Read Hatam SAMUEL GI NICAN 15 Bible Online

SAMUEL GI NICAN 15 - Hatam bible

SAMUEL GI NICAN 15

¹Jei bi lene Absalom tin ei kroba pran gom kin kuda di mibrim tut mem nonti ba, nduk nide tentara ibou ningot muhwi di igya kui noni cem.

²Noni kiju mem njap tekti buug ya simpak dideu nibou ndig de ig nide dimbou pmem. Noni pigo tungwa gom-gom di kwei mbrap bit nibou ndig tut nide munhyet lene hig ser tut nikwei leusi cem. Gino no dima buhup tut keret di noni ntun him lene,

³Absalom pai binoni “Dwai, gino sibinai sut nicukti di jo kep lene jo nibreisi bipia angon ngun. Noro aye! Nikei di mimbus angonti tut munhyet dima ningat rin bi.”

⁴Lene Absalom binut bu “Gino ita da nok nikei lene tungwa tou rino mikwei mbrap tut nide munhyet mikwei ngat dani leu api midiba dingon di sren bibon noni nok igbit.”

⁵Mpe dino tungwa hi mikuk no ei Absalom nimig him lene Absalom misu ninda binggriou lene mei ningyoi.

⁶Lene Absalom yai igbit niyai kepti dima tut bikwop mben Israel di ikwei mbrap bit nibou ndig tut ide munhyet yahagom. Tug hon nisinati dima lene noni bindei ba, yahagom itti kin noni.

⁷Ari bingwam nitindur bitai bu lene Absalom pai bak Nibou Ndig Daud “Andigpoi e, ma asindui sut ba, duug ei Hebron leu binhyepo diyai mun igbit leu nok dipreu ei mem TUHANti.

⁸Tirigi dibong ei Gesur ei hanjop Siria pima lene dipreu ei mem TUHAN bipia gino Noni sindui sut ba, dingkwei hanyen ei minu ndig Yerusalem lene midikuk da bak bidinggei sut Noni ei Hebron.”

⁹Lene nibou ndig ce bipai “Angon jo nyahan ba, aug hak ug.” Gima rino Absalom ug ei Hebron.

¹⁰Noro noni sok nihyet bak keret Israel nindigsi nya bipai biyok “Tirigi jimiap pun mbrei tibim lene ma jahagom jimbos-hi-mbos bijipai ‘Absalom ne nibou ndig mem mben Israel ei Hebron ri!’ ”

¹¹Ibou sratus can yehei sut Absalom ba, igya kui noni kikau ug ei Hebron noro iba ingon di kwes bibit lewo ikan tut gima Absalom miyok ningon gom mem gima ham nimbuk kep Nibou Ndig Daud bi.

¹²Tirigi Absalom bon midut nindig mindhe titut kep humti lene sok nihyet bak Ahitofel di bong ei Gilo bikwei ngat noni. No dini ningon ki biya kui Nibou Ndig Daud bipingok ningonti. Apino ide ningon gom mem yaham imbuk kep nibou ndig dimati kum ei nisindemti bu ba, yo di itti kin Absalom bigya kui noni imangti kum eisi bibor.

¹³Lene tungwagom kwei pai nibimbiti tut Absalom bak Daud bipia mben Israel itti kin Absalom tu.

¹⁴Lene Daud pai bak yo di igya kui noni ei minu ndig Yerusalem “Suar nyeni yahagom ibipbur ba, inang nogindini leu binhyepo ingwes ngun leu Absalom! Jibrim jimigya! Gi bi lene noni mahatap nye bihwen nye leu api miyai nimai bak timiei minu ndig Yerusalem yahagom ug ri!”

¹⁵Lene ibuhup “Andigpoi e, igbit ri. Nitin ei mem nibit acuk nyeti nya hagom.”

¹⁶Gima rino nibou ndig kin nide bat nya kin yo di igya kui noni yahagom inang leu minu ndig Yerusalem lo, noni kuk nitnem mien nya ibou simnai leu binhyepo inyohou nide ig nibou ndig dima.

¹⁷Tirigi nibou ndig kin nide limwa nya yahagom sindi yehei leu minu ndig Yerusalem lene igya hak ei ig di jo nohon keti.

¹⁸Lene nibou nya di igya kui Daud yahagom igya bit noni bibou tentara nimpung gom di igya ser nibou ndig injiriek yok ug e. Lene tentara ibou sratus muhwindagom di ibit Daud kwei leu Gat pima cem injiriek yok.

