Read Hatam SAMUEL GI NICAN 10 Bible Online

SAMUEL GI NICAN 10 - Hatam bible

SAMUEL GI NICAN 10

¹Nituti poi bu lene Nahas di nibou ndig Amon mai leu api nipmot Hanun kui biya luei nohoti bu.

²Lene Nibou Ndig Daud kan “Nahas ne sisut di ningon gom ri. Gima rino suar sijem sisut bit nipmot Hanun cem.” Lene noni pinak nide tentara nya ibou poi ug ei minu Amon leu binhyepo igwam ser Hanun ningon di ngguk tut nicig nimaisi.

³Tirigi yo dima yuug krau Amon lene nibou nya ei minu dima ipai bak Nibou Ndig Hanun “Na di Anyeng Jei e, akan bipia Daud ba ningon di ngguk bipinak yo dini kwei drek dip Na di Anyeng Jei acig nimaisi e? E bi! Daud pinak yok kwei nok yo di igyok itta kep minu igkei nya ba, ikwei yok igyai kep minu ndig dini leu api noni mibindei timek nye leu ba, yai minu dini biyati ri.”

⁴Ipingok ningonti nok apino Hanun kat yo di Daud pinak yok kwei pima ba, kak yuhui nta nite hi leu lene kos ide sinsun leu yok bijo sur intig bou leu api cuk yok bingkwei hanyen hak ug.

⁵Noro yo dima immai sut gima ingkwei hanyen ug ei ide ig. Tirigi hi pai sut mun di cut igkep yok dima bak Daud lene noni sok nihyet mem yo po pinak yok ug pima leu binhyepo ikwei bong hak ei minu ndig Yerikho bibou yuhui nta dima hei bijei hanyen ug e.

⁶Apino mben Amon ingon huk niti bipia igyai munti dima bindei ba, Daud ningon sibui sut yok. Gima rino ingot kep tentara Siria nya di ibong ei Bet-Rehob kin Zoba ibou sribu nyatungwagom kin tentara nya di ibong ei Tob ibou sribu simnaibrimigcan kin nibou ndig minu Maakha bitut nide tentara nya ibou sribu gom cem.

⁷Tirigi Daud miap tut ide niyok ingon gomti dima lene cuk Yoab ba, njei sut nide tentara yahagom biyuug kon pran bit nide siceu dima yok.

⁸Lene nibou tentara Amon nya yehei ba, inyohou dimig ide nimpung nya mem gima igya ser dimbou pmem minu ndig Raba nuhuigya. Raba ne ide minu ndig nibousi mem hanjop Amon nisurti-nipekti ri. Lene tentara Siria kin Tob kin Maakha idimig ide nimpung nya bigya ser ngoi dumti di gahai minu ndig Raba.

⁹Yoab ngat lo, siceu injei bisigi ser no ei nite bei noho bei kin ninghim tu. Gima rino noni dimig tentara Israel di mimbri kui ingkek nya leu binhyepo iba yoho rok tentara Siria nya.

¹⁰Lene noni kes tentara nindigsi nya bak nikinjoi Abisai ba, dimig yok leu binhyepo iba yoho rok tentara Amon nya.

¹¹Lene Yoab pai bak nikijoi “Gino dihwen tentara Siria lo, ide nisindemti om kep da lene ma akwei mpu da. Nok gima cem gino ahwen tentara Amon nya lo, ide nisindemti om kep na lene midihwou mpu na.

¹²Akwei ba, siba mimbri di kui singkek biya ngkiem! Sikon pran gau side mben Israel kin side Allah de minu ndig nya cem. Nna ba TUHAN mibon mun bit leu Nonti ningon kanti hak ug.”

¹³Lene Yoab ya tut nide tentara nya ikiju bikon pran bit yok apino tentara Siria nya ikiju binang leu ei Yoab nya yoho bei.

¹⁴Tirigi mben Amon ingat lo, tentara Siria nya inang leu siceu yoho bei tu lene yoni cem inang leu Abisai nya yoho bei ba, itti kep inghim dip hanyen ug ei minu ndig nsi. Tirigi Yoab bindei timek tentara Amon leu su lene ngkwei hanyen ug ei minu ndig Yerusalem.

¹⁵Mben Siria ikan tut bipia mben Israel ibindei timek yok tu. Gima rino induk ide tentara nya yahagom bidem yam hanyen bu.

¹⁶Leu api Nibou Ndig Hadadezer cuk tungwatu nya bijem tentara Siria di ibong ei Minyei Efrat nite bei mpia nipriti kwei. Lene Sobakh leu Zoba di Hadadezer de nibou tentara ya tut yok ba, yuug ei minu mien Helam.

¹⁷Hammi tirigi Daud miap tut gima rino nduk tentara Israel yahagom bidem yam. Leu api injei bisigon Minyei Yordan biyuug dihip ei nite hi haninyai ba, yuug ei Helam. Mben Siria idimig ide tentara nya ei sirima leu api injei bicut igkep Daud de tentara nya.

¹⁸Noro mben Israel ihwen yok ba, tentara Siria nya isujou leu yoho bei ug. Lene Daud ya tut nide tentara nya ba, ihwen tentara di ikrau kroba pran kan ibou sratus muhwindacan bimai ba, tentara di ikui kuda kan nya ibou sribu nyatungwacan cem imai. Siceu ide nibou pran Sobakh cem bok buhun apino mai ei pran dimati.

¹⁹Tirigi nibou ndig nya di Hadadezer ninyeng tak kep yok pima ingat lo, tentara Israel ibindei timek yok tu lene yahara mem leu binhyepo ikrau yam nda ser. Leu api mben Israel inyeng tak kep yok. Hon kep gima kui lene tentara Siria ibrim ingkek bimpu tentara Amon bu bi.