Read Hatam NITRITI 34 Bible Online

NITRITI 34 - Hatam bible

NITRITI 34

¹Mpe di gom lene Yakub kin Lea ipmisop Dina ug cem kep sop timiei minu Kanaan nya.

²Tirigi Sikhem ngat Dina nuubbuti bou niyai him lene noni kat bicut tut noni. Sikhem nicig ninyeng Hemor ba, Hemor ninyeng tak kep mben Hewi ei minu ndig dima.

³Sikhem ningon pri kep Dina nindig bibor lewo noni sop ubbu ngat. Gima rino Sikhem pai-hi-paisi leu binhyepo bindei ba, Dina joi sut noni.[27]

⁴Gima rino Sikhem pai bak nicig “Arig e, ma abrim angkek kep misop dini nikijam bat nya leu binhyepo ice tut noni nok ditnem.”

⁵Tirigi Yakub miap tut no dima nicut tut nipmisopti nok lene bet ningon mem nipmot bat nya di igya tut ide mindhe-ndhe nya ei susti ikwei hanyenti.

⁶Lene Sikhem nicig Hemor kwei mbrap bit Yakub,

⁷hammi tirigi Yakub nipmot bat nya itau hanyen kwei leu susti. Tirigi imiap tut mun di cut igkep Dina tu lene ingon buhun bibor apino ingon sibui sut Sikhem nindig bibor drek dip mun di noni bon tunggwei sut mben Israel tirigi noni cut tut Yakub nipmisop.

⁸Lene Hemor pai bak Yakub “Dipmot Sikhem ningon ngakei apmisop nindig bibor. Dibidip huk na di Andigpoi bipia ma ace tut dipmot wak noni nok nitnem.

⁹Nnaba sice tut yam bipia ade bat kin ade limwa nya kin dide bat kin ditde limwa nya yahagom iwak yam hak ug.

¹⁰Apino midisindui sut je bijipek hanjop nsi nya ei minu dini bit leu jingon kanti ba, jitri-bijipek mun bit nye cem jinyeng tut jide ndigban srig nyeni nikieti cem.”

¹¹Lene Sikhem nonti brim ningkek kep Dina nicig kin nikijam bat nya bipai “Gino jice tut mun di dibidip huk je tut dini lene midinjei mimbron bije bit leu jingon kanti hak ug.

¹²Jipai jingon kanti tut ndigban di jijoi sut nya kin mimbron di dinjei bak jeni hak ug. Leu api gino jisindui sut ba, diwak misop dima nok ditnem lene midipwoi mun dima hagom kwei bije.”

¹³Lene Yakub nipmot bat nya ibiti ninda biris bak Hemor kin Sikhem drek dip Sikhem di bon mun tunggwei sut ikwohop Dina.

¹⁴Ba, ipai bak yo cin dima “Bit bon nisindui sut nikwohop buug wak nijjep di yai nibon midut sunat bigyo kan bi. Leu gima ne mun di binim kep nye ri.

¹⁵Minice tut jingon kanti dima lo, nindo puig di kei bije nok gini. Suar jibon jenti noyam kin nyeni. Nisinati pia je di pinai nya jahagom jiyai nibon midut sunat.

¹⁶Lene minice tut jingon kanti dima ba, nye di mben Israel kin je di timiei minu Hewi nya iwak yam hak ug. Minipek dihyei hanjop nsi srig jikieti apino nyeni yahagom intun yam him nok keret gom ngat.

¹⁷Ne gino jibit puig di nindo bije ba, jiyai nibon midut sunat bi lene minitug nikwohop hanyen leu je ba, nimbut tut.”

¹⁸Lene Hemor kin Sikhem ikan bigya puig dima ne puig di kei mem yok rin ba,

¹⁹Sikhem bipbur bibit puig di yoni indo binoni lewo ningon ngakei Yakub nipmisop nindig bibor. Gino ibinai Sikhem kin nide bat nya yahagom lene jo nibreisi bipia nongkom niji ngkiem dor njiriek nindigsi nya yahagom.

²⁰Lo bi lene nicig Hemor yoni ingkwei hanyen ug ei hammi dimbou hui di nok gumihep mem timiei nya isimbot kep mun biyam eisi ei minu dima. Lene itri tut ighyet bak timiei nya bipai biyok,

²¹“Yo dima ijoi sut nye nindig bibor. Ma isindui sut yo dima ba, ipek hanjop nsi srig nyeni ikieti bingkwei-ngkwei nyen ei minu dini di bon nibresti mem yoni kin nyeni cem. Nna ba yo dima iwak nyeni ipmisop bat nya hak leu api nyeni itri ipmisop bat nya biyok nok yoni itnem bat nya bu.

²²Noro yoni mipek hanjop nsi srig nyeni ikieti ba, yoni kin nyeni intun yam him nok keret gom ngat cem tug hon puig gom ngat di nok gini. Suar nye di pinai nya ibon nyenti noyam kin yoni ba, igyai nibon midut sunat.

²³Jei bi lene ide mindhe-ndhe nya kin ide ndigban hagom mitug hon nyeni bu. Gima rino jikwei ba, ice tut puig di yoni indo binye leu binhyepo yoni mipek hanjop nsi srig nyeni ikieti.”

²⁴Lene timiei minu ndig dima yahagom ice tut Hemor kin Sikhem ingon kanti dima leu api pinai di timiei dima yahagom igyai nibon midut sunat.

²⁵Lene njap ningai bu tirigi ibokti dut bibor lene Dina nikijam bat cin di Simeon kin Lewi ipwoi ide simeda bicoi nyahan ug ei minu ndig dima bitot pinai nya yahagom sindam bimai bingwig,

²⁶bitut Hemor kin Sikhem cem. Leu lene ibuwak Dina tut ningwes ngun leu Sikhem de ig bei bimbut tut.

²⁷Niabiati yo cin dima ibui yok nok ibui mindhe leu lene Yakub nipmot bat nindigsi nya ikwei kon pran bit minu ndig dima bipos mun di hagom bingwig drek dip ikwohop di yai mun di binim kep noni tu.

²⁸Igyai domba nya kin kambir nya kin sapi nya kin keledai nya hagom kin mun di jo ei minu ndig dima kin susti bei nisai cem hagom.

²⁹Igyai mun di nibok kak hagom bikat sop nya kin munggwom nya yahagom bitut ndigban ei ide ig bei nya cem hagom bimbut tut.

³⁰Lene Yakub nso tut bipai bak Simeon kin Lewi “Jibindei ba, mbigom mun di buhun micut igkep da. Nogindini mben Kanaan kin mben Feris kin timiei minu dini yahagom mingon mpo tut da. Dibon ditde limwa nya imang bi. Gino yo dima ibicom yam nok gom bikon pran bit da lene jei bi nyeni ide keret mimai bingwig hak ug.”

³¹Noro nipmot bat nya ibuhup “Bit bon nisindui sut no dima bimangkrei nikwohop dem kep sop sundal kan bi.”