Read Hatam NITRITI 32 Bible Online

NITRITI 32 - Hatam bible

NITRITI 32

¹Lene Yakub ug ei puig sinon leu api malaikati nya ikwei um noni.

²Tirigi noni ngat yok tu lene simbot dat “Allah hok Nide prak meng ei gumihyep dini.” Gima rino noni jem gumihyep dima ninyeng “Mahanaim.”

³Lene Yakub sok nihyet ei nide limwa nya dip bibie leu noni biyuug ngat nikindig Esau ei minu Edom,

⁴bipai biyok “Suar jipai bak Esau bipia nide awak di Yakub bong bit Laban ninno tu ba, sindi kwei hanyen lo, binyen.

⁵Ba, da di Yakub dinyeng tut sapi nya kin keledai nya kin kambir nya kin domba nya kin awak nya hagom imang bibor bidisok dihyet nok gima hwou ndam noni di nok ditde andigpoi leu binhyepo noni joi sut da.”

⁶Tirigi yuug ngat Esau leu ba, ingkwei hanyen tu lene ipai bak Yakub “Nuug ngat akindig Esau tu ba, noni sindi hei sut nide limwa nya ibou sratus bitai bikwei um na.”

⁷Lene Yakub ttin tut nindig bibor biningon mbut-mbut nyen. Gima rino noni kwas nide bat nya kin nide limwa nya kin nide mindhe-ndhe nya hagom ei nimpung canti.

⁸Lewo noni kan “Gino Esau kwei tau kep nimpung gi nigom biya kep bihwen yok lene mibon nituti mem nimpung gi nican inang bingwes ngun.”

⁹Lene noni ngat nadi bipai “Dignyon Abraham kin dicig Ishak ide Allah e, amiap dihyet! Na di TUHAN acuk da bipia dingkwei hanyen ug ei ditimieisi bidibong bit dide bat nya hanyen bu leu api ma anyohou dimig mun di hagom nok gi kei bibor mem da.

¹⁰Dani ne dem mem gima angondut da ba, angon gom tut da rin bi. Dinok awak mem Nani he. Tirigi po disigon Yordan pima lene dittei ditde tom he. Noro njap di ammani lene dikwei hanyen tut ditde limwa nya nimpung can.

¹¹Ma ateu da bidingwes ngun leu dikindig Esau ninda nsi lewo dittin tut noni. Leu ma noni mikwei ya kep bihwen nahagom bitut sop nya kin munggwom nya cem ug rin e?

¹² Ma ayok ngon kep gi po apreu ei mem da pima bipia mporo ma anyohou dimig hagom nok gi kei mem dani lene ditde nintun him yamti di bram yam nya midigek kep mpia ba, imangti dem iggum di jo muk nipimat di bit bon tungwatu nya ikwop nimangti kan bi.”

¹³Lene noni bong ei mpia dima mem mmun gom leu api njap dihyep bu rino tin ei kwas ndigban nide tut nikindig Esau.

¹⁴Noni dimig kambir niwek ningut sratus can kin nikre ningut ningot can kin domba nya niwek ningut sratus can kin nikre ningut ningot can,

¹⁵kin unta niwek di bep nipmot di idut unta nido ngei ningut ningot ningai kin sapi niwek ningut ningot bitai kin nikre ningut simnai kin keledai niwek ningut ningot can kin nikre ningut simnai ei.

¹⁶Lene noni kwas mindhe-ndhe dima yok ei nimpung nya bikes yok bak nide limwa nya leu api ijem. Lene noni cuk yok “Jibie doho ba, jigom jem nimpung gom biya bibie lene jigom jem nimpung gom biya hacan bibikwop nok lene ma jibon ningwakti ei nimpung nya ikieti.”

¹⁷Lene Yakub cuk nide mindor di mibie bipai “Gino dikindig Esau um na bihig simber na bipai ‘Aceu ritou i? Aug ei hantou i? Tou rininyeng tak kep mindhe-ndhe dini yok i?’

¹⁸Gino noni hig simber na nok lene ma abuhup nihyet nok gini ‘Gini yok hagom Yakub de ba, noni nok awak mem nani bikwas hagom mikuisi tut na hak ug. Lene nonti no ya abia kep nye ma kwei.’ ”

¹⁹Lene Yakub cuk nide awak gi nican kin gi niningai kin nindigsi nya yahagom di ijem nide mindhe-ndhe nya bipai “Tirigi juug um Esau lene suar jipai igbit dicuk jeti pima.

²⁰Suar jipai bak Esau bipia nide awak di Yakub no abia kep je kwei.” Yakub pai nok lewo kan “Siba mun di sikwas dima yok bibakei sikindigti leu binhyepo sibindei ba, ningon nggriu sut sa. Tirigi suum noni lene noni mikos ser mun po sibon tunggwei sut noni pima hak ug e?”

²¹Gima rino noni cuk yok bibie tut mun di noni kwas tut nikindig leu api noni bong mem mmun gom ei nide prak meng nsi.

²²Lene Yakub kiju mem himmun biwin nitnem bat cin kin nitnem sop awak cin kin nipmot bat nya ibou simnaibrimiggom ba, isigon Minyei Yabok biyuug dihip ei nite hi.

²³Yahagom yuug dihip ei nite hi tu lene noni ngkwei hanyen bipinak nide mun di nyeng tut nya hagom bram yok ug ei nite hi.

²⁴ Noro Yakub gwam binongkom ei minyei nite hi. Lene tungwagom tau kwei bikat noni ba, idahat kukwei yam kikau binjap kep.

²⁵Tirigi idahat kukwei yam nok rino no dima kan bipia sindem bi lene noni tug Yakub nintig tuti bipis.

²⁶Lene pai bak Yakub “Akes da ba, duug rin lewo jei bi ne mpia pri ri.” Noro Yakub srep “Ma anjei mun di kei hi bak dani nipou ug e leu api midikes na ba, aug.”

²⁷Lene noni hig ser Yakub “Anyeng tou i?” Lene Yakub buhup “Dinyeng Yakub.”

²⁸ Lene no dima pai “Anyeng rino Yakub bu bi. Adahat kukwei Allah kin tungwatu nya cem ba, abindei timek yok tu. Gima rino suar ijem anyeng Israel bu.”

²⁹ Lene Yakub hig ser noni “Anyeng tou i?” Leu api no dima buhup “Ahig ser dinyeng tut nggon i?” Leu api noni njei mun di kei bak Yakub.

³⁰Lene Yakub simbot dat “Mei! Dingat Allah niimaisi bou diyai him tu lo, diyaisi jo yo!” Gima rino noni jem gumihyep dima ninyeng “Pniel”.

³¹Tirigi mpia pri tu lene Yakub mbut leu sirima lo, priker lewo nintig tuti dut.

³²Gima rino mben Israel ipigig sut mindhe-ndhe ninghui di rap nintig tuti bigyem bi kikau kwei bipek ammani kep. Lewo no dima tug Yakub nintig tuti.