Read Hatam NITRITI 3 Bible Online

NITRITI 3 - Hatam bible

NITRITI 3

¹ Wou ne mindhe di ningon ki tut gi ris mun dor njiriek leu mindhe-ndhe nindigsi di TUHAN Allah pai tes nya hagom. Leu api wou hig singgre ser no di sop bipai “Mpaba Allah cuon ser je bipia harin dima jipuk biei ngat hagom ei miaisi dini ba, jiyem a. Noni pai nok e?”

²Lene no di sop buhup “E bi. Biei ngat ei miaisi dini hagom lene nipuk biniyem hak ug.

³Noro tut biei ngat di ntun him biei di ya ei miaisi dini ninggimau lene Allah cuon ser nye bipia ningget ba, niyem au. Lewo minimai drek dip.”

⁴Lene wou srep bipai “Gima igbit bi! Mijimai drek dip hak bi.

⁵Allah pai gima bije nok lewo Noni kan tut bipia tirigi jiyem biei ngat dima lene mijingon dor niti tut gi kei nya kin gi kinei nya[5] dem kep nok Nonti ningon dor nititi.”

⁶Lene no di sop dima ngat lo, biei dima kei lene ningat kei mem gima yem lewo kan bipia gi kei bibor mem noni yai ningon di ki. Gima rino noni puk ningat hi biyem leu api kwas hi tut nijjep cem biyem.

⁷Hammi tirigi igyem biei ngat dima rino ingon dor niti tut gi kei nya kin gi kinei nya bikan tut lo, ingat ngu. Apino indung biei ara nimeng binap kin yam nok sinsun bibinggai kep ide ningat nguti.

⁸Mmunti lene imiap TUHAN Allah di ya-ya nyen ei miaisi dima apino yahacem iku yok nyahan nding biei bou leu binhyepo Noni ngat yok bi.

⁹Lene TUHAN Allah jem no di pinai bipai “Na ritou ug e?”

¹⁰Leu api no di pinai buhup “Dimiap gi angat rin ei miaisi apino didigit tut bidiku da nyahan lewo dingat ngu.”

¹¹Lene Allah hig ser noni “Tou ripai bina bipia angat ngu i? Ayem biei ngat po dicuon ser na leu pima tu e?”

¹²Lene no di pinai ce bipai “I, no di sop po apai tes biya kui da pima puk biei ngat dima lene yai bida bidiyem tu.”

¹³ Lene TUHAN Allah hig ser no di sop “Nggon rino ayai nok gima i?” Leu api no di sop buhup “Wou ris da ba, diyem biei ngat dima.”

¹⁴Gima ngwig leu api TUHAN Allah pai bak wou dima “Midikes hukum ei na dip drek dip ade niyai munti dini. Dimbriom nangkom leu mindhe-ndhe nindigsi nya hagom apino hon kep ammani kui aba anghop bisrei ei dihyei ninjek dip ba, suar ayem dihyei ndung kikau ug bipek ayaijo ningwig honti kep.

¹⁵ Midibindei ba, na di wou kin no di sop jiba nitok biyam apino yo di intun nani him kin yo di intun no di sop him miba nitok biyam bu kikau. Nipmot mporo mitam abou ngwak lene mporo nani ma aham imig kien.”

¹⁶Lene Noni pai bak no di sop “Tirigi atta buhun lene midibindei ba, anghuisi wei nindig bibor. Tirigi agwam tut amunggwom bat nya lene midibindei ba, anghim dut nindig bibor. Mbro nok gima lo, bit bon aom angut kanti leu ajjep kan bi noro aba abou coi mem noni nihyet hak.”

¹⁷ Lene Noni pai bak no di pinai “Amiap kep atnem nihyet pima ba, ayem biei ngat di dicuon ser na tut tu. Gima rino midimbriom dihyei apino suar nani ayai midyai sindem kikau ba, ug bipek ayaijo ningwig honti leu binhyepo dihyei yai ningat di dem mem nani.

¹⁸Bohou kin ndia nggwen di tigot-tigau mehei bidem dihyei ninjek dip lene ndiyok kioi sisron di hei-hei wai minok jide njita.

¹⁹Suar acom amuhup nindig bibor tirigi ayai miai ba, ahanggwap mbilen kikau bibou abingkwei hanyen ug ei dihyeiti lewo dibon nani leu dihyei dima. Dibon nani leu dihyei ba, mporo angkwei hanyen ug ei dihyeiti.”

²⁰Lene Adam jem nitnem ninyeng “Hawa” lewo noni ne tungwatu dihyeisi dini hagom ipmem ri.

²¹Lene TUHAN Allah nap mindhe-ndhe ningkek nok sinsun bak Adam nitnem nya leu api juk ei yokti.

²² Lene TUHAN Allah pai “Nogindini tungwatu dem kep nok nyeni lewo ningon dor niti tut gi kei nya kin gi kinei nya tu. Gima rino suar nicuon ser noni leu binhyepo noni kwei puk biei ngat di bindei niyaijo kikau biyem au. Leu gi mporo yem ningat lene niyaijo ninno.”

²³Gima rino TUHAN Allah jji yok leu miai Eden bipai “Jug yai miai ei dihyei po jikwei leu pima.”

²⁴Niabiati Noni jji yok leu su lene Noni kes mun di Noni pai tes di ninyeng kerub nya[6] ba, igya ser dimbou hui ei nite bei mpia nipriti ei miaisi dima lene bibon simeda di ninjeng srei di tot-tot nyen ei nite bei nibiho kin nijjai kin nite anda com kin nite anda prak ba, ggai ser puig di bie ndam biei di bindei niyaijo ninno.