Read Hatam NITRITI 4 Bible Online

NITRITI 4 - Hatam bible

NITRITI 4

¹Lene Adam nitnem yoni igyem njita tut yam apino jei bi lene nitnem tta buhun. Jei bi lene Hawa gwam tut nipinai leu api pai “Diyai dimunggwom nipinai tug hon nisindemti di TUHAN yai bida.” Leu api jem ninyeng Kain.

²Mpe hi bu lene noni gwam tut nimunggwom nipinai hi kin bu bijem ninyeng Habel. Tirigi yo cin dini imahan tu lene Habel hyen kep domba nya lo, Kain yai kep miai.

³Jei bi lene Kain ug yai njita ei nide miaisi bikwas ndrim hi tut TUHAN.

⁴ Lene Habel jem nide domba nipmot bou leu api bui bidigo bikwas nimmau ndok tut TUHAN. Apino TUHAN joi sut Habel tut nide munkwas.

⁵Noro Noni rok Kain tut nide mun di kwas. Apino Kain ningon sibui nindig bibor binghek.

⁶Gima rino TUHAN hig ser Kain “Angon sibui sut leu binggon i? Anghek tut nggon i?

⁷Gino abon mun di kei lene ma angon nggan[7] noro gino abon mun di kinei lene sisar tin ei mem coi ei angonti. Sisar pi bisrou na noro suar aom kep sisar dima.”

⁸ Mpe hi bu lene Kain pai bak nikinjoi Habel “Akwei ba, suug ei ngoi dumti ri.” Tirigi yuug krau ngoi dumti lene Kain bui nikinjoi bimai hak ug.

⁹Lene TUHAN hig singgre Kain “Akinjoi Habel no hantou i?” Leu api Kain buhup “Dikan tut bi. Dani ne no di suar ya ser dikinjoi rin bi.”

¹⁰ Lene TUHAN hig ser noni bu “Abon mun di kinei bibor dini tut nggon i? Akinjoi ninggrom no hara Da leu dihyeisi mo jug dem kep nok nihyet di hara mem nibirop hanyen bina.

¹¹Dimbriom nani ba, bit bon ayai miai ei dihyeiti bu bi. Lewo tereu dihyei hap niji bipinde akinjoi ninggrom tirigi po abui noni pima.

¹²Gino andim njita ngan lene nikioi mehei noro ningat mintun him bi sren. Dibindei ba, abong-bong wai bidem dihyei ninjek dip apino abon atimieisi hi bi.”

¹³Lene Kain pai bak TUHAN “Hukum dino akes ei da dip dima mibuhun tak da ba, da disindem tut gima bi.

¹⁴Ayo! Ajji da leu dihyei dini cem leu Aho bei cem lene abindei ba, dibong-bong wai bidem dihyei ninjek dip apino midibon ditimieisi hi ei dihyeisi dini bi. Apino tungwa tou rino um da ei puig sinon mihwen da bidimai.”

¹⁵Lene TUHAN buhup “Dwai. Gino hi hwen na ba, amai lene midibindei ba, ibou muhwindacan itug ndei nimai drek dip na.” Gima rino TUHAN yok mun di bindo ei Kain ningkek dip ser nhyepo hi hwen noni bimai ei puig sinon bi.

¹⁶Lene Kain jo leu TUHAN Noho bei buug bong ei minu Nibong-bong Wai ei miai Eden nite bei mpia nipriti.

¹⁷Lene Kain nitnem yoni igyem njita tut yam apino jei bi lene nitnem tta buhun. Jei bi lene nitnem gwam tut nipinai bijem ninyeng Henokh. Mpe dima lene Kain win minu nijep bu bijem minu dima ninyeng Henokh bu.

¹⁸Lene Henokh yai nipmot Irad leu api Irad yai nipmot Mehuyael leu api Mehuyael yai nipmot Metusael leu api Metusael yai nipmot Lamekh.

¹⁹Lene Lamekh ug wak nitnem bat cin Ada kin Zila.

²⁰Lene Ada gwam tut nipmot Yabal bu. Yo di intun Yabal him yahagom ighyen kep sapi nya kin domba nya bibong kep prak meng behei.

²¹Yabal nikinjoi ninyeng rino Yubal. Yo di intun Yubal him yahagom ikek nggong mbrei kin porei nya.

²²Lene Zila gwam tut nipmot Tubal-Kain. Yo di intun Tubal-Kain him yahagom iba ngkimom-tembaga kin ngkimom nitu bibon kep ndigban ninyeng hagom. Tubal-Kain bon nikwohop Naama.

²³Mpe dima lene Lamekh pai bak nitnem bat cin, “Ada kin Zila e, jimiap dihyet dini ug. Pinai pilei gom bui da ba, dani cem dibui noni drek dip ba, mai su.

²⁴Gino TUHAN mibindei ba, ibou muhwindacan itug ndei nimai drek dip Kain nimaisi lene Noni mibindei ba, ibou ningot muhwindacan ba, muhwindacan itug ndei nimai drek dip dimaisi bu.”

²⁵Lene Adam nitnem yoni igyem njita tut yam bu apino jei bi lene nitnem tta buhun. Jei bi lene noni gwam tut nipinai hi bu bijem ninyeng Set. Gima rino Hawa pai “Allah bindei ba, siyai sipmot hi kin bu biluei Habel nohoti lewo Kain hwen noni bimai su.”

²⁶Lene Set yai nipmot bijem ninyeng Enos. Mpe dima lene tungwatu nya kindi indat kep TUHAN ninyeng tirigi ikuk yok biNoni.