Read Hatam NITRITI 47 Bible Online

NITRITI 47 - Hatam bible

NITRITI 47

¹Lene Yusuf ya tut nikindig bat nya ibou muhwi biyuug ngat Firaun bipai binoni “Dicig kin dikindig bat nya kin dikinjoi yahagom ikwei sut ide mindhe-ndhe nya kin mun di inyeng tut nya hagom bibong ei Gosyen.”

²Lene noni ndo nikindig bat nya bak Firaun.

³Lene Firaun hig ser yok “Jiyai kep midyai mindei ngan i?” Lene ibuhup “Nihyen kep mindhe-ndhe nya kan bit leu nok nidigup bat nidigai bat nya igyai kepti.

⁴Nikwei bong nok ngkiai ser ade minu dini lewo ninggum di kinei bibor hwen nyeni nitimieisi ei minu Kanaan ba, mun di nibihyen kep mindhe-ndhe nya cem mui bingwig leu su. Gima rino gino na di Andigpoi ace tut nye lene nibong ei Gosyen e?”

⁵Lene Firaun pai bak Yusuf “Nogindini acig kin akindig bat nya kin akinjoi yahagom ikwei su ba,

⁶dikau dimbou leu minu dini hagom leu yoni. Asindui sut yok ba, ibong ei Gosyen lewo hanjop nsi dima kei-kau ei minu Mesir nisurti-nipekti hagom. Gino yo di ijoi bibor bihi isrig yokti lene ma akon inyeng binok nibou di ighyen kep ditde mindhe-ndhe nya.”

⁷Lene Yusuf buwak nicig Yakub kwei bikes no biya ei Firaun noho bei. Lene Yakub ngat nadi mem noni.

⁸Leu api Firaun hig ser noni “Ade njap ug ei ari bingwam pig su i?”

⁹Leu api Yakub buhup “Ditde njap ug ei ari bingwam sratus gom ningot ningai tu ba, dibong-bong wai bidem dihyei ninjek dip. Noro mun di buhun bibor cut igkep da ba, gino ibinai didigup bat-didigai bat di ibong-bong wai ide njap kin ditde njap ne ditde niyaijoti cun ba, mpung tut mun di nggruk cem.”

¹⁰Lene Yakub ngat nadi mem Firaun mbigom kin bu ba, om no leu noho bei.

¹¹Lene Yusuf ndo dihyei hanjop nsi di kei-kau ei minu dima di jo dideu minu ndig Rameses bak nicig kin nikindig bat nya kin nikinjoi bit leu nok Firaun nicuk noti.

¹²Leu api noni tin ei njita di igyem nok gi dem mem yok kin ide bat nya yahagom bibikwop ide munggwom ngwoi nya cem.

¹³Mpe dima lene ninggum di kinei bibor hwen timiei minu Mesir nya kin mben Kanaan yahagom. Njita hagom ngwig leu yok apino inghuisi jet bibor.

¹⁴Tirigi ikwei pek gandum ngan lene Yusuf tri njita biyok bipek mitiei bikum eisi nindig bibor leu api pwoi hagom ug ei Firaun de ig bei nsi.

¹⁵Tirigi timiei minu Mesir nya kin mben Kanaan ide mitiei ngwig leu yok lene ikwei hara Yusuf bipai “Ayai njita binye! Mitiei ngwig leu nye tu. Asindui sut nye binimai hak au.”

¹⁶Lene noni buhup “Gino jide mitiei ngwig leu je tu lene ma jijem jide mindhe-ndhe nya kwei leu binhyepo jibipek njita hi kin bu.”

¹⁷Gima rino ijem ide mindhe-ndhe nya kwei ba, itri ide kuda domba nya kin kambir nya kin sapi nya kin keledai nya hagom bak Yusuf bibipek njita leu noni. Nok gima kikau mem ari bingwam nitindur gom ba, noni nyohou yok tug hon njita di iba ide mindhe-ndhe nya bipek leu noni.

