Read Hatam NITRITI 33 Bible Online

NITRITI 33 - Hatam bible

NITRITI 33

¹Lene Yakub ngat Esau di ya tut nide limwa nya ibou sratus bitai tirigi itau ndam noni. Gima rino noni kwas nimunggwom bat nya bikes bihi bak Lea bihi bak Rahel lene bihi bak nitnem ndrim sop di awak cin.

²Leu api noni cuk sop di awak cin tut imunggwom bat nya igya bibie leu api cuk Lea tut nimunggwom bat nya bigya hacan leu api Rahel kin Yusuf igya abia kep yok.

³Lene Yakub nonti ug dor bibie leu yok leu api kuk no biba ningwak bikik dihyei mbimuhwindacan tirigi noni mbut ndam Esau nitausi.

⁴Noro Esau dor kwei buum Yakub leu api nggriou noni bimei ningyoi lene yahacem ipim bigyai nggwei kibor.

⁵Lene Esau kon nibou bingat sop nya kin munggwom nya lene hig ser Yakub “Tou nya rino ibit na dima i?” Api Yakub buhup “Andigpoi e, yo dini yahagom ne dimunggwom bat nya ri. Allah yai yahagom bida lewo ningon nggriu sut da.”

⁶Lene sop di awak cin igya tut imunggwom bat nya ba, ikwei kuk yok ei Esau nimig him.

⁷Lene Lea cem ya tut nimunggwom bat nya ba, ikwei kuk yok ei Esau nimig him bu. Leu api Yusuf kin Rahel igya abia kep nindigsi nya ba, ikwei kuk yok bak.

⁸Lene Esau hig ser Yakub “Angon kanti notou sut nimpung po duum yok ei puig sinon aponi pima i?” Lene Yakub buhup “Diba nimpung dima yok bibiyai angon kwes kin da hanyen.”

⁹Noro Esau buhup “Dikinjoi na e, mun di dinyeng tut nya dem mem da tu. Mun di anyeng tut nya jo bina hak ug.”

¹⁰Noro Yakub srep “E bi! Gino ajoi sut da lene ama mun di diyai binani hak ug. Lewo tirigi dingat aimaisi bou diyai him lene gima dem kep nok dingat Allah niimaisi bou diyai him lewo ajoi sut da.

¹¹Nna ba ama mun di dikwas tut na dima hak ug lewo Allah ningon nggriu sut da binjei mun nyeng mang bibor bak dani tu.” Yakub bibidip huk nyen nok leu api Esau ce tut biyai leu noni.

¹²Mbigom bu lene Esau pai binoni “Sitin ei bisimbut rin. Midibie tut je.”

¹³Noro Yakub buhup “Andigpoi e, nok bi. Akan tut bipia dimunggwom bat nya inghuisi sindem bigyo. Mindhe-ndhe nimien nya sindi idut do ngei ba, bit bon imbut sindem kan bi. Gino dijem yok sindem mem njap nitindur gom lene hagom mimai kak puig sinon.

¹⁴Nna ba abie lene midinyohou abia kep na. Minimbut bidem nisindemti tut mindhe-ndhe nya kin dimunggwom bat nya cem bibou nihwou ngat na di Andigpoi ei minu Edom ug e.”

¹⁵Lene Esau pai “Api midikuk ditde limwa nya ibou poi mem na leu binhyepo inyohou cen jeni.” Noro Yakub buhup “Nok ug e. Angon mbut-mbut nyen tut da au. Gino dibindei ba, ajoi sut da lene dem.”[26]

¹⁶Gima rino Esau nya ingkwei hanyen ug ei minu Edom mem njap gom ndia.

¹⁷Noro Yakub ug ei Sukot bingot ig mem nonti lene hok ig jibei nya mem nide mindhe-ndhe nya cem. Gima rino ijem mpia dima ninyeng Sukot.

¹⁸Gima rino Yakub nya ijo leu Mesopotamia bimbut kikau. Yoni iba ingwes ngun bikwei krau minu ndig Sikhem ei minu Kanaan hanyen bu. Lene yohok ide prak meng yati ei susti di jo dideu minu ndig dima.

¹⁹ Lene noni ba mitiei perak ningat sratus gom bipek dihyei hanjop nsi dima leu yo di intun Hemor him leu binhyepo yohok prak meng yati eisi. Hemor dima ne Sikhem nicig ri.

²⁰Lene noni dingug tig nok nimbar hum dok ei sirima bipiga ei mem El ba, Noni ne mben Israel ide Allah ri.