Read Hatam NITRITI 31 Bible Online

NITRITI 31 - Hatam bible

NITRITI 31

¹Lene Yakub miap bipia Laban nipmot bat nya ikkin kep ninghapti bipai “Yakub ris mun di noni nyeng tut nya hagom leu arig tu. Noni nyeng bibor tug hon mun di arig nyeng tut nya.”

²Gima ne Yakub kan tut bipia Laban kin noni ingon kwes kin yam nok gi nipou pima bu bi.

³Lene TUHAN pai binoni “Yakub e, ma angkwei hanyen ug ei atimieisi ba, abong bit ade bat nya hanyen bu leu api midinyohou na.”

⁴Gima rino Yakub sok nihyet bak Rahel kin Lea leu binhyepo ikwei um noni ei susti mem nijam di noni nyohou nide kambir nya kin domba nya.

⁵Lene noni pai biyok “Dingat bou diyai him bipia jicig ningon kwes kin da nok habiei pima bu bi. Noro dicig nide Allah nyohou da tu.

⁶Jahacem jikan tut bipia diba dijoi bibor biyai midyai mem jicigya.

⁷Mbro nok gima lo, noni ris bida biluei ningonti tut dimuhup nimangti mbisimnai su. Noro Allah sindui sut gima jicig mbuk tut da bi.

⁸Tirigi noni tri tut bipia dani dima kambir di ba nimmun bikos lene ibep ipmot bat di ba nimmun bikos nya bu. Tirigi noni tri tut bipia dani dima kambir di nillikti lene ibep ipmot bat di nillikti nya bu.

⁹Gima rino Allah ris jicig de mindhe-ndhe nya leu noni biyai hagom bida tu.

¹⁰Mpe di gom tirigi nijam dem mem gima mindhe-ndhe nya ipri gau yam lene dibong bidimumpriem lene dingat lo, kambir nikre di ipri gau niwek nya yahagom nok niba nimmun bikos nya kin nillikti nya.

¹¹Lene Allah de malaikati mbrap bit da tug hon mun di dimumpriem dima bihig dinyeng ‘Yakub e?’ Lene dibuhup ‘Dingat rini.’

¹²Lene noni binut bu ‘Dani ridibindei dino kambir nikre di niba nimmun bikos nya kin gi nillikti nya ipri gau niwek nya. Dipai bina nok lewo dingat mun di Laban bon tunggwei sut na bou diyai him tu.

¹³ Dani ne Allah po tau kep na ei Betel tirigi po atas tig gom pijum nok tig nibiyok ngon kep leu api attin ampou tut mini zaitun ba, asiber ei dip ba, apreu ei mem Dani ei sirima cem pima ri. Ma atin ei ba, angkwei hanyen ug ei atimieisi.’ ”

¹⁴Lene Rahel kin Lea ibuhup “Mun di nyeni nicig nyeng tut nya niken hi jo mem nyeni ba, niba nyekep bu bi.

¹⁵Lewo noni kan bipia nyeni dem kep ngkiai. Noni tri nye bina bibipek mitiei nindig bibor lo, bimangkrei hagom bingwig su.

¹⁶Mindhe-ndhe nya kin ndigban hagom di Allah ris leu nyeni nicig dima rinok nyende kin nyeni imunggwom bat nya cem ide bu. Nna ba ayai hagom bit leu Allah nicuk nati.”

¹⁷Lene Yakub kon nimunggwom bat nya kin nitnem bat nya bikes yok ei unta nya dip.

¹⁸Noni jem nide mindhe-ndhe nya hagom bikes nide ndigban nindig bibor di nyeng tut ei Mesopotamia hagom ei dip bigya bibie leu api yahagom ingkwei hanyen ug ei minu Kanaan leu binhyepo ug ngat nicig Ishak hanyen.

¹⁹Mpe dima lene Laban ug kos nide domba nya inta leu ba, ningat rin bi. Nijam dima bon nituti kei bibor mem Rahel ba, noni ug yai kwar di Laban ba ningon com[21] nya leu ig bei buug sut.

²⁰Tug hon nisinati dima ne Yakub ris bak Laban ba, ku nimbutti nyahan leu su.

