Read Hatam NITRITI 7 Bible Online

NITRITI 7 - Hatam bible

NITRITI 7

¹Lene TUHAN pai bak Nuh “Dingat bou diyai him bipia nangkom ayai midyai bit leu dingon kanti. Gima rino ma nani kin ade ig bei nsi nya jahagom jicoi ug ei kibar nsi hak ug.

²Ma ajem mindhe-ndhe di map kui bi nya nikre ningut muhwindacan kin niwek ningut muhwindacan lo, gi hi di map kui su nya lene ma ajem nikre ningut gom kin niwek ningut gom he ug ei kibar nsi.

³Lene tut ha nya cem ma akrau ha cig nibo muhwindacan kin ha wek nibo muhwindacan ug ei kibar nsi. Leu binhyepo mindhe-ndhe nya kin ha nya ingwes ngun leu api idigek kep dihyei nisurti-nipekti hagom hanyen ei nidipti bu bit leu inyeng hagom.

⁴Lewo njap muhwindacan bu lene midibindei ba, mpia but mbras ug ei dihyeisi kikau mem mmun-njap ningot bitai apino mun di dipai tes nya hagom sar tut niyaisijo.”

⁵Lene Nuh yai mun nyeng hagom bit leu nok TUHAN nicuk noti.

⁶Tirigi Nuh de njap ug ei ari bingwam sratus muhwindagom lene minyei sindi ut kep dihyeisi.

⁷ Noni coi ug ei kibar nsi tut nitnem kin nipmot bat nya bitut itnem bat nya cem yahagom leu binhyepo ingwes ngun leu minyei di su nindig bibor.

⁸Ba, mindhe-ndhe di map kui bi nya kin gi map kui su nya kin ha nya kin mun di srei ei dihyeisi cem,

⁹nikre hi niwek hi induk yam kwei ndam Nuh leu api icoi ug ei kibar nsi bit leu nok Allah nicuk Nuhti.

¹⁰Ug ei njap muhwindacan pima rino minyei kindi su nindig bibor ba, ut kep dihyeisi.

¹¹ Hon kep tirigi Nuh de njap ug ei ari bingwam sratus muhwindagom mem bed gi nican ba, njap gi nisimnaimuhwidip brimigtehican lene minyei ei dihyei jou hagom kindi hei ba, ut kep dihyeisi leu api minyei ei mpia-bbed him nide dimbou cem hagom kau leu hak.

¹²Leu api mpia but mbras kikau mem mmun-njap ningot bitai.

¹³Ei njap gom ndia Nuh ya tut nitnem kin nipmot bat Sem kin Yafet kin Ham kin itnem bat nya cem bicoi ug ei kibar nsi.

¹⁴Ba, mindhe-ndhe di tungwatu nya ighyen kep kin gi hi di ibong bigbehei nya gi nindig kin nimien nya kin ha nya kin mun di srei ei dihyeisi hagom bidem mindhe-ndhe nyeng hagom icoi ug ei kibar nsi.

¹⁵Bikwop mun di ninnei tau nuhwap nsi nikre hi niwek hi bit leu mindhe-ndhe nyeng hagom icoi ug ei kibar nsi bit Nuh.

¹⁶Ba, hagom bit leu nok Allah nicuk Nuhti leu api TUHAN Nonti nggam mbou ei Nuh ninghim dip.

¹⁷Lene minyei kindi ut kep dihyei ninjek dip ba, ug ei njap ningot bitai pima rino kui bikon kibar bipiar ei minyei ngwa dip.

¹⁸Ba, minyei ut kikau bikui boom kep dihyei ninjek dip noro kibar no piar nyahan ei minyei ngwa dip.

¹⁹Leu api minyei kui kikau binjiriek nungug di jei bibor hagom ei dihyeisi dini.

²⁰Ba, nungug di jei bibor hagom sar ei minyei jou ba, minyei kui njiriek ninggramhim nya kikau bidem meter muhwindacan.

²¹Mun di niyaijo ei dihyeisi hagom mai bingwig. Bitut ha nya kin mindhe-ndhe nya kin tungwatu nya yahagom.

²²Mun di ninnei tau nuhwap nsi ei dihyeisi hagom sar bingwig.

²³TUHAN cok tut mun di niyaijo ei dihyeisi hagom tu. Nok tungwatu nya kin mindhe-ndhe nya kin ha nya hagom. Noro Nuh kin nide ig bei nsi nya yongkom ingwes ngun ei kibar nsi.

²⁴Lene minyei ut kep dihyei ninjek dip hagom kikau ug ei njap sratus gom ningot muhwi bisri bi.