Read Hatam NITRITI 40 Bible Online

NITRITI 40 - Hatam bible

NITRITI 40

¹Mpe di gom bu lene Firaun de nibou mem ba anggur ngei kin nide nibou mem roti yahacem ibon mun tunggwei sut noni.

²Apino Firaun ningon sibui sut yok,

³bicom yok ug ei ig bui nsi ei Potifar de igya. Ba, Yusuf cem ningat rin ei sirima.

⁴Lene nibou ig bui ndo Yusuf nok awak mem yok.

⁵Tirigi isima ninno tu, lene nibou mem ba anggur ngei kin nibou mem roti yahacem ibong bimumpriem ba, ide mun di imumpriem dima bon nimbot kepti di ter leu yam.

⁶Njap di hyep rino Yusuf tau kep yok lene ngat lo, iimaisi hai.

⁷Lene noni hig ser yok “Nggon rino jiimaisi hai njap di ammani i?”

⁸Lene ibuhup “Nahacem nimumpriem hi mmun di aponi noro bit bon tungwa hi mbot kep tut mumpriem dima ningat binye kan bi.” Lene Yusuf pai biyok “Allah Nongkom sindem tut tungwatu nya leu binhyepo imbot kep tut nimbot kepti kan. Ma jipui sut mun di jimumpriem bida ug e.”

⁹Lene nibou mem ba anggur ngei pai “Dimumpriem tut ba anggur di jo hammi doho bei.

¹⁰Lene ninggram ningai ntun him ba, sindi tou leu api nitou kieng lene dingat ningat di nggwop ndun him tu.

¹¹Dingat lo, Firaun de mok no jo ei dindati leu api dipuk ba anggur ningat bidipot ningei eisi leu api disu binoni.”

¹²Lene Yusuf pai binoni “Dimbot kep tut nok gini a. Ninggram ningai di ntun ba ninda him dima bindo pia njap ningai.

¹³Njap ningai bu lene nibou ndig mikes na leu ig bui nsi dini lene kos ser ade mun di abon tunggwei sut noni leu api kon anyeng nok nibou mem ba anggur ngei hanyen apino asu mok tut binoni bit leu nok gi nipou.

¹⁴Noro ma ayok ngon kep da ba, angondut da tirigi abong kei agwam kei hanyen. Lene ma apai sut da bak nibou ndig leu binhyepo noni mikes da leu ig bui nsi dini.

¹⁵Lewo ningat ne tungwatu nya ikat da kwei leu mben Ibrani itimieisi ba, dibon mun tunggwei di bindei bidisima hukum ig bui nsi ei minu Mesir dini hi bi.”

¹⁶Tirigi nibou mem roti kan tut bipia nimbot kepti dima kei mem nibou mem ba anggur ngei lene noni cem pai bak Yusuf “Dimumpriem tut mpe di gom dittei bansi roti ningai di jo-jo yam dip ei dibou nggram him.

¹⁷Lene roti ninyeng hi gom hi gom di mem Firaun jo ei bansi roti di jo nai noro ha nya ikwei puk-puk nyen.”

¹⁸Lene Yusuf pai binoni “Dipai ningat binani. Bansi roti ningai dima ne njap ningai ri.

¹⁹Njap ningai bu lene Firaun micuk nide limwa nya ba, yoni irop abou leu api yahak angut ei cou dip bitas tut leu api ha nya ikwei puk anghui bingwig.”

²⁰Njap ningai bu lene Firaun bon pesta nindig bibor kep nide njap di srek binduk nide nibou di igya kui noni yahagom kwei. Leu api sok nihyet mem nibou ig bui bikes nibou mem ba anggur ngei kin nibou mem roti leu ig bui nsi kwei ei yahagom yoho bei.

²¹Lene Firaun kon nibou mem ba anggur ngei ninyeng hanyen leu api no dima su mok tut ba anggur ngei bak Firaun hanyen nok gi nipou.

²²Noro noni kes hukum nimai ei nibou mem roti dip. Hagom pek kep mem yok bit leu nok Yusuf nimbot kepti.

²³Noro nibou mem ba anggur ngei yok ngon kep mun di Yusuf pai binoni bi. Ningon prion ser Yusuf bihigom.