Read Hatam SAMUEL GI NICAN 16 Bible Online

SAMUEL GI NICAN 16 - Hatam bible

SAMUEL GI NICAN 16

¹ Daud njiriek mbigdip dima mbigom lene Ziba di Mefiboset de awak pima tau kep noni kros. Noni jem keledai ningut can di ibiang minai nya tut roti nindak sratus can kin biei ngat kismis naham sratus gom kin biei ngat nindigsi nya ningat sratus gom kin aigmui mindhe ngkek nindig gom di ba anggur ningei joti hagom kwei.

²Lene Nibou Ndig Daud hig ser noni “Apwoi mun dima yok hagom kwei mem mindei i?” Leu api Ziba buhup “Andigpoi e, dijem keledai nya kwei mem ade ig bei nsi nya bibri bigwam dip kin roti kin biei ngat nya mem yo di igya kui nani bigyem kep inggum kin ba anggur ningei mem jahagom jidut kep jinggobiausi tirigi jimbut-mbut nyen ei iggum ndigsi.”

³Lene nibou ndig hig ser noni “Mefiboset di aceu Saul nignyon pima bong tirigi tou i?” Lene Ziba buhup “Andigpoi e, no bong ei minu ndig Yerusalem lewo ba ningon com bipia mben Israel mita noni nok nibou ndig leu binhyepo ninyeng mitak kep yok biya luei nignyon Saul nohoti.”

⁴Lene nibou ndig pai bak Ziba “Dikos tut bipia hon kep ammani kui lene ndigban di Mefiboset nyeng tut nya hagom minok ade bu.” Leu api Ziba buhup “Andigpoi e, dijem sigyo nindig bibor bina. Handei kon ba, na di Andigpoi ajoi sut da kikau lewo dinok ade awak.”

⁵Tirigi Nibou Ndig Daud kwei krau Bahurim lene Simei di tig mbier tut Saul ba, nicig ninyeng Gera hei leu nide ig lene nihyet wer mpiahi tut Daud beheng ser noni kak simpak.

⁶Mbro nok gino Daud de nibou nya di igya kui noni kin nide tentara nya yahagom igya bikrop ttai noni lo, Simei yai tig bihwen yok.

⁷Ba, Simei heng ser Daud bipai “Aug bihigom! Aug bihigom! Ahwen nimbiam ba, ambuk bibor cem!

⁸Apos Saul de ninyeng tak kepti tu. Apino nogindini atug ndei hukum leu TUHAN drek dip gino ayai nimai bak Saul nide bat nya imang bibor tu. TUHAN kes anyeng tak kep ade limwa nya ei apmot di Absalom nindati tu. Ma amai hak ug drek dip gino ahwen nimbiam igkei a!”

⁹Lene Abisai di Yoab nikinjoi di Zeruya nipmot pai bak nibou ndig “Andigpoi e, nggon rino asindui sut no di sibut dima mbriom na i? Apai hak leu api midirop nitibou leu hak ei niyati dima!”

¹⁰Noro nibou ndig pai bak Abisai kin nikindig Yoab nya “Nok ug e. Ma jingon kui mem gi jiyai hukum bak au. Jisindui sut ba, noni mbriom da hak. Leu gino TUHAN bie tut noni nok lene tou ridem mem gima hig ser Noni tut i?”

¹¹Daud pai bak Abisai kin nibou nya di igya kui noni yahagom “Dipmot bungwam mem gima yai nimai bida. Nggon rino jinga leu sut no di ntun Benyamin him dini nimbriom dati i? TUHAN cuk noni bipia mbriom da. Ma jisindui sut noni ba, mbriom da hak ug.

¹²Mpaba TUHAN mingig niyai kep mun di buhun di cut igkep da dini leu api miyai gi kei bida biluei nide nimbriom dati dima e?”

¹³Gima rino Daud kin nide limwa nya imbut kikau lo, Simei jop bram yok bimbut nai puig ninghas him lene heng ser yok bikam tig nya kin dihyei ndung bibihwen yok kikau.

¹⁴Tirigi Daud nya yuug krau Minyei Yordan lene yahagom igwam kep inghuisi ei sirima lewo iwei nindig bibor tut mun di cut igkep yok kak puig sinon.

¹⁵Lene Absalom kin mben Israel di itti kin noni yahagom icoi kwei ei minu ndig Yerusalem ba, Ahitofel cem bit yok.

¹⁶Tirigi Husai po Daud ningon kieti di ba ningon com pima ya um Absalom lene noni ba nihyet nindig bibor bahara “Nibou ndig e, ma ayaijo ninno ug o! Nibou ndig e, ma ayaijo ninno ug o!”

¹⁷Lene Absalom hig ser noni “Nggon rino angon gom tut Daud di angon kieti pima bu bi i? Nggon rino atti kin noni bi i?”

¹⁸Lene Husai buhup “Andigpoi e, gi mbun ditti kin noni bi. Suar ditti kin nibou ndig di TUHAN kin ade limwa dini yok kin mben Israel yahagom ita ei su. Gima rino midiya kui na di Andigpoi.

¹⁹Gino duubon da nok awak mem na di Andigpoi di nok diceu nipmot bi lene midinok awak mem tou bu i? Nogindini midiya kui na di Andigpoi bidinok ade awak bit leu nok diya kui acig bidinok nide awak nipou su.”

²⁰Lene Absalom kiek no bingat Ahitofel bipai binoni “Nogindini ikwei krau su. Apingok nye tut igyaisi.”

²¹Gima rino Ahitofel buhup “Nogindini abipbur ba, ayem njita tut acig nitnem mien nya po noni kes yok ei mem gima inyohou nide ig nibou ndig pima. Tug hon nisinati dima lene mijo nibreisi mem mben Israel yahagom bipia abindei ba, acig jeni jiba nitok biyam. Apino yo di ibit na yahagom migyai nisindemti mem gima ibrim ingkek.”

²² Gima rino Absalom de awak nya yohok prak meng gom ei ig nibou ndig de ig bou ninjek dip leu api Absalom yem njita tut nicig nitnem mien nya yahagom sindam bou mben Israel yahagom igyai him.

²³Ei nijam dima ne Absalom nya igyai hagom bit leu nok Ahitofel nipingok yokti lewo iba ingon srip huk bipia nipingok yokti dima tibim kwei leu Allah niji him. Daud kin Absalom yahacem ibit Ahitofel nipingok yoti.