²¹Noni pwoi mun di noni nyeng tut nya hagom lene bipbur bimbut tut. Noni sigon Minyei Efrat bimbut llu kikau ug ei cet him ei hanjop Gilead.

²²Njap ningai bu rino tungwa hi pai bak Laban bipia Yakub nang tu.

²³Gima rino noni hei sut nide limwa nya ba, yuhuk bram Yakub mem njap muhwindacan leu api yuug hatap yok ei cet him ei hanjop Gilead.

²⁴Mmun mau rino Allah tau kep Laban tirigi noni bong bimumpriem lene sok kep noni ngkiem ser bipai “Anyohou yai! Ma aba ahyet biyai Yakub au.”

²⁵Mpe dima lene Yakub hok nide prak meng yati ei nungug tou gom lo, Laban kin nide limwa nya yohok ide prak meng yati ei nungug tou hiter di jo dideu.

²⁶Lene Laban hig ser Yakub “Aris bida leu ba, anang nyahan tut dipmisop bat nya dem kep nok sop di tentara nya ikat tirigi ikon pran tut nggon i?

²⁷Nggon rino aris bida ba, anang nyahan tut yok lo, apai sut brei bida bi i? Gino apo akuk na ba, apigo da leu lene midiba dingon llei bibor bikes je ba, nyeni nipai doia kin nibui ndung-ndung nya kin nimiep porei nya kep je noro bi.

²⁸Apo abon nituti mem gima dinggriou dignyon bat nya kin dipmisop bat nya ba, dimei ingyoi cem bi. Mei! Ayai mun tunggwei sut da nindig bibor!

²⁹Dibon nisindemti mem gima dimbuk tut je noro acig nide Allah tau kep da mem himmun di ammani bisok kep da ngkiem ser bipia ma diba dihyet biyai nani au.

³⁰Dikan tut bipia ambut leu da ba, angon bisau sut gima angkwei hanyen ug ei atimieisi. Noro nggon rino anggimang nyende kwar di nikuk nye bak nya ba, anang tut i?”

³¹Lene Yakub buhup “Dikan bigya Mpaba acuon apmisop bat cin leu da.

³²Noro tut ade kwar nya ne gino angat hi di nggimang mun dima leu na lene no dima mitug ndei nimai hak ug. Nna ba anggek ditde ndigban nya ser ade kwar nya. Side limwa nya migyok igyai kep sa leu api ditug ade mun nyeng hagom di anyeng tut nya hanyen bina.” Yakub buhup nok noro kan tut Rahel po nggimang Laban de kwar nya pima bi.

³³Lene Laban coi ug ei Yakub de prak meng nsi bibie binggok ser leu api Lea de prak meng nsi kin sop di awak cin ide prak meng nsi nya cem lo, ngat nide kwar nya bi. Niabiati bu lene noni coi ug ei Rahel de prak meng nsi.

³⁴Noro Rahel ku kwar nya dima nyahan ei bangdop di noni cug leu unta nya dip bigwam kep. Laban nggok-nggok nyen ei Rahel de prak meng nsi hagom noro ngat mun nyeng hi bi.

³⁵Lene Rahel pai bak nicig “Arig e, ma angon sibui sut da au. Gimbun dikiju kan bi lewo dingkek kan mun.” Laban nggok-nggok nyen ser lo, ngat nide kwar nya hi bi.

³⁶Jei bi lene Yakub ningon sibui sut Laban nindig bibor lene ba nihyet nindig bihig ser noni “Diyai mun di mbuk tunggwei sut na di Andigpoi nok mindei ngan i? Dipigau hanjop notou apino bitig dino ahuk bram da i?

³⁷Anggek ditde ndigban hagom ariwace tu lo, angat ade ndigban di srigsi nok mindei ngan i? Akon kwei ba, akes ei nibreisi leu binhyepo side limwa nya mingat bou igyai him bibou indo igbit no di yai mun tunggwei sut ug e.

³⁸Diyai midyai mem na di Andigpoi kikau mem ari bingwam nitindur ningot can gi pini jug su. Ade domba nya kin kambir nya idigek bibor tu noro dibui kambir nikre hi bidibam bidiyem bigyo.

