Read Hatam SAMUEL GI NICAN 18 Bible Online

SAMUEL GI NICAN 18 - Hatam bible

SAMUEL GI NICAN 18

¹Lene Nibou Ndig Daud nduk nide tentara yahagom kwei bikwas yok ba, nimpung gom imangti ibou sribu gom igya kui yam lene ibou sratus gom igya kui yam bibikwop nok. Leu api noni ta nibou pran nya bibikwop nimpung nya hagom.

²Lene noni kwas yok ei nimpung ningai ba, Yoab bie tut nimpung gom lene Yoab nikinjoi Abisai bie tut nimpung gom lene Itai di mben Gat pima bie tut nimpung gom. Leu api nibou ndig pai biyok “Dani cem midibit je.”

³Noro ibuhup “Andigpoi e, ma abit nye au. Gino nye di tentara nicut bak yoni ba, ninang leu yok cem nimang nitug ndei nimai cem lo, ide siceu nya mingon cut hon bi lewo ikos tut bipia migyai nimai bak na di Andigpoi lewo abon anyeng bou yo dima igyai him ba, nangkom noyam kin nye di tentara nibou sribu simnai. Nna ba atum angon ei minu ndig. Gino nisuar mun di nibikon pran hi kin bu lene apinak gima hwou binye.”

⁴Lene nibou ndig buhup “Igbit ri. Midiyai hagom bit leu jingon kanti.” Lene noni ya kui dimbou heisi tirigi nide limwa nya inyohou mbus yam ei nimpung nya ibou sribu gom kin ibou sratus gom ba, ikinyon ei ide nimbut bikon pranti.

⁵Noni sok kep Yoab kin Abisai kin Itai bingkiem ser bipai “Gino jingondut da lene ma jiba jimbuk bibon dipmot Absalom au.” Lene nisok kep nibou pran nyati dima tibim kikau ug ei tentara nya yahagom itingou nsi.

⁶Lene Daud de tentara imbut ug ei susti bikon pran bit tentara Israel ei Bigbehei Efraim.

⁷Apino tentara Israel ibou sribu ningot can icut bibor bak Daud de limwa nya bimai bingwig ei njap gom ngat dima.

⁸Pran dima kieng kep hanjop dima nisurti-nipekti hagom apino yo di itug ndei nimai ei bigbehei di dimbun kei dima imangti nindig dor njiriek gi hi di itug ndei nimai ei mpia di ikon pran eisi.

⁹Tirigi Absalom bri nide bagal bigwam dip binang leu siceu nya lene um Daud de limwa nya ibou poi kros. Lene bagal dima dor tut noni kikau ug ei biei nindig gom nibehei. Apino Absalom nibou kinai biei nggramti lene keledai dima dor kikau bikes noni ei leu api Absalom ndun bet ei.

¹⁰Daud de tentara hi ngat Absalom bipai bak Yoab “Andigpoi e, nogindi pa dingat Absalom di kinai ei biei ndig ninggramti bindun bet ei!”

¹¹Lene Yoab buhup “Apai mindei i! Angat noni tu e? Nggon rino ayai nimai bak hak ug bi i? Gino ayai nimai bak hak lene midiyai mitiei perak nitig simnai kin bang nibikri kep nintig bou gom cem bina.”

¹²Noro no dima buhup “Mbro nok gino ayai mitiei perak nitig sribu gom bida lo, midingget nibou ndig nipmot dima bi sren. Lewo nahagom nimiap nibou ndig nicuk nani kin Abisai Itai nyati tu bipia gino jingondut noni lene ma jiba jimbuk biyai nipmot Absalom au.

¹³Gino ditunggwei sut nibou ndig nicuk nyeti bidiyai nimai bak Absalom lene jei bi nibou ndig mikan tut lewo nitingou dile. Lene dikan tut bipia akou sut gima ambrap gau da.”

¹⁴Lene Yoab pai “Cobi! Sisimbot kep biyam tut gini nok gi dem tu!” Lene noni yai nide micim ningat ningai buug dat Absalom ningget mbiningai bram yam tirigi Absalom kinai ei biei nggramti bindun bet ei biniyaisi jo yo.

¹⁵Lene tentara Yoab ibou simnai bu injei bihwen Absalom drok him bu ba, ibiyai nimai bak.

¹⁶Lene Yoab miep pun mbrei leu api nide limwa nya ikes hon bikon pran bit tentara Israel bu bi.

¹⁷Lene nide limwa nya icug Absalom ningut binjei ug ei jui nsi di jut bibor ei bigbehei pima leu api idingug tig mang bibor bijo-jo yam dip ser nuhuigya. Lene tentara Israel pima yok yahagom inang bingkwei hanyen ug ei itimieisi.