¹⁹Lene nibou ndig pai bak Itai di nok nibou pran di bie tut ibou sratus muhwindagom dima “Nggon rino abit nye i? Nna ba angkwei hanyen ba, aya tut nibou ndig nijep dima lewo nani ne na di ngkiai rin ba, akwei bong angkiaisi bit nye.

²⁰Akwei bong timiei bit nye mem nijam di jei bi. Gi mbun dibidip huk na leu binhyepo abong-bong nyen bit da kan bi. Lewo dikan tut minu di dinang ug eisi hi bi. Nna ba angkwei hanyen ba, abuwak asut bat di ade mben nya bibit na. Handei kon ba, TUHAN ngondut je ba, ningon gom tut je.”

²¹Noro Itai buhup “Andigpoi e, diba neheng bipai bina tug hon TUHAN ninyeng bipia mbro nok gino ditug midut lo, midibit na bidem ambutti nya hagom.”

²²Lene Daud pai “Kei bibor! Simbut ri!” Gima rino Itai kin nide bat nya yahagom ibit Daud kikau.

²³Lene timiei minu ndig Yerusalem nya yahagom ipim kui jei sut Daud kin nide limwa nya tirigi yehei leu minu ndig dima. Noni bie tut nide limwa nya ba, isigon Minyei Kidron biyuug dihip ei nite dima ug lene imbut kikau ug ei iggum ndigsi.

²⁴Imam Zadok kin Imam Abyatar kin keret Lewi yahagom ibit yok bikon TUHAN de Brua Gi Preu bimbut tut. Lene imam nya igya igyati bikes Brua Gi Preu ei dihyeisi bijo ei sirima kikau bibou timiei minu ndig Yerusalem yahagom inang bingwig leu minu ndig dima ug e.

²⁵Lene nibou ndig pai bak Zadok “Ma angkwei sut Brua Gi Preu hanyen ug ei nijoti. Gino TUHAN joi sut da lene Noni misindui sut ba, dikwei hanyen ei nidipti bu leu binhyepo diyok diyai kep brua dima kin mpia ttou nsi di joti.

²⁶Ne gino Noni joi sut da bi lene handei kon ba, Noni bibon da bit leu ningon kanti hak ug.”

²⁷Lene noni pai bak Zadok “Amiap e, ma apai hi pai apmot di Ahimaas kin Yonatan di Abyatar nipmot leu binhyepo jahagom jiba jingon di jo nyahan bingkwei hanyen ug ei minu ndig ug.

²⁸Midigwam dideu nisigon kep minyeisi ei iggum ndigsi bibou asok ahyet tut mun di pek kep mem je hwou bida ug e.”

²⁹Gima rino Zadok kin Abyatar ittei Brua Gi Preu bingkwei sut ug ei minu ndig Yerusalem bibong ei sirima.

³⁰Daud kwek nide srop leu nimig jou leu api noni kin nide limwa nya yahagom ikui ug ei Nungug Zaitun ba, igyai nggwei kibor. Lene iba ban binggai kep ibou nok bindo tut ingon di ngguk bibor.

³¹Tirigi Daud miap tut bipia Ahitofel tti kin Absalom tu lene noni ngat nadi bipai “TUHAN e, ma abindei ba, Ahitofel de nipingok Absalomti hagom pek kep au!”

³²Daud kui ug ei mbigdip dima ei mpia ttou nsi gom di tungwatu nya ikuk yok kigkep bak TUHAN eisi tu lene nisut Husai di mben Arki di Daud ba ningon com ya um noni ei sirima. Nide sinsun rik-ta ba, dihyei ndung hi jo ei nibou nggram him.

³³Leu api Daud pai bak “Gino abit da lene gi mbun ampu da kan bi.

³⁴Ne gino angkwei hanyen ug ei minu ndig Yerusalem ba, aubon nanti nok awak di ningon gom tut Absalom bit leu nok angon gom tut nicig lene gima mimpu da nindig bibor lewo bon nituti mem gima abindei ba, Ahitofel de nipingok Absalomti hagom pek kep bi.

³⁵Imam Zadok kin Imam Abyatar ingat rin ei minu ndig Yerusalem. Ma ambot kep tut mun di amiap tut ei nibou ndig de ig hagom biyok.

³⁶Imam cin dima ipmot bat di Ahimaas kin Yonatan cem ingat rin bit icig bat cin a. Ma asok ahyet tut nihyet di tibim ei atingou nsi hagom ei yok dip leu api acuk yok kwei bimbot kep tut hagom bida.”

³⁷Gima rino Husai di Daud ningon kieti dima ngkwei hanyen ug ei minu ndig Yerusalem cut igbit Absalom nikwei krausi.