³⁹Tirigi po mindhe-ndhe di niten-pos nya yaham ade domba nya kin kambir nya lene dittei mindhe mai bidindo bina bi. Noro dikes ditde mindhe di niyaijo biya luei nohoti hanyen. Tirigi po hi mbrai mindhe leu na di Andigpoi mem njap kin mmun cem lene akak tut da bidikes ditde mindhe biya luei nohoti hanyen bu.

⁴⁰Mpia njap wam da nindig bibor ba, hou cem kui dati mem mmun apino bit bon dibong mai kan bi.

⁴¹Nok gima kikau mem ari bingwam nitindur ningot can tirigi po diyai midyai mem na di Andigpoi. Diyai midyai mem ari bingwam simnaibrimigtai leu binhyepo diwak apmisop bat cin lene dihyen kep ade mindhe-ndhe nya mem ari bingwam muhwindagom bu. Noro aluei angonti tut dimuhup mbisimnai su.

⁴²Gino dignyon Abraham kin dicig Ishak ide Allah nyohou da bi lene dikan bipia ma ajji da bidiba dinda ngwak bingkwei hanyen ug ei ditimieisi. Noro Allah ngat igbit mun di buhun tak da bou niyai him ba, Noni kan tut ditde midyai nya. Apino Noni pai igbit nikos tutti mem himmun di ammani.”

⁴³Lene Laban buhup “Sop dini yok ne dipmisop bat nya rin ba, imunggwom bat nya ne dimunggwom bat nya rin ba, mindhe-ndhe dini yok ditde ri. Jit jit, mun di acap ser dima yok hagom ditde nipou su. Noro gimbun ditak kep dipmisop bat cin kin imunggwom bat nya leu na kan bi.

⁴⁴Gima rino nna ba sipreu mun ei bit yam leu api sidingug tig bijo-jo yam dip nok tig nibiyok ngon kep side nipreu mun ei biyamti dini.”

⁴⁵Lene Yakub ug yai tig gom bitas pijum nok tig nibiyok ngon kep.

⁴⁶Lene noni cuk nide limwa nya bipia yuug nggok tig hi kin bu bidingug bijo-jo yam dip. Lene yahagom igyem njita kui tig nikiou dima.

⁴⁷Lene Laban jem tig nibiyok ngon kep dima ninyeng “Yegar-Sahaduta”[22] lo, Yakub jem ninyeng “Galed.”[23]

⁴⁸Lene Laban pai bak Yakub “Tig di jo-jo yam dip dini nok tig nibiyok ngon kep di mibiwin kep singonti.” Gima ripo ijem ninyeng Galed pima.

⁴⁹Lene Laban binut bu “Nna ba TUHAN ngig niyai kep sa mem nijam dino simbres santi leu yam.” Gima rino yoni ijem mpia dima ninyeng “Mizpa.”[24]

⁵⁰Lene Laban binut bu “Gino anghek dipmisop bat cin ba, awak atnem bat hi kin bu lene mbro nok gino dikan tut gima bi lo, Allah rino ngig niyai kep sa bikan tut tu.

⁵¹Tig di sidingug bijo-jo yam dip kin tig di atas pijum nonaha yo ba, jo nijoti.

⁵²Tig dima hacem nok tig nibiyok ngon kep di mibiwin kep singonti leu binhyepo dipigau tig di jo-jo yam dip di bikkin ser sa dini ba, dihwou hwen na bi. Nok gima cem Apigau tig di bikkin ser sa dini kin tig di atas pijum dima ba, akwei hwen da bi.”

⁵³Abraham kin Nahor[25] ide Allah miya hacan nok nikei mem sa. Lene Yakub heng bitug hon nicig Ishak de Allah ninyeng bipai bipia noni miyok ngon kep mun di Laban yoni ipreu kep yam tut dima.

⁵⁴Lene noni bui mindhe ningut gom bindig kep hum bak Allah ei nungug tou dima. Leu api noni nduk nide limwa nya kwei bigyem njita bit yam. Gima ngwig lene ibong ei sirima binjap kep.

⁵⁵Njap di hyep bu lene Laban ngat nadi mem nignyon bat nya kin nipmisop bat cin lene nggriou yok bimei ingyoi mem ha yausi leu lene ngkwei hanyen ug ei nitimieisi.