Read Hatam NITRITI 30 Bible Online

NITRITI 30 - Hatam bible

NITRITI 30

¹Noro Rahel pijet ba, gwam tut nimunggwom hi bak Yakub bigyo. Gima rino wok nikindig ba, nso tut bak Yakub bipai “Abindei ba, digwam tut dimunggwom! Gi bi lene dimai ug ri!”

²Lene Yakub ningon sibui sut noni bibuhup “Bit bon diya luei Allah nohoti kan bi. Noni rino bindei dino apijet a.”

³Gima rino Rahel pai binoni “Angat ditde awak Bilha rima. Ma ayem njita tut noni leu binhyepo noni migwam tut nimunggwom hi bida apino dibon dimunggwom bat nya tug hon noni.”

⁴Lene noni kes nide awak Bilha bak nijjep lene igyem njita tut yam.

⁵Lene Bilha tta buhun bigwam tut nipmot hi.

⁶Gima rino Rahel kan “Allah ya hacan mem sa bibuhup side nadi tu ba, yai sipmot bisa tu.” Gima rino noni jem nipmot ninyeng Dan.

⁷Jei bi lene Bilha tta buhun hanyen bu bigwam tut nipmot hi kin bu.

⁸Lene Rahel kan “Sibrim singkek nindig bibor apino soom kep sikindig tu.” Gima rino noni jem nipmot ninyeng Naftali.

⁹Tirigi Lea kan tut bipia yai munggwom bi ei nituti poi su lene noni kes nide awak sop Zilpa bak Yakub binok nitnem ndrim bu.

¹⁰Leu api Zilpa cem tta buhun bigwam tut nipmot.

¹¹Lene Lea kan “Mun di kei pek kep mem da.” Gima rino noni jem nipmot ninyeng Gad.

¹²Jei bi lene Zilpa tta buhun hanyen bigwam tut nipmot hi kin bu.

¹³Lene Lea kan “Singon llei nindig bibor apino sop nya mitri tut singon di llei bibor.” Gima rino noni jem nipmot ninyeng Asyer.

¹⁴Mpe hi bu tirigi bed dem mem ike gandum ngan lene Ruben mbut susti bingat mun di nok mpam ndum bindung hi kwei bak nipmem Lea. Lene Rahel hara Lea bipai “Akwas mpam ndum di apmot ndung kwei bina dima ndrim hi tut da.”

¹⁵Lene Lea buhup “Gi po ayai dijjep leu da pima dem mem na bi e? Nogindini ma ayai mpam ndum di dipmot ndung kwei bida cem bu e?” Lene Rahel pai binoni “Gino akwas mpam ndum di apmot ndung kwei bina gom-gom tut da lene midisindui sut gima Yakub hwou biyem njita tut na mem mmun di ariman.”

¹⁶Tirigi Yakub kwei hanyen leu dumti mem mmunti lene Lea ug um noni bipai bak “Ma siyem njita tut yam mem mmun di ariman lewo diba mpam ndum di dipmot ndung kwei bida bingot kep Rahel tu.” Gima rino igyem njita tut yam mem mmun dima.

¹⁷Lene Allah buhup Lea de nadi apino noni tta buhun bu bigwam tut nipmot gi nimuhwi.

¹⁸Lene noni kan “Allah yai simuhup bisa lewo sindo side awak Zilpa bak sijjep tu. Gima rino noni jem nipmot ninyeng Isakhar.”

¹⁹Jei bi lene noni tta buhun hanyen bu bigwam tut nipmot gi nimuhwindagom.

²⁰Lene noni kan “Allah njei mun di kei-kau bak sani. Nogindini misibon sinyeng ei sijjep niyai him lewo siyai sipmot bat ibou muhwindagom binoni tu.” Gima rino noni jem nipmot ninyeng Zebulon.

²¹Mpe hi bu lene noni tta buhun hanyen bu bigwam tut nipmisop bijem ninyeng Dina.

²²Lene Allah ningon prion ser Rahel bi. Gima rino Noni buhup nide nadi bibindei ba, noni nghop.

²³Lene Rahel tta buhun bigwam tut nipmot lene kan “Allah ciu ser mun di bindei nim kep sa bingwig leu sa tu.

²⁴Nna ba TUHAN bindei ba, sitta buhun bisigwam tut sipmot gom kin bu.” Gima rino noni jem nipmot ninyeng Yusuf.

