Read Hatam NITRITI 43 Bible Online

NITRITI 43 - Hatam bible

NITRITI 43

¹Ninggum ei minu Kanaan kum eisi bu ba, kinei bibor.

²Tirigi Yakub kin nide ig bei nsi nya igyem gandum ngan po ipek ei minu Mesir pima bingwig su lene noni pai bak nipmot bat nya “Ma je juug ei gimu bijipek gandum ngan hi kin bu mem nye.”

³Lene Yehuda buhup “Nibou mben Mesir sok kep nye ngkiem bipia gino nibuwak nikinjoi ndrim hanyen bak noni bi lene bit bon niya ei noho bei bu kan bi.

⁴Gino ace tut Benyamin bibit nye lene nuug ei sirima hanyen binipek njita.

⁵Gi bi lene nuug bi lewo nibou dima cuon ser nye bipia gino nibuwak nikinjoi ndrim hanyen bak noni bi lene bit bon niya ei noho bei bu kan bi.”

⁶Lene Yakub nso tut biyok bipai “Nggon rino jibindei bidingon buhun bibor tug hon gima jimbot kep tut jikinjoi ndrim bak andigpoi dima i?”

⁷Lene ibuhup “Andigpoi dima hig simber nye nyen tut nyenti kin nyeni ide bat nya cem. Noni hig ser nye tut nyeni nicig bipai no niyaisi jo yo e, he nyeni nikinjoi ndrim hi nonaha e, lene nok. Bit bon nikimut nuhui leu noni kan bi. Notou minikan tut ningon kanti tirigi cuk nye mem gima nibuwak Benyamin hanyen binoni i?”

⁸Lene Yehuda pai bak nicig “Ma akes apmot dima bibit nye leu api midinyohou noni nok gi kei. Nyeni nimbut njap di ammani ba, nibrim nimig hanyai ser nhyepo igom mai ninggum leu nye bi.

⁹Midikes diyaisi ei mem noni ba, dibuhup hanyen bina tut mun di pek kep mem noni hagom. Gino dibuwak noni hanyen kwei bina ba, ningwes ngun bi lene dingon mui bijo ninno ug bipek diyaijo ningwig honti hak ug.

¹⁰Gino ighyet srou kui yam nyen nok gini ninno bi lene mpaba nuug binikwei hanyen mbican bu tu e?”

¹¹Lene Yakub ce bipai “Nna ba gino puig hiter hi bi lene ma jipwoi ndigban di kei bibor kei leu minu dini nok biei ngat kismis kin ahwei lon kin biei ngat di ninghap ui-gwang kei kin biei ngat kemiri kin badam cem ba, juug sut bijinjei bak nibou mben Mesir.

¹²Lene ma jipwoi mitiei nimangti mbican bram yam. Hi mem jibitug hanyen bak nibou biluei mitiei di jo jide kron nyati. Leu mpaba ningon kiowi niti tut gima e?

¹³Ma jibuwak jikinjoi ndrim bijimbut sindem ug ei minu Mesir hanyen.

¹⁴Nna ba Allah Di Sindem Bibor mipingok nibou mben Mesir dima ningonti leu binhyepo ngondut je bikes Simeon kin Benyamin hanyen bije. Noro tut danti ne gino suar dimunggwom bat nya ipror leu da lene minggon ndei?”

¹⁵Lene Yusuf nikindig bat nya ipwoi ndigban di kei bibor kei pima kin mitiei nimangti mbican bram yam ba, yuug sut ug ei minu Mesir bibuwak Benyamin cem bit yok. Tirigi ikwei krau minu Mesir tu lene igya ei Yusuf noho bei.

¹⁶Tirigi Yusuf ngat Benyamin kin nikindig bat nya lene noni cuk nide awak di ninyeng tak kep nide ig bei nsi nya bipai “Abuwak yo dini ug ei ig bei nsi. Igyem njita bit da mem mpia huk pijum.” Gima rino ma abui mindhe ningut gom ba, abam mem nye.

¹⁷Lene awak dima yai hagom bit leu nok Yusuf nicuk noti bibuwak yo dima ug ei Yusuf de ig bei nsi.