¹⁸Ari bingwam gi gwam dip bu lene ikwei pai bak noni “Andigpoi e, nipai brei bina bipia mitiei ngwig leu nye tu ba, nitri mindhe-ndhe nya cem hagom bina di Andigpoi tu. Nyeni nuhui mbum ba, ninda ngwak lene nikenti di jo ne nyenti ningut kin nyende dihyei hanjop nsi nya.

¹⁹Ma asindui sut nye binimai hak au! Leu gi nok lene nyende hanjop nsi nya minok ha ngunti bram nye bu. Minitri nyenti ningut kin nyende dihyei hanjop nsi nya bina di Andigpoi ba, nibipek njita leu na. Nibon nyenti nok awak mem Firaun ba, noni nyeng tut nyende hanjop nsi nya bu. Ma ayai gandum ngan binye nok njita di niyem kin njita bou di nindim ei miaisi cem!”

²⁰Gima rino Yusuf ba njita bipek dihyei hanjop nsi nya hagom ei minu Mesir bak Firaun. Suar timiei minu Mesir nya yahagom itri ide dihyei hanjop nsi nya bingwig leu yok lewo ninggum di kinei bibor hwen yok bijo ninno. Apino dihyei hanjop nsi nya hagom ei minu Mesir nok Firaun de ba, noni nyeng tut hagom.

²¹Gima rino Yusuf ba njita biwim timiei minu Mesir nya yahagom binok awak mem Firaun bu.

²²Dihyei hanjop nsi gom-gom di Yusuf ba njita bipek bi rino imam nya ide. Suar itri ide dihyei hanjop nsi nya leu yok bi lewo Firaun nonti yai njita biyok mikuisi.

²³Lene Yusuf pai bak timiei minu Mesir nya “Jingat I! Diba njita biwim je nok awak mem Firaun bitut jide dihyei hanjop nsi nya cem tu. Njita ngan di diyai bije nogindini mem jindim bidem ei jide miaisi.

²⁴Tirigi ngat ningat tu lene suar jiyai ningat can leu ningot gom ningat can leu ningot gom lene nok bak Firaun. Lene nindigsi nya mijo bije bijibet hi ei nok njita bou lene jiyem kep nindigsi nok njita mem jenti kin jide bat nya jahagom.”

²⁵Lene ibuhup “Andigpoi e, anyohou nye biningwes ngun tu ba, nijem sigyo nindig bibor bina. Ninok awak mem Firaun hak ug.”

²⁶Gima rino Yusuf pas kep nicukti bingkiem ba, nicukti dima ne suar timiei minu Mesir nya igyai ide njita ningat can leu ningot gom ningat can leu ningot gom lene nok bak Firaun bininyeng tak kep. Lene nicukti dima jo kikau kwei bipek ammani kep. Noro Firaun ninyeng tak kep dihyei hanjop nsi nya di imam nya ide bi.

²⁷Mben Israel ibong ei hanjop Gosyen ei minu Mesir ba, ikum ei ide mun di inyeng tut nya nindig bibor ba, idigek kep mpia.

²⁸Yakub bong ei sirima mem ari bingwam simnaimuhwidip brimigtehican ba, nide njap ug ei ari bingwam sratus gom ningot bitai ba, muhwindacan tu.

²⁹ Son dideu nide njap ningwig honti lene noni sok nihyet mem nipmot Yusuf kwei lene pai binoni “Ma asu anda ei diko kieti[30] gi bindo bipia tirigi dimai leu su lene ma atig dingut ei minu Mesir au.

³⁰Noro suar attei dingut ba, aug sut leu minu dini lene akon ug ei ditimieisi lene ma atig dingut bijo simiak dicig bat nya ijui dip.” Lene Yusuf ce bipai “Arig e, midiyai hagom bit leu nok acuk dati.”

³¹Lene Yakub ndat kep mbigom kin bu bipai “Suar aheng tut mungkun kei ug e.” Lene Yusuf heng tut mungkun kei leu api Yakub kuk no ei nibongti binggei sut Allah.