Read Hatam SAMUEL GI NICAN 17 Bible Online

SAMUEL GI NICAN 17 - Hatam bible

SAMUEL GI NICAN 17

¹Jei bi lene Ahitofel pai bak Absalom “Ma asindui sut da ba, dinduk tentara ibou sribu simnaibrimigcan kwei leu binhyepo dibuhuk bram Daud himmun di ariman.

²Midicut igkep noni tirigi ninghuisi wei ba, ningon buhun yo leu api midibindei bidigit tut. Lene nide limwa nya yahagom minang bingwig leu noni. Midiyai nimai bak nibou ndig nongkom.

³Leu api midinduk nide limwa nya yahagom bingkwei hanyen dem kep nok sop pilei di ngkwei hanyen ndam pinai pilei di sindi wak noni. Gino dingon kiowi tut bi lene dikan bipia na di Andigpoi ajoi sut gi ayai nimai bak tungwagom ngat he. Lene nindigsi nya imai bi noro iba ingwes ngun bikwei hanyen.”

⁴Lene Absalom kin nibou Israel nindigsi nya yahagom ice tut Ahitofel nipingok yoti.

⁵Mbro nok gima lo, Absalom pai biyok “Nogindini ma jibuwak Husai kwei leu binhyepo imiap tut nide nipingok nyeti cem ug e.”

⁶Tirigi Husai kwei lene Absalom ndat kep Ahitofel nipingok noti hagom bak bihig ser noni “Nibit Ahitofel nipingok nyeti e, he bi e? Gi bi lene ma apai igbit ade nipingok nyeti hak ug.”

⁷Lene Husai buhup “Ahitofel nipingok jeti dima ne kei bi.

⁸Jikan tut bipia acig di Daud kin nide tentara nya iba mimbri di kui ingkek bikon pran sindem bibor. Yoni idem kep nok mindhe beruang niwek di sindi bep nipmot lo, hi mbrai leu noni. Acig nok tentara di ningon ki ba, bong bit nide limwa nya mem mmun bi.

⁹Mpaba nogindini noni ku no ei hak mihyeti e, he mpia ttou nsi hiter bu e? Tirigi noni kin nide limwa nya ihwen ade tentara rino tungwatu nya di imiap tut mitri tut bipia ade tentara icut bak noni tu.

¹⁰Mpe dima lene mbro nok gino mimbri kui ade tentara ingkek ba, isindem bibor dor njiriek mindhe singa lo, yoni mittin tut noni lewo mben Israel yahagom ikan tut bipia mimbri kui nibou ndig ningkek bikon pran kan ba, nide tentara nya yahagom ihwen ide siceu nya sindem bibor cem.

¹¹Andigpoi e, ditde nipingok angonti rinok gini. Anduk ade limwa di mben Israel yahagom kwei leu dihyei nisurti-nipekti. Imangti midem kep iggum di jo muk nipimat nimangti. Lene ma na di Andigpoi abie tut yo di ikon pran.

¹²Nyeni minggok ser Daud kikau ug ei nigwam kepti leu api mihwen noni kros nipou tirigi noni ngat nye bigyo. Apino noni kin nide limwa nya micut bak nyeni bingwes ngun kan bi.

¹³Gino noni coi ug ei minu ndig hi biku no eisi lene side limwa nya iba kuk mbrei nya bibrim minu dima titut yam leu nikiou kikau ug bicut ei mbang briep di jo dideu ngug tig dima ba, tig gom mijo-jo yam dip ei mbigdip dima bu bi.”

¹⁴Lene Absalom kin mben Israel yahagom ibuhup “Husai nipingok nyeti kei bibor dor njiriek Ahitofel nipingok nyeti.” TUHAN kos tut bipia yo dima mice tut Ahitofel nipingok yokti di kei bibor dima bi leu binhyepo bindei ba, mun di buhun bibor micut igkep Absalom.

¹⁵Lene Husai mbot kep nipingok Absalom kin nibou mben Israelti kin Ahitofel nipingok yokti cem bak Imam Zadok kin Imam Abyatar.

