Read Hatam NITRITI 8 Bible Online

NITRITI 8 - Hatam bible

NITRITI 8

¹Noro Allah yok ngon kep Nuh bitut mindhe-ndhe di ingat rin bit noni ei kibar nsi. Gima rino Noni bindei ba, hou kui minyei ngwa dip bibindei minyei sindi sri hanyen.

²Lene Allah bindei ba, minyei bousi nya ei dihyei jou biam bu bi ba, minyei ei mpia-bbed him nide dimbou nggam hanyen ser ba, mpia ngei.

³Leu api minyei sri nyahan ba, tirigi ug ei njap nitindur sratus gom ningot muhwi leu su lene minyei ngwa dip jo nai bu bi.

⁴Ug ei bed gi nimuhwindacan kin njap gi nisimnaimuhwidip brimigtehican leu api kibar tot mpia ei mbigdip gom ei nungug him Ararat.

⁵Minyei nyohou sri kikau ba, ug ei bed nisimnai ei njap nigom lene mbigdip nya tau ei nibreisi.

⁶Ug ei njap ningot bitai bu lene Nuh kau kendera mihyeti.

⁷Leu api kes miniwou ningut gom bimba. Miniwou dima dimba-dimba nyen bingkwei hanyen kwei ei kibar nsi bu bi. Noro dimba-dimba nyen kikau bibou minyei pingge leu dihyeisi ug e.

⁸Lene miniwou dima ngkwei hanyen bi leu api Nuh kes hakimoi ningut gom bimba leu binhyepo nggok ser minyei nipingge leusi.

⁹Noro hakimoi dima ngat niteu eisi hi bi lewo dihyei ninjek dip bon ninggati hi bigyo. Gima rino noni ngkwei hanyen kwei ei kibar nsi leu api Nuh su ninda bikrau hanyen.

¹⁰Lene Nuh bet ningon mem njap muhwindacan bu leu api kes hakimoi dima bimba hanyen.

¹¹Mmunti lene hakimoi dima ngkwei hanyen kwei ndam Nuh bikot biei zaitun nimeng di ngig-ngun ei nihwakti. Gima rino Nuh kan tut bipia minyei sri hanyen leu dihyei ninjek dip tu.

¹²Lene noni bet ningon ei njap muhwindacan bu leu api kes hakimoi dima bimba hanyen lo, mba bihigom leu bingkwei hanyen kwei bu bi sren.

¹³Tirigi Nuh de njap ug ei ari bingwam sratus muhwindagom bigom mem bet gi nigom ba, njap gi nigom leu api minyei pingge leu dihyei ninjek dip. Lene noni nggek cau leu api put ser dihyeisi bingat lo, dihyei ngga hanyen tu.

¹⁴Ug ei bed gi nican ba, njap gi ningot can ba, muhwindacan lene dihyei ninjek dip hagom ngga kei.

¹⁵Lene Allah cuk Nuh,

¹⁶“Ma ahei sut atnem kin apmot bat nya bitut itnem bat nya leu kibar nsi.

¹⁷Ma akes ha nya kin mindhe-ndhe nindig nya kin nimien nya hagom bintek gimahap leu binhyepo yahagom ibep hanyen bidem inyeng bidigek kep mpia.”

¹⁸Gima rino Nuh hei sut nitnem kin nipmot bat nya bitut itnem bat nya leu kibar nsi.

¹⁹Lene mindhe-ndhe nya kin ha nya hagom yehei leu kibar nsi bu bibon nimpung nya bidem inyeng hanyen.

²⁰Lene Nuh dingug tig nindig bijo-jo yam dip bibingon nok nimbar hum dok leu api bui mindhe-ndhe kin ha di map kui bi nya hi gom hi gom bidigo leu api ndig hagom bak TUHAN eisi.

²¹Lene mikwau di noni ndig dima ngge kei bipwoi TUHAN ningon leu api TUHAN kan “Midimbriom dihyei drek dip tungwatu nya igyai munti nya bu bi sren. Dikan tut bipia tungwatu nya ikan-kan nyenti kinei bibor habiei ipilei kwei su. Midicok tut mun di ninnei tau nuhwap nsi nya bit leu nok gi po dicok tut yok pima bu bi sren.

²²Tirigi dihyei jo nijoti kikau ug bipek ningwig honti lene mibon nituti mem tungwatu nya igyai miai cem igyai njita ba, bon nituti mem mpia mmou kin mpia wam kin bed di biang mpia ngei kin bed di biang biget kin mpia njap kin mpia mmun hagom.”