Read Hatam NITRITI 44 Bible Online

NITRITI 44 - Hatam bible

NITRITI 44

¹Lene Yusuf pai bak nide awak di ninyeng tak kep nide ig bei nsi “Ma attan gandum ngan ei yo dima ide kron nyati bimpung kei lene atug ide mitiei hanyen biyok bijo ei gandum ngan dip ei kron nyati.

²Lene ma aku ditde mok perak ei ikinjoi ndrim nide kronti bijo simiak nide mitiei di noni bigo gandum ngan.” Lene awak dima yai hagom bit leu nok Yusuf nicuk noti.

³Njap di hyep bu lene Yusuf kes nikindig bat nya kin nikinjoi bimbut tut ide keledai nya mem ha yausi.

⁴Tirigi ijo leu minu ndig dima bimbut imig biyuug ei ting leu minu ndig dima bigyo lene Yusuf cuk nide awak pima bipai “Abipbur ba, ahuk bram yo dima. Gino ahatap yok lene ma ahig singgre yok bipia nggon rino ibuhup kin gi kinei bida drek dip gi dingondut yok i?

⁵Nggon rino inggimang ditde mok perak i? Lewo didut ba anggur ngei eisi he bi noro diko bidibinggok tut ndiyok eisi cem. Ibon mun tunggwei sut da nindig bibor.”

⁶Tirigi awak dima ug bahatap yok tu lene hig singgre yok bit leu nok Yusuf nicuk noti.

⁷Lene ibuhup “Andigpoi e, apai kep nye nok tut nggon i? Neheng tut bipia nibon mun bit leu nok apaisi dima bi sren.

⁸Na di Andigpoi akan tut bipia nitug mitiei po ningat ei nyende kron nyati pima hanyen bina di Andigpoi tirigi nikwei leu minu Kanaan pima tu. Gima rino gi mbun ninggimang perak kin mas leu nibou mben Mesir de ig bei nsi kan bi.

⁹Andigpoi e, gino angat mok perak dima bijo ei nyeni nigom nide kronti lene no dima mitug ndei hukum nimai hak ug leu api nye di nindigsi mininok awak mem na di Andigpoi.”

¹⁰Lene awak dima ce bipai “Igbit ri. Noro no di nggimang mok perak dima nongkom minok awak lene dikes je di nindigsi bijimbut hak ug.”

¹¹Gima rino ibipbur bicug ide kron nya leu keledai nya inghim ug ei dihyeisi bikwek hagom.

¹²Lene Yusuf de awak dima nyohou nggok ser mok perak dima ei ide kron nyati sindam leu no di mighumbou nide bibie ug bipek ikinjoi ndrim nide bingat lo, mok perak no jo ei Benyamin de kronti.

¹³Apino nikindig bat nya irik ide sinsun rok him drek dip ingon di ngguk bibor. Lene ikon ide kron nya hagom hanyen bikes ei ide keledai nya dip bingkwei hanyen ug ei minu ndig dima.

¹⁴Tirigi Yehuda kin nikindig bat-nikinjoi bat nya icoi hanyen ug ei Yusuf de ig bei nsi lene ingat lo, Yusuf no gwam bimbut bigyo. Lene yahagom ikuk yok ei noho bei ba, iba ingwak bikik mpia.

¹⁵Lene Yusuf hig singgre yok “Jiyai munti notou rini i? Jikan tut ditde nisindemti bi e? Lewo bon diko bidibinggok ndiyok leu binhyepo dikan tut mun nyeng hagom kan.”

¹⁶Lene Yehuda buhup “Andigpoi e, bit bon nibirop ahyet kan bi. Notou minimbrap gau nyenti binindo bipia ningon sren i? Allah ndo brei binye bipia ningon mui su. Nogindini nahagom ninok awak mem na di Andigpoi bu. No di ade mok perak jo kron nideti he bi.”

¹⁷Noro Yusuf srep bipai “E bi! Midiyai igbit apaisi dima bi. No di mok perak de jo kron nideti nongkom minok awak mem da. Je di nindigsi jingwes ngun bijingkwei ndam jicig hanyen hak ug.”

¹⁸Lene Yehuda kiju bibrim ningkek kep Yusuf bipai “Andigpoi e, gino ace tut lene midindat kep dingon kanti bina di Andigpoi mbigom. Ma angon sibui sut da au. Dikan tut bipia na di Andigpoi anyeng jei noyam kin nibou ndig mben Mesir.

¹⁹Andigpoi e, nipou pima lene ahig ser nye tut nyeni nicig kin nikinjoi ndrim cem.

²⁰Lene nibuhup ahyet binipai bipia nibon nicig di no gwam noro ninghim koi bibor ba, nibon nikinjoi ndrim di nipmem yai bak nicig mem niwer andig-ndausi. Mot dima nikindig mai leu su ba, nimig gom he. Apino nicig ngondut noni nindig bibor.

²¹Andigpoi e, tirigi po acuk nye bipia suar nibuwak mot dima kwei bina leu binhyepo angat noni bou ayai him pima lene,

²²nibuhup ba, nipai bina bipia bit bon noni kes nicig ei kan bi leu gi nok lene nicig mimai hak ug.

²³Lene na di Andigpoi abuhup binye bipia gino nibuwak noni hanyen kwei bina bi lene bit bon nicoi biniya ei aho bei bu bi.

²⁴Tirigi po nuug ngat nyeni nicig hanyen pima lene nindat kep binoni bit leu nok acuk nyeti pima.

²⁵Mpe di gwam dip bu lene noni cuk nye hanyen kwei ei minu Mesir leu binhyepo nipek njita hi kin bu.

²⁶Noro nibuhup bipia bit bon niba nehei he buug hanyen bi. Gino nikinjoi ndrim bit nye bi lene bit bon nicoi hanyen biniya ei aho bei bu kan bi. Suar noni bit nye ba, nuug hanyen ug ei minu Mesir.

²⁷Lene nicig pai binye tut nitnem Rahel di gwam tut nipmot bat nya ibou can he.

²⁸No di mighumbou kes nicig ei su ba, nicig kan bipia mpaba mindhe di niten-pos briug noni tu. Lewo nicig ngat ningat bu bi kwei bipek ammani kep.

²⁹Gino niyai no di ndrim binibuwak noni lene mpaba mun di buhun micut igkep noni puig sinon. Nyeni nicig koi bibor tu. Gino nibindei ba, ningon ngguk bibor bu lene noni mimai hak ug.

³⁰Andigpoi e, gino dingkwei hanyen ndam dicig lo, dibuwak dikinjoi ndrim bibit da bi lene dicig mimai drek dip noni lewo dicig ningon ngakei nipmot ndrim nindig bibor.

³¹Dicig koi bibor tu ba, gino nibindei ba, ningon di ngguk bibor bu lene noni mimai hak ug.

³²Lene gima he bi. Dipreu ei bak dicig bipia midikes diyaisi ei mem nipmot ndrim dima. Dipai binoni bipia gino dibuwak mot dima hanyen binoni ba, ningwes ngun bi lene jo nibreisi bipia dingon mui ninno ug bipek diyaijo ningwig honti hak ug.

³³Andigpoi e, gino ace tut lene midiluei dikinjoi ndrim nohoti bidinok awak mem na di Andigpoi. Ma asindui sut noni bingkwei hanyen ug ei nitimieisi bit nikindig bat nya hak ug.

³⁴Gino noni ngkwei hanyen ndam dicig bi lene notou mem da bu i? Lewo diyai ttin gima dingat mun di cut igkep dicig tirigi ningon ngguk bibor nok a.”