Read Hatam NITRITI 42 Bible Online

NITRITI 42 - Hatam bible

NITRITI 42

¹Tirigi Yakub miap tut bipia gandum ngan no jo ei minu Mesir lene noni pai bak nipmot bat nya “Jigwam hak bijimmou kep yam leu binggon i?

² Dimiap tut bipia gandum ngan no jo ei minu Mesir. Je juug ba, jipek hi mem nye leu binhyepo yahagom imai inggum bi.”

³Gima rino Yusuf nikindig bat nya ibou simnai ittei yam biyuug pek gandum ngan ei minu Mesir.

⁴Noro Yakub kes Yusuf nikinjoi Benyamin bibit yok bi lewo ningon hek tut noni bikan bipia leu ma noni cem mitug midut e?

⁵Lene Yakub nipmot bat nya induk yam kwei bit yo di hiter bipek gandum ngan ei minu Mesir lewo ninggum di kinei bibor hwen timiei minu Kanaan nya yahagom.

⁶Yusuf tri gandum ngan bak tungwatu nya leu dihyei nisurti-nipekti hagom lewo noni ne nibou di ninyeng tak kep timiei minu Mesir nya yahagom ri. Gima rino nikindig bat nya ikwei kuk yok ei nimig him ba, iba ingwak bikik mpia.

⁷Tirigi noni ngat igbit nikindig bat nya lene bon nonti nok ngkiai ei igyai him leu api ba nihyet di ten bihig singgre yok “Jikwei leu hantou i?” Lene ibuhup “Nikwei leu minu Kanaan mem gima nipek njita.”

⁸Mbro nok gino Yusuf ngat igbit nikindig bat nya lo, yoni ingat igbit noni bi.

⁹ Lene noni yok ngon kep gi po noni mumpriem tut yok pima leu api cug yok bipai “Jingon mang bijikwei yok jitta kep nyende minu dini tirigi niya ser bi.”

¹⁰Noro isrep bipai “E bi! Andigpoi e, ninok ade awak binikwei pek njita he.

¹¹Andigpoi e, nahagom nibon nicig gom ngat. Niyok nitta kep jide minu dini bi. Nahagom ningon sren.”

¹²Noro Yusuf srep bipai “Jibicum! Jikwei yok jitta kep minu dini tirigi niya ser bi.”

¹³Lene ibuhup “Andigpoi e, nahagom nibou simnaibrimigcan ba, nikindig nikinjoi bat yam binibon nicig gom ngat ei minu Kanaan. Nyeni nikinjoi kieti gom mai leu nye tu ba, nipumiap no gwam bit nicig.”

¹⁴Noro Yusuf buhup “Bit leu nok dipaisi pima ri. Jikwei yok jitta kep minu dini.

¹⁵Gima rino midibingon je nok gini. Deheng bitug hon Firaun ninyeng bipia midikes je bijingkwei hanyen hak bi bibou jikinjoi ndrim pima kwei ngat da nipou ug e.

¹⁶Ma jigom ngkwei hanyen ba, buwak jikinjoi ndrim kwei bida. Lene je di nindigsi mijisima bibou dingat bou diyai him bipia mun di jipai sut noni igbit ug e. Gi bi lene jo nibreisi bipia jikwei yok jitta kep minu dini.”

¹⁷Lene yahagom isima ei ig bui nsi mem njap ningai.

¹⁸Njap ningai ngwig leu lene Yusuf pai biyok “Dittin tut Allah bidibit nicuk dati. Midikes je leu ig bui nsi dini tug hon puig gom ngat he.

¹⁹Suar jibon mun di bindo bipia jingon sren nok gini. Jigom misima hak ei ig bui nsi bidikes je di nindigsi leu binhyepo jingkwei hanyen bijipwoi gandum ngan mem jide bat nya di imai inggum ei a.

²⁰Noro suar jibuwak jikinjoi ndrim hanyen kwei bida nok mun di bindo bipia jingon sren. Dikes hukum nimai ei je dip bi.” Lene ice tut Yusuf nikos tutti.

