kwei lo, bihi ikui hanyen.

¹³ Leu api TUHAN ningat rin simiak noni bipai “Dani ne TUHAN ba, Abraham kin Ishak ide Allah pima ri. Mporo midipek minu di abong eisi dini hagom binani kin ade nintun him yamti di bram yam nya.

¹⁴ Yo di intun nani him midigek kep mpia ba, imangti ningot ndig noyam kin dihyei ndung nimangti. Lene mporo yoni mikieng kep mpia ug ei nite bei mpia nicutti kin nite bei mpia nipriti kin nite bei mpia nijjai kin nite bei mpia nibiho. Ba, mben dihyeisi dini hagom mporo mitug ndei mun di kei tug hon nani kin ade nintun him yamti di bram yam nya cem.[18]

¹⁵Amiap e, midingat rin bit na kikau bidem ambutti nya hagom ba, dinyohou na. Lene mporo midibuwak na hanyen kwei ei atimieisi dini. Midimbres Da leu na bi sren. Midibindei ba, mun di dipreu kep na tut nya hagom mipek kep mem na.”

¹⁶Lene Yakub da niyai bikiju lene pai “TUHAN ningat rin ei gumihyep dini! Noro sindi dikan tut!”

¹⁷Gima rino noni digit tut ba, simbot dat “Gumihyep dini bindei ba, dinga leu nindig bibor! Gini ne Allah de ig ba, dimbou hui di bie ug ei gwamti ri!”

¹⁸Njapti kui bu lene noni kiju mem ha yausi bitas tig di bitau pima pijum nok tig nibiyok ngon kep leu api ampou tut mini zaitun bisiber ei dip bipigig sut ei mem Allah.

¹⁹Lene noni jem gumihyep dima ninyeng Betel. (Ninyeng timiei rino Lus.)

²⁰Lene noni heng bipai “Gino na di TUHAN anyohou da ba, aya ser da kak dimbutti dini ba, ayai njita kin sinsun hi bida,

²¹kikau bidiba dingwes ngun bingkwei hanyen kwei ei dicig de ig bei nsi lene midikuk da biNa di TUHAN Nangkom.

²²Lene midikwas gom leu ningot gom lene gom leu ningot gom bikwop mun nyeng hagom di dinyeng tut nya leu Na di TUHAN hanyen biNa. Tig nibiyok ngon kep dini minok gumihyep mem tungwatu nya ibikuk yok bak TUHAN eisi.”