Read Hatam NITRITI 29 Bible Online

NITRITI 29 - Hatam bible

NITRITI 29

¹Lene Yakub mbut kikau ei minu Kanaan ug ei nite bei mpia nipriti.

²Leu api noni tau kep minyei bousi gom ei ngoi dumti bingat domba nya nimpung ningai di idis yam simiak minyei bousi bimem kep ser tto bou mem yo di ighyen kep yok ibei nibeng leu nuhui bitau minyei mem yok. Nibeng dima ne tig mma nindig bibor ri.

³Mpe dino domba nya yahagom idem yam tu leu api yo di ighyen kep nya ibei tig dima leu nuhui bitau minyei bak mindhe-ndhe yahagom ba, idut bindei yok leu api ibikibou kep ser hanyen.

⁴Lene Yakub hig ser gembala nya di ikwei ya-ya nyen nya “Disut bat jen, jibong ei hantou i?” Lene ibuhup “Nibong ei minu Haran.”

⁵Lene Yakub hig ser yok “Jikan tut Laban di ntun Nahor him e?” Lene ice bipai “I, nikan tut.”

⁶Lene noni hig ser yok bu “Notou mem noni i? Hagom kei e?” Lene ice bipai “I, hagom kei lo, angat i! Nipmisop Rahel rino sindi jem Laban de domba nya di tau sut mo kwei.”

⁷Lene Yakub hig ser yok bu “Nogindini mpia njap yo ba, jam dem mem jijem domba nya hanyen ug ei sar nsi bigyo. Nggon rino jitau minyei ba, idut bindei yok leu api jijem yok hanyen kep abris meng bi i?”

⁸Noro isrep bipai “E bi! Bit bon nitau minyei bi bibou domba yahagom idem yam leu api nibei tig leu minyei bousi nuhui leu api nitau minyei biyok bidut noyam.”

⁹Tirigi Yakub kes nihyet bigyo lene Rahel tau kep yok bijem domba nya kwei.

¹⁰Tirigi Yakub ngat igbit nipmum Laban nipmisop Rahel di tau sut Laban de domba nya nok lene noni bipbur ba, ug ei minyei bousi bikau nibeng leu lene tau minyei bak nide domba nya bidut.

¹¹Lene noni mei Rahel ningyoi bipim lewo ningon nggan-triot kei.

¹²Leu api pai binoni “Acig ninggwo ridani ba, dipmem Ribka nikijam rino acigya.” Gima rino Rahel bisau bingkwei hanyen lene tri tut hagom bak nicigya.

¹³Tirigi Laban miap nipmisop nihyet tut ninggwo Yakub nikweisi nok lene noni dor buug ngat noni leu api yahacem inggriou yam bimei yam ngyoi. Lene Laban buwak Yakub hanyen kwei ei ig bei nsi. Tirigi Yakub pui sut mun di pek kep mem noni hagom bak,

¹⁴lene Laban pai “Jit-jit! Jo nibreisi bipia sani ne sa di pung gom ri.” Leu api Yakub bong bit ei ninsi bed gom.

¹⁵Mpe di gom bu lene Laban pai bak Yakub “Mbro nok gino dinggwo rinani lo, ma ayai midyai mikuisi mem da au. Diba mindei bibirop amuhup hanyen bina i?”

¹⁶Mpe dima lene Laban bon nipmisop bat nya ibou can. Misop mighumbou ninyeng Lea lene nipumiap ninyeng Rahel.

¹⁷Lea niyai nggrop mbris lene Rahel ninghuisi kwes ba, niimaisi ubbu ngat.

¹⁸Yakub ningon ngakei Rahel. Gima rino noni buhup Laban nihyet “Gino ando Rahel bida lene midiyai midyai mem na kikau ei ninsi ari bingwam muhwindacan.”

¹⁹Lene Laban ce bipai “Dijoi sut gima abuwak noni nok atnem leu gima ngkiai gom kwei buwak noni a. Gima rino suar abong bit da leu binhyepo ayai midyai bit da.”

²⁰Lene Yakub yai midyai bit Laban mem ninsi ari bingwam muhwindacan leu binhyepo wak Rahel nok nitnem. Mem noni lene nijam dima dem kep njap poi he lewo ningon ngakei Rahel nindig bibor.

²¹Nijam dima ngwig leu su lene Yakub pai bak Laban “Tto bou dem tu ba, ace tut da bidiwak apmisop nok ditnem.”

²²Gima rino Laban bon pesta nindig bibor kep gi iwak yamti binduk timiei minu ndig dima yahagom kwei.

²³Himmun di iwak yam dima lene Laban tak kep Rahel lene buwak Lea bak Yakub ba, Yakub kin Lea igyem njita tut yam. (

²⁴Mpe dima lene Laban kes nide awak sop Zilpa bak Lea binok nide awak bu.)

²⁵Njap bigyoti bu rino Yakub da niyai bingat lo, yem njita tut Lea. Gima rino noni ug nggok Laban bihig ser noni “Nggon rino abon ndei da no nti dini i? Diyai midyai mem na leu binhyepo diwak Rahel nok ditnem bi e? Aris bida nok tut nggon i?”

²⁶Lene Laban buhup “Dem mem gima nye di timiei minu dini nitri nipmisop mien bak nijjep njiriek nikindig bi.

²⁷Nok bibou abet angon mem ari gom bu bibou pesta di nibon kep jiwak yamti ngwig leu api midibuwak Rahel cem bina binok atnem mien lo, suar ayai midyai mem da kikau mem ninsi ari bingwam muhwindacan bu.”

²⁸Lene Yakub ce nihyet. Tirigi pesta gi iwak yamti dima ngwig leu su lene Laban buwak nipmisop Rahel bak Yakub binok nitnem mien. (

²⁹Mpe dima lene noni kes nide awak sop Bilha bak Rahel binok nide awak bu.)

³⁰Lene Yakub yem njita tut Rahel cem ba, ningon ngakei noni nindig bibor dor njiriek Lea. Leu api noni yai midyai mem Laban kikau mem ninsi ari bingwam muhwindacan bu.

³¹Tirigi TUHAN ngat lo, Yakub ningon ngakei Lea noyam kin Rahel bi lene Noni bindei ba, Lea yai nimunggwom noro Rahel pijet.

³²Gima rino Lea tta buhun bigwam tut nipmot lene kan “TUHAN ngat igbit singon di buhun tu apino hon kep ammani kui sijjep miningon ngakei sa.” Gima rino jem nipmot ninyeng Ruben.

³³Jei bi lene noni tta buhun hanyen bu bigwam tut nipmot hi kin bu. Lene noni kan “TUHAN yai sipmot dini bisa lewo kan tut bipia sijjep ningon ngakei sa bi. Gima rino noni jem nipmot ninyeng Simeon.”

³⁴Jei bi lene noni tta buhun hanyen bu bigwam tut nipmot hi kin bu. Lene kan “Nogindini sijjep miningon ce sa bi lewo siyai sipmot bat nya ibou ningai binoni tu.” Gima rino noni jem nipmot ninyeng Lewi.

³⁵Jei bi lene noni tta buhun hanyen bu bigwam tut nipmot hi kin bu. Lene kan “Mpe dini misinggei sut TUHAN.” Gima rino noni jem nipmot ninyeng Yehuda. Leu api noni yai munggwom bi ei nituti poi.