²¹Leu api isimbot kep biyam bipai “Itug ndei hukum dini drek dip mun po ibon tunggwei sut ikinjoi kieti pima ri. Mbro nok gino mun di kinei bibor cut igkep noni ba, noni kon ninda ser nye lo, nyeni ingkek ndok tut. Gima rino itug ndei hukum di buhun ei njap di ammani.”

²² Lene Ruben pai “Nipou lene dipai ser je bipia ma jingget noni au. Nok bi e? Nogindini itug ndei hukum drek dip nimaisi ri.”

²³Yusuf miap mun di isimbot kep biyam tut hagom noro nikindig bat nya ikan tut gima bi. Lewo imbrap bit noni tug hon no di kiek nihyet kan.

²⁴Gima rino noni kes yok buug leu yok leu api pim biniyai nggwei kibor. Tirigi ningon ngkiem hanyen tu lene noni kwei ngat yok bindo Simeon leu api cuk nide limwa nya leu binhyepo ingot nimig ninda bou nindigsi nya yahagom igyai him.

²⁵Lene Yusuf kes nihyet bak nide awak nya leu binhyepo ittan gandum ngan ei nikindig bat nya ide kron hagomti ba, itug ide mitiei hanyen biyok biku nyahan ei kron nyati. Lene kwas njita niken tut yok mem gima igyem kak puig sinon cem. Lene awak dima yok igyai hagom bit leu nok Yusuf nicuk yoti.

²⁶Leu api nikindig bat nya ikon ide kron nya tut gandum ngan di ipek tu bikes ei ide keledai nya dip bimbut tut.

²⁷Tirigi yuug ei puig sinon rino hi kwek nide kron mem gima bihyen nide keledai lene ngat lo, nide mitiei no jo srig gandum nganti ei kron nuhuig a.

²⁸Leu api hara tut bak nindigsi nya bipai “Ayo! Itug ditde mitiei hanyen bida! No jo kron dini nuhui.” Apino yahagom inghuisi mpig sut ba, ingwes mien bihig yam “Allah nggon ndei nye i?”

²⁹Lene tirigi yuug tau kep icig Yakub ei minu Kanaan hanyen tu lene ipui sut mun di pek kep mem yok hagom bak.

³⁰Ipai binoni “Nibou mben Mesir ba nihyet di ten bipai kep nye bipia nuug yok nitta kep nide minu.

³¹Noro nisrep bipia niyok nitta kep nide minu bi ba, nahagom ningon sren.

³²Nahagom nibou simnaibrimigcan ba, nikindig nikinjoi bat yam rin binibon nicig gom ngat ei minu Kanaan. Nyeni nikinjoi kieti gom mai leu nye tu ba, nipumiap no gwam bit nicig.

³³Lene no dima buhup binye bipia suar nibon mun di bindo bipia nyeni ningon sren nok gini. Nigom misima hak lene nye di nindigsi nya ningkwei hanyen binipwoi gandum ngan mem nide bat nya di imai inggum ug e.

³⁴Lene suar nibuwak nikinjoi ndrim hanyen binoni. Gima rino noni mikan tut bipia niyok nitta kep nide minu bi noro ningon sren. Lene noni mikes no di sima hanyen binye bice tut nyeni nibong kep nide minu binitri-nipek ndiyok eisi.”

³⁵Lene yahagom ikwek ide kron nya bingat lo, bikwop tungwagom-gom de mitiei jo srig gandum nganti apino yahagom kin icig Yakub ittin bibor.

³⁶Lene Yakub pai biyok “Mbigom mijibindei ba, dimunggwom bat nya yahagom ipror leu da. Yusuf pror tu ba, Simeon cem pror tu lene nogindini mijiyai Benyamin cem hak leu da. Dangkom dibiang nibuhunti tut hagom!”

³⁷Lene Ruben pai bak nicig “Arig e, dwai. Akes Benyamin ei dindati leu api midibuwak noni hanyen kwei yo. Gi bi lene midikes dipmot bat cin ei andati leu binhyepo ahwen yok bimai hak ug.”

³⁸Noro Yakub srep bipai “Midice tut Benyamin bit je bi sren. Nikindig mai leu noni tu ba, nimig gom he. Mpaba mun di buhun micut igkep noni kak puig sinon e? Dikoi bibor tu. Gino jibindei ba, dingon ngguk bibor bu lene midimai hak drek dip.”