¹⁶Bipai biyok “Ma jibipbur ba, jibinut dihyet dini bak Daud ser nhyema noni bong ei nisigon Minyei Yordanti mem mmun dini au. Noro suar noni sigon minyei ug ei iggum ndigsi leu binhyepo nide siceu nya mikat noni kin nide limwa nya bigyai nimai biyok bi.”

¹⁷Mpe dima lene Yonatan di Abyatar nipmot kin Ahimaas di Zadok nipmot iku yok nyahan ei minyei bousi di En-Rogel di jo minu ndig Yerusalem nitta lewo ibrim ingkek mem gima icoi kwei ei minu ndig dima bi leu binhyepo hi ngat yok bi. Lene sop awak gom kwei cem kep yok bikwop nituti hagom leu binhyepo mbot kep tut mun di pek kep ei minu ndig dima biyok leu api yoni yuug tri tut hanyen bak Nibou Ndig Daud.

¹⁸Noro jei bi lene pinai pilei gom ngat yok lene ug pai sut yok bak Absalom. Gima rino yo cin pima ibipbur binang ba, iku yok nyahan ei timiei Bahurim gom nide ig. Jui minyei bousi di jut bibor gom jo ei nide biyati. Gima rino yo cin dima ijuk ug ei nijou.

¹⁹Lene no dima nitnem kieng minghas nimeng gom bingig kep jui dima nuhui bidis gandum-barli ningan eisi ser nhyema hi ngat minyei bousi dima igbit bi.

²⁰Lene nibou di igya kui Absalom ibou poi ikwei krau ig dima bihig ser sop dima “Ahimaas kin Yonatan iku yok ei siritou i?” Lene noni buhup “Yahacem isigon minyei tu.” Nibou dima yok inggok-nggok nyen yo cin pima noro ingat yok bi. Gima rino ingkwei hanyen ug ei minu ndig Yerusalem.

²¹Tirigi imbut leu su lene Ahimaas kin Yonatan yehei leu jui nsi dima biyuug ngat Nibou Ndig Daud. Lene indat kep Ahitofel nipingok Absalomti bak Daud bisok kep noni “Andigpoi e, ma abipbur ba, asigon minyei haninyai!”

²²Gima rino Daud kin nide limwa nya iba mmun dima bisigon Minyei Yordan biyuug dihip ei nite dima ug mem mpia tekti.

²³Tirigi jo nibreisi mem Ahitofel bipia Absalom bit nipingok noti pima bi lene noni tin ei nide keledai bibri bingkwei hanyen ug ei nitimieisi. Noni nyohou dimig nide mun di nyeng tut nya hagom biput tu lene ba kuk bisrou nonti nikimam bimai. Lene itig simiak nide bat nya ijui nya.

²⁴Tirigi Daud nang ba, ug krau Mahanaim lene Absalom kin mben Israel isigon Minyei Yordan. (

²⁵Absalom ta Amasa nok nibou pran biya luei Yoab nohoti tu. Amasa nicig ninyeng Yitra di mben Ismael lo, nipmem ninyeng Abigail di nicig ninyeng Nahas ba, nikindig ninyeng Zeruya. Zeruya ne Yoab nipmem ri.)

²⁶Lene Absalom kin nide limwa nya yohok ide prak meng yati ei hanjop Gilead.

²⁷Tirigi Daud ug krau Mahanaim lene Sobi di Nahas nipmot di kwei leu minu ndig Raba ei Amon kin Makhir di Amiel nipmot di kwei leu Lodebar kin Barzilai di kwei leu Rogelim ei Gilead yahagom igya um noni.

²⁸Ba, ikwei sut ban dut nya kin bokor nya kin dibijig nya kin gandum kin gandum jelai kin tepun kin trem ngkiem di ikang ei su kin kiju ngwoi nimien kin nindig,

²⁹kin ahwei lon ningei kin njita keju kin sapi do ngei nintan nidip ba, ijem ide domba nya ningut poi cem bikwei sut. Igyai hagom nok lewo ikan tut bipia Daud kin nide limwa nya minggum ba, minggobiau cem ba, inghuisi wei tirigi imbut-mbut nyen ei iggum ndigsi.