Read Hatam SAMUEL GI NICAN 19 Bible Online

SAMUEL GI NICAN 19 - Hatam bible

SAMUEL GI NICAN 19

¹Lene Yoab miap Nibou Ndig Daud ninghapti tut ningon di ngguk tut Absalom di pim biniyai nggwei kibor dima.

²Tirigi Daud de tentara di sindi ingon llei sut ide siceu nya di icut bak yoni pima imiap tut nibou ndig di ningon ngguk tut nipmot lene gima bindei ba, itta cut tut mem njap dima.

³Gima rino yahagom iba iimaisi di hai bingkwei hanyen ug ei minu ndig pima dem kep nok tentara di immai sut yonti tut gi inang leu ide siceu nya.

⁴Lene nibou ndig nggai ser niimaisi leu api ba nihyet nindig bahara “Ayo dipmot Absalom o! Absalom dipmot ndia ug o!”

⁵Lene Yoab ug ei nibou ndig de ig bisok kep noni “Andigpoi e, ade limwa nya iteu nani kin ade bat nya kin atnem bat nya kin atnem bat di nimien nya jahagom ba, jingwes ngun. Noro njap di ammani abinim kep ade limwa dima yok yahagom.

⁶Andigpoi e, ningat ne angondut yo di ingon mpo tut na lene angon mpo tut yo di ingondut na! Ando brei bak ade nibou pran nya kin ade tentara nya bipia yahagom ibon inyeng ei na di Andigpoi ayai him bi! Dikan tut bipia gino Absalom niyaisi jo mem njap di ammani lo, nyeni nahagom nimai lene na di Andigpoi angon llei bibor!

⁷Nogindini akiju ba, aug biwin kep ade limwa nya ingonti. Gi bi lene diba neheng bipai tug hon TUHAN ninyeng bipia yahagom mikes na di Andigpoi ei ba, minang bingwig mem mmun di ariman leu na ug ri. Gino mun di buhun dima cut igkep na di Andigpoi lene minok mun di buhun bibor dor njiriek mun nyeng nindigsi di micut igkep na di Andigpoi kikau ug bipek ayaijo ningwig honti.”

⁸Lene nibou ndig kiju buug ei nisai lene gwam nyahan kui dimbou hui ei minu ndig dima. Nide limwa nya imiap tut nibou ndig nikweisi leu api yahagom induk yam bingwig kep noni. Noro mben Israel pima yahagom inang bingwig ba, ingkwei hanyen ug ei itimieisi.

⁹Mpe dima lene yahagom iba ighyet bidahat yam bipai biyam “Nibou Ndig Daud teu nye bingwes ngun leu mben Filistin kin ide siceu nindigsi nya cem. Noro nogindini noni nang leu Absalom buug ei ningkiaisi tu.

¹⁰Nyeni ita Absalom nok ide nibou ndig lene noni ug bikon pran noro tug midut tu. Nggon rino tungwagom ug brim ningkek kep Nibou Ndig Daud bibuwak noni hanyen kwei bi i?”

¹¹Lene Nibou Ndig Daud miap tut mben Israel isimbot kep biyamti dima. Gima rino noni sok nihyet ei Imam Zadok kin Imam Abyatar dip bak nibou keret Yehuda nya bihig ser yok “Nggon rino jibon jenti nok yo di igya nohon keti mem gima jikwei buwak nibou ndig hanyen ug ei nide ig nibou ndig i?

¹²Jeni ne dide bat nya rin ba, ditig mbier tut je. Nggon rino jibon jenti nok yo di igya nohon keti mem gima jikwei buwak da hanyen i?”

¹³Lene Daud sok nihyet ei yok dip bak Amasa cem bipai binoni “Ditig mbier tut na. Hon kep ammani kui lene dita nani ba, aya luei Yoab nohoti nok nibou pran bu. Gino diyai igbit dipreu ei mem nati dima bi lene ma Allah yai nimai bida hak ug.”

¹⁴Gima rino Daud bindei ba, keret Yehuda yahagom ingon gom tut noni leu api isok ighyet kwei bak noni leu binhyepo noni buwak yo di igya kui noni yahagom kwei ba, ibong ser nide ig nibou ndig hanyen bu.

¹⁵Tirigi Daud kwei krau Minyei Yordan lene keret Yehuda di induk yam kwei ei Gilgal igya um noni ba, isigon minyei bibie mem noni.

¹⁶ Mpe dima cem Simei di ntun keret Benyamin him di nicig ninyeng Gera leu Bahurim pima bipbur bibrim nimig leu binhyepo ngat Nibou Ndig Daud ei Yordan nyai.

¹⁷Noni kwei sut tungwatu nya di intun keret Benyamin him ibou sribu gom. Lene Ziba di Saul de awak pima cem kwei krau Yordan nyai bibie mem nibou ndig. Noni buwak nipmot bat nya ibou simnaimuhwidip kin nide awak nya ibou ningot can kwei bibit noni.

¹⁸Yo dini yahati tut nibou ndig kin nide ig bei nsi nya yahagom tirigi isigon minyei leu api ingon ya mem nibou ndig nicuk yokti nya hagom. Tirigi nibou ndig sindi sigon minyei lene Simei kuk no biba ningwak bikik dihyeisi ei nimig him.

¹⁹Bipai binoni “Andigpoi e, ma ayok ngon kep ditde mun di diyai tunggwei sut na di Andigpoi mem njap di anang leu minu ndig Yerusalem pima bu au. Dahara mem na di Andigpoi leu binhyepo angon prion ser hagom lene ma agga da drek dip au.

²⁰Andigpoi e, dikan tut bipia dibon sisar tut na tu. Gima rino njap di ammani dikwei um na di Andigpoi bibie leu keret nindigsi nya di ibong bei mpia nijjai.”

²¹Lene Abisai di Zeruya nipmot pai “Ma Simei tug ndei nimai lewo noni mbriom nibou ndig di TUHAN ta ei su.”

²²Noro Daud buhup bipai bak Abisai kin nikindig Yoab nya “Tou rihig ser jeni tut jingon kanti i? Mijibindei ba, mun di buhun cut igkep da bu e? Nogindini dani ne nibou ndig mem mben Israel yahagom hanyen bu ri. Gima rino dipai ser ba, timiei Israel hi mitug ndei nimai njap di ammani bi.”

²³Lene noni pai bak Simei “Dwai, diba neheng bipai tug hon dinyeng bipia atug ndei nimai bi.”

²⁴ Lene Mefiboset di Saul nignyon pima kwei ya um nibou ndig. Tirigi nibou ndig nang leu minu ndig Yerusalem pima lene Mefiboset kek minyeiti bi kak nuhui nta bi tot nide sinsun ei minyeiti cem bi kikau kwei bipek njap dino nibou ndig ningwes ngun bikwei hanyen kep.

²⁵Tirigi Mefiboset kwei leu minu ndig Yerusalem bipigo nibou ndig lene nibou ndig hig ser noni “Mefiboset e, nggon rino abit da tirigi dinang leu minu ndig Yerusalem pima bi i?”

²⁶Lene noni buhup “Andigpoi e, akan tut bipia dimig hacem lit. Dicuk ditde awak bipia suar noni tin ei ditde keledai leu binhyepo dibri bidibit na di Andigpoi noro awak dima ham nimbuk kep da.

²⁷Gima he bi lewo noni ris bak na di Andigpoi tut da. Noro na di Andigpoi noyam kin Allah de malaikat. Gima rino ma na di Andigpoi abibon da bit leu angon kanