Read Hatam SAMUEL GI NICAN 1 Bible Online

SAMUEL GI NICAN 1 - Hatam bible

SAMUEL GI NICAN 1

¹Niabiati Saul mai leu su lene Daud kwei hanyen leu gi kon pran bit mben Amalek di icut bak noni leu api noni bong ei Ziklag mem njap can.

²Njap di hyep bu lene pinjoi pilei gom tau kwei leu tentara Saul ide prak meng yati. Noni bindei ba, nide sinsun rik-ta bikes dihyei ndung ei nibou nggram him nok bindo tut ningon di ngguk bibor. Noni kwei ngat Daud lene kuk no biba ningwak bikik dihyei ei nimig him.

³Lene Daud hig ser noni “Akwei leu hantou i?” Leu api no dima buhup “Dingwes ngun leu tentara Israel ide prak meng yati.”

⁴Lene Daud pai binoni “Ma apui sut mun di cut igkep tentara pima yok bida.” Leu api noni buhup “Side tentara inang bingwig leu pran di ikon bit side siceu apino sisut bat tentara nya imang bibor itug midut bitut Saul kin nipmot Yonatan cem ba, yahagom imai su.”

⁵Lene Daud hig ser noni “Notou akan tut bipia Saul kin Yonatan imai su i?”

⁶ Leu api noni buhup “Andigpoi e, mpe dima lene dingat rin ei Nungug Gilboa bidingat lo, Saul ya birok kui nide micim leu api siceu ide kroba pran kin tentara di ibri kuda idideu mem gima igyon ttai mem gima ihwen noni.

⁷Leu api noni kiek no bingat da leu api hig da lene dibuhup ‘Andigpoi e, mindei i?’

⁸Noni hig ser da tut dinyeng leu api dibuhup bipia ditimieisi leu Amalek.

⁹Leu api noni cuk da bipai ‘Akwei yai nimai bida hak ug lewo dibok buhun bibor ba, diduhug-duhug nyen lo, dimai hak bi.’

¹⁰Gima rino dibipbur ba, diyai nimai binoni hak ug lewo dikan tut bipia gino nibok bindei ba, cut ug ei dihyeisi lene mikiju hanyen lo, mitug ndei nimai. Lene dicug nide topi nibou ndig leu nibou cem dijuk siban leu ninda cem bidipwoi kwei mem na di Andigpoi a.”

¹¹Lene Daud kin yo di igya kui noni irik ide sinsun lewo yahagom ingon ngguk nindig bibor.

¹²Yahagom ipim ba, igyai nggwei kibor ba, ingon ngguk bibor cem bigyem njita bi mem nituti poi drek dip Saul kin Yonatan kin TUHAN de limwa di tentara Israel po ikon pran lo, imai bingwig pima kikau bimmun kep.

¹³Lene Daud hig ser pinjoi pilei di kwei pui sut Saul nimaisi dima “Atimieisi leu hantou i?” Leu api noni buhup “Andigpoi e, dani mben Amalek noro dibong dingkiaisi bit je di mben Israel.”

¹⁴Lene Daud pai kep “Nggon rino abrim angkek dino ayai nimai bak nibou ndig di TUHAN ta i?”

¹⁵Lene Daud hig nisut gom kwei ba, cuk “Ayai nimai bak no dini!” Leu api no dima ba ninda buhun bitot pinjoi pilei mben Amalek dima bimai hak ug.

¹⁶Daud pai kep noni “Apai ei ahui him bipia ayai nimai bak nibou ndig di TUHAN ta ei su apino angon mui bitig dino abiang ayai munti nibuhunti.”

¹⁷Gima ngwig lene Daud ba doia biwim Saul kin Yonatan imaisi,

¹⁸ leu api cuk Yehuda nya leu binhyepo ingginau yam tut doia dini. (Ipas kep doia dini ei Srat Yasarti.)

¹⁹“Je di mben Israel e, ide pinjoi pilei di mimbri kui ingkek di ikon pran kan kin ide nibou pran nya icut bimai ei nungug him dinyo ug tu.

²⁰Ma jitri tut nihyet dini bak mben Gat ba, jahap jiji tut kak simpak nya ei Askelon au. Ma jibindei sop Filistin nya ingon llei bibor ba, sindig di intun yo di igwam Allah ninghim nya him imbos-hi-mbos au.

²¹We, Nungug Gilboa e, jingig jitingou mem dihyet. Handei kon ba, mpia but ba, nggou llet ei jide mbigdip nya au. Handei kon ba, jide beisi nya hagom nok iggum ndigsi. Lewo yo di mimbri kui ingkek di ikon pran kan nya ide mun di ibipukep ser tibor ninggwenti nya hagom kroi ei sirima. Prab yem Saul de mun di bipukep ser tibor ninggwenti nya ei sirima ba, hi ba mini bidip bu bi.

²²Yonatan de hampiap sindem bibindei ba, imang bibor imai su. Saul de simeda cem kan tut ningondut tungwatu nyati bi. Yo cin dini ihwen ide siceu nya bingwig.

²³Saul kin Yonatan e, jisingat ba, ningon ngakei je. Jiya kui yam mem nijam di jiyaijo kin njap di jimai cem. Jahacem jidwop juk sindem bibor dor njiriek hacam krubri nya ba, jide nisindemti nindig bibor dor njiriek mindhe singa.

²⁴Sop Israel jen, ma jipim kui jei sut jide nibou ndig Saul! Noni ribindei dino jijuk jide sinsun ngwoi di sieng kei lene jiba tig permata kin mas bimau jenti a.

²⁵Ide tentara di mimbri kui ingkek icut bak ide siceu nya ei mpia di ikon pran bit yam eisi bimai su. Yonatan ningut bong kimus binggicai ba, kroi ei nungug tou di ha he bong tu.

²⁶We, dikindig Yonatan e, dingon ngguk bram na ba, singon ce yam bi nindig bibor. Ade ningon ngakei dati mindur bibor dor njiriek sop nya ide ningon ngakei ijjep bat nya kin imunggwom bat nyati.

²⁷Ide tentara di mimbri kui ingkek icut bak ide siceu nya ba, ide minggwen nya pror ningwig leu yok.”