¹⁸Tirigi yuug ei puig sinon tu lene ingwes mien ba, ikan bigya awak dima mibuwak yok ug ei ig bei nsi drek dip mitiei di jo ei ide kron nyati mem imbutti gi nigom pima ri. Mbigom noni kin nide limwa nya mihwen yok bikat yok nok awak bipos ide keledai bingwig leu yok ug rin e?

¹⁹Gima rino ibrim ingkek kep noni ei dimbou hui bipai bak,

²⁰“Andigpoi e, nipai mun nyeng gom bina ug e? Nipou pini jug lene nikwei pek njita leu nibou mben Mesir mbigom tu.

²¹Noro tirigi ningkwei hanyen binibong kak puig sinon lene nikam gandum ngan leu kronti biningat lo, mitiei di nibigo gandum ngan pima hagom jo srig gandum nganti ei bibikwop tungwagom-gom nide kron nuhuiti. Gima rino nipwoi nibou de mitiei dima hanyen kwei binoni.

²²Ba, nipwoi mitiei hi kin bu kwei leu binhyepo nibipek njita hi kin bu. Noro tut mitiei di jo kron nyati lene nikan tut no di tug gima hanyen binye bi.”

²³Lene awak dima buhup “Dwai. Ma jingwes mien au. Mpaba jide Allah di jicig kuk no bak Nonti tug jide mitiei hanyen bije ei jide kron nyati e? Lewo diyai gandum ngan nibok pima ei dindati leu je tu.” Lene noni ug buwak Simeon kwei bikes noni hanyen biyok.

²⁴Leu api noni buwak yok ba, icoi ug ei Yusuf de ig bei nsi leu api noni tau minyei biyok mem ibipiap imigya. Lene noni ug hyen kep ide keledai nya cem.

²⁵Lene ihit ndigban di kei bibor kei pima yok ba, ibitindei ser Yusuf nikweisi lewo no dima pai biyok bipia yahagom migyem njita bit nibou mben Mesir mem mpia huk pijumti.

²⁶Tirigi Yusuf kwei krau ig bei nsi tu lene nikindig bat nya ikon ndigban di kei bibor kei dima binjei bak leu api ikuk yok binoni ba, iba ingwak bikik mpia.

²⁷Lene noni hig ser yok “Jahagom nok gi kei e? Nipou lene jipui sut jicig dikoi bibor tu. Noni cem nok gi kei e? No niyaisi jo yo e?”

²⁸Lene ibuhup “I, ade awak andigpoi di nyeni nicig no niyaisi jo yo ba, noni nok gi kei cem.” Lene ikuk yok binoni ba, iba ingwak bikik mpia.

²⁹Tirigi Yusuf ngat igbit nikinjoi ngi-ngat lene hig singgre yok “Jikinjoi ndrim pima rini e?” Lene pai bak Benyamin nonti “Mot de ug o, nna ba Allah nyohou na!”

³⁰Jei bi lene ningon ngguk tut nikinjoi ngi-ngat nindig bibor ba, mbigom moom kep ningon kan bi ba, mittin ninnei. Gima rino noni bipbur buug leu yok bicoi nghim nsi leu api pim biniyai nggwei kibor drek dip nikinjoi ngi-ngat dima.

³¹Tirigi noni ba minyei bidip niyai nggwei leu su lene kwei ngat yok bu ba, om ningon. Lene cuk nide awak nya bitin ei njita mem yok.

³²Yusuf gwam kui meja gom biyem njita binongkom lene nikindig bat nya kin nikinjoi igwam kui meja hiter bu. Lene timiei minu Mesir nindigsi nya igwam kui ide meja hiter bu leu gino igyem njita bit mben Ibrani ne ikan bipia gima suwok.

³³Lene awak dima nyohou dimig Yusuf nikindig bat nya kin nikinjoi bigwam kui ide meja ei Yusuf nibiho bigyem njita bit leu ide njap di isrekti. No di mighumbou gwam bibie lene no di nipumiap gwam nohon keti. Tirigi yoni ingat igbit igwamti nok lene itou kep yam yaisi binggap leu tut nindig bibor.

³⁴Lene awak nya ikon njita leu Yusuf de meja dip bisu bak nikindig bat nya. Noro ikon njita nindig bibor bikum eisi mbimuhwi bisu bak Benyamin. Gima rino yahagom igyem njita ba, idut ba anggur ngei bit Yusuf bibou ndei yok ug e.