¹⁸Tirigi po Absalom niyaisi jo yo pima lene noni bindei ba, tungwatu nya ibon tig nibiyok ngon kep noni di nindig bibor ei Mbang Briep Nibou Ndig lewo noni yai nipmot di miba nokep nicig ninyeng hi bi. Noni jem tig dima ninyeng noyam kin nonti ninyenga. Gima rino tungwatu nya itri tut bipia Tig dima ne Tig Absalom rin kikau kwei bipek ammani kep.

¹⁹Lene Ahimaas di Zadok nipmot pai bak Yoab “Andigpoi e, ma asindui sut da bididor biduug ngat nibou ndig leu binhyepo dipai sut nihyet di kei dini binoni lewo TUHAN teu noni ba, ningwes ngun leu nide siceu nya indati tu.”

²⁰Noro Yoab buhup “E bi! Disindui sut nani ba, ambut tut nihyet di kei dima ammani bi. Mpe hi bu lene midisindui sut na noro njap di ammani ne bi lewo nibou ndig nipmot mai su.”

²¹Lene noni pai bak nide awak di mben Sudan “Ma aug tri tut mun di angat bou ayai him hagom bak nibou ndig.” Lene awak dima om no leu Yoab leu api mbut.

²²Noro Ahimaas bidip huk Yoab bipai “Mun di mipek kep mem da bon ninyeng mem da bi! Ma asindui sut dani cem ba, duug tri tut nihyet di kei dima bak nibou ndig.” Lene Yoab hig ser noni “Dipmot ndia ug o, nggon rino nani cem ampig bou mem gima ambut i? Leu mporo ma atug ndei amuhup drek dip bi.”

²³Lene Ahimaas buhup “Nok ug e! Dimbut ri!” Gima rino Yoab pai binoni “Nnaba aug hak ug.” Lene Ahimaas dor kak puig di mbut Mbang Briep Yordan bahatap awak pima lene dor sindem binjiriek noni.

²⁴Mpe dima lene Daud no gwam ei mpia ttou nsi gom di jo ei dimbou hui kin dimbou heisi nikieti ei ngug tig di bikrop ttai minu dima nikiou. Lene no di ya ser dimbou hui kui ug ei ngug tig dima ninjek dip biya anai dimbou huigya. Tirigi noni cap ser minu dima lene ngat lo, tungwagom ngat dor kwei.

²⁵Lene pai sut bak nibou ndig. Leu api nibou ndig pai “Gino no dima dor binongkom lene gima nok mun di bindo bipia noni kwei tri tut nihyet di kei bibor binye ri.” No dima dor dideu kwei su lene,

²⁶no di ya ser pima ngat lo, tungwagom bu dor kwei bibram bu. Lene noni ba nihyet nindig bipai “Angat i! Tungawagom bu rino dor bram bu kwei a.” Lene nibou ndig buhup “No dima cem kwei sut nihyet di kei bibor ri.”

²⁷Lene no di ya ser pai “Dikan tut bipia no di bie dima ne Ahimaas rin lewo dingat igbit nidorti.” Lene nibou ndig buhup “Ahimaas ningon sren ba, mikwei sut nihyet di kei bibor ri.”

²⁸Ahimaas pigo nibou ndig lene kuk no biba ningwak bikik dihyei ei nimig him bipai binoni “Akwei ba, singgei sut TUHAN di nok na di Andigpoi ade Allah lewo Noni bindei ba, yo di yaham imbuk kep na di Andigpoi yahagom icut bak nyeni tu!”

²⁹Lene nibou ndig hig ser noni “Notou mem dipmot Absalom i? Noni nok gi kei e?” Lene Ahimaas buhup “Andigpoi e, nipou tirigi Yoab cuk da kwei bigyo lene dingat ibou poi di ighyet ngwig kep yam noro dingon kiowi tut mun dima yok.”

³⁰Lene nibou ndig cuk noni bipai “Ma aya ter ei sirinu mbigom ug e.” Leu api Ahimaas ug ya ei sirinu.

³¹Lene awak di mben Sudan sindi kwei krau bipai bak nibou ndig “Andigpoi e, dikwei sut nihyet di kei bibor! Njap di ammani TUHAN bindei ba, yo di ikiek imig jou tut na di Andigpoi yahagom icut bak nyeni tu!”

³²Lene nibou ndig hig ser noni “Notou mem dipmot Absalom i? Noni nok gi kei e?” Lene awak dima buhup “Andigpoi e, bit leu dingon kanti ne dingon kei sut gima ade siceu nya kin yo di ikiek imig jou tut na di Andigpoi yahagom ide mun di cut igkep yok noyam kin mun di cut igkep pinai pilei dima tu.”

³³Nibou ndig miap nihyet lene ningon ngguk nindig bibor. Noni kui ug ei nghim nsi di jo nai dimbou hui pima lene pim kui jei sut biniyai nggwei kibor nindig bibor. Tirigi noni kui lin lene pim ba, bikiek-kiek nyen bipai “Ayo dipmot ndia ug o! Dipmot Absalom o! Absalom dipmot ndia ug o! Gi kei rima danti dimai luei ahoti o! Dipmot Absalom dipmot ndia ug o!”