²⁵Niabiati Rahel gwam tut Yusuf tu lene Yakub pai bak Laban “Ma akes da bidingkwei hanyen ug ei ditimieisi.

²⁶Ma akes ditnem bat kin dimunggwom bat nya di diyai leu na tug hon midyai di diyai mem na leu binhyepo dingkwei hanyen. Lewo jo nibreisi mem na bipia diba dijoi biyai midyai mem na ninno tu.”

²⁷Lene Laban buhup “Dipai bina bipia diko bidinggok tut ba, TUHAN njei mun di kei bak dani tug hon nani.

²⁸Apai angon kanti brei bida leu api midikum ei amuhupti hak ug.”

²⁹Lene Yakub pai “Na di Andigpoi akan tut bipia diba dijoi bibor biyai midyai mem na apino ade mindhe-ndhe nya ibep bisider-wap cem tu.

³⁰Nipou tirigi dikwei ngat na bigyo lene na di Andigpoi anyeng tut mun nyeng gom-gom he noro tini bu lene anyeng bibor. TUHAN njei mun di kei bak nani tug hon da tu.[19] Gima rino njap dem mem gima diyai kep ditde midyai bidinyohou danti ditde ig bei nsi nya.”

³¹Lene Laban hig ser noni “suar diyai mindei bina i?” Lene Yakub buhup “Amom e, ayai mun bida au. Midinyohou na di Andigpoi ade mindhe-ndhe nya kikau gino ace tut dingon kanti gom dini.

³²Ma asindui sut da bidiyok diyai kep ade mindhe-ndhe nya hagom leu binhyepo diyai domba pmot di ninta nimmun nya[20] kin kambir nehen pap di ninta llikti nya hagom ei mem da binok dimuhup ri.

³³Ei nidipti bu lene krop kei mem na di Andigpoi akan tut bipia diba dingon sren biyai midyai. Gino na di Andigpoi akwei ngig ayai kep ditde mindhe-ndhe nya ba, angat lo, kambir di ninta llikti bi kin domba di ninta nimmun bi srigsi lene na di Andigpoi akan tut bipia dimbrai gi hi dima leu nani tu.”

³⁴Lene Laban ce bipai “Igbit ri! Ma siyai hagom bit leu angon kanti hak ug.”

³⁵Noro njap gom ndia lene Laban dimig nide kambir nikre di nillikti nya kin kambir niwek di nillikti kin niwek di ba nimmun bikos kin domba di ninta nimmun hagom keyam bikes hagom ei nipmot bat nya inda nsi.

³⁶Lene Laban yoni ijem mindhe-ndhe dima yok hagom bimbut tut mem mmun-njap ningai ug ei minu ting bibor. Lo bi lene Yakub gwam binyohou Laban de mindhe-ndhe nindigsi nya.

³⁷Lene noni ug tot biei hawar kin badam kin berangan ninda-nda di ngun kwei birik ningkek leu nirup bibet ningkek gom-gom eisi.

³⁸Leu api noni kes biei rup nillikti dini hammi kambir nya kin domba nya igyati ei minyei bousi. Lewo kambir nya kin domba nya ipri gau yam ei mpe dino ikwei dut minyei bousi.

³⁹Gima rino tirigi kambir nya ipri gau yam hammi biei rup nillikti lene ibep ipmot bat di nillikti nya bu dem kep biei rup nibikos pima.

⁴⁰Lene noni dimig domba nya bijo ter leu binhyepo igya hammi kambir di nillikti nya. Gima rino noni kum ei nide mindhe-ndhe di nillikti nya nindig bibor. Leu api noni jem mindhe-ndhe dima yok hagom bigya ter leu Laban de mindhe-ndhe nya.

⁴¹Tirigi noni ngat Laban de mindhe-ndhe di isindem bibor nya ipri gau yam lene noni dat biei rup nillikti hammi igyai him ei minyei bousi.

⁴²Noro noni kes biei rup nillikti hammi Yakub de mindhe-ndhe di kinei-kinau nya igyai him bi. Jei bi lene Laban de mindhe-ndhe di nillikti bi hagom kinei-kinau. Lene Yakub de mindhe-ndhe di nimmun kin nillikti hagom sindem bibor.

⁴³Gima rino Yakub nyeng bibor binyeng tut mindhe-ndhe nya kin unta nya kin keledai nya kin awak nya imang bibor.