Read Hatam NITRITI 6 Bible Online

NITRITI 6 - Hatam bible

NITRITI 6

¹Tirigi po tungwatu nya idigek bikieng kep dihyei nisurti-nipekti hagom pima lene igyai ipmisop bat nya.

²Lene timiei gwamti nya ibou poi[8] ingat sop dima yok lo, sop di ubbu ningkom leu api iwak sop di ingon ngakei nya.

³Gima rino TUHAN pai “Misisindui sut ba, tungwatu nya igyaijo ninno bi. Suar ma yoni imai lewo yoni ne tungwatu di igyaijo ninno rin bi. Hon kep ammani kui lene ide njap nimangti ug ei ari bingwam sratus gom ningot can he ug api imai.”

⁴ Ei nijam dima kin nijam niabiati bu ne yo di yanjan ndig ngat ingat rin ei dihyeisi dini. Yo dini intun sop di iwak timiei gwamti pima yok him. Yo di yanjan ndig ngat dini inok pinjoi ndig nibon mun cig nya di inyeng jei bibor ei nijam gi nipou dima.

⁵ Tirigi TUHAN ngat lo, tungwatu dihyeisi dini yahagom imbuk bibor ba, ingon kanti titut yam kinei bibor kikau lene,

⁶ningon ngkwei leu gi po pai tes yok di kes yok bikieng kep dihyeisi pima ba, nso Nonti tut.

⁷Gima rino Noni pai “Siciu ser tungwatu di sipai tes nya bitut mindhe-ndhe nya kin ha nya hagom hak ug lewo singon ngkwei leu gi po sipai tes yok pima.”

⁸Noro Nuh pwoi TUHAN ningon.

⁹ Ayat dini yok pui sut Nuh kin niyai munti nya. Nuh ningon sren ba, nongkom ningon kwes kin Allah mem nijam dima. Allah kin Nuh ingon ce yam bi.

¹⁰Lene Nuh yai nipmot bat nya ibou ningai di inyeng Sem kin Yafet kin Ham.

¹¹Noro tungwatu nindigsi nya yahagom imbuk bibor ei Allah niyai him. Ibon munti di kinei bibor nya kieng kep dihyei nisurti-nipekti hagom.

¹²Lene Allah ngig niyai kep dihyeisi dini bingat lo, dihyeisi mpung tut mun di kinei lewo tungwatu nya yahagom ibon munti nya kinei bibor.

¹³Gima rino Noni pai bak Nuh “Dikos tut bipia midicok tut tungwatu nya yahagom. Lewo ibon munti di kinei nya kieng kep dihyei nisurti-nipekti hagom tu. Gima rino midicok tut yok bitut dihyeisi dini.

¹⁴Suar aba biei di nghai bibor bibon kibar di piar ei minyei ngwa dip. Lene ma akwas ninsi eisi lene aba aspal ngei bisigi ser ninggreti bei ninsi kin nisai cem hagom.

¹⁵Ma abon kibar nijeisi dem meter sratus gom ningot ningai ba, ningai lene ninyanti dem meter ningot can ba, can lene nanaisi dem meter simnaibrimigningai.

¹⁶Amie kibar ba, atu mihyeti nanaisi meter niken ei dring kin cau ikieti. Ma abon ninggre ningai di jo-jo yam dip leu api atu dimbou heisi ei nitta.

¹⁷Lewo dibindei ba, minyei su nindig bibor ba, ut kep dihyei ninjek dip hagom leu binhyepo kot mun di ninnei tau nuhwap nsi nya hagom. Mun nyeng hagom ei dihyeisi dini misar ug ri.

¹⁸Noro midipreu nipreu eisi gom mem na. Ma abuwak atnem kin apmot bat nya bitut itnem bat nya cem ba, jahagom jicoi ug ei kibar nsi.

¹⁹Suar ajem mindhe-ndhe nikre hi niwek hi ug ei kibar nsi leu binhyepo ingwes ngun bit je.

²⁰Mindhe-ndhe nya kin ha nya kin mun di srei ei dihyeisi nikre hi niwek hi bit leu ninyeng hagom minduk yam kwei ndam na leu binhyepo ingwes ngun leu minyei di misu nindig bibor dima.

²¹Suar anju njita bidem njita ninyeng hagom ei kibar nsi mem jenti kin mindhe-ndhe nya ba, jahagom jiyem kep.”

²² Lene Nuh yai mun nyeng hagom bit leu nok Allah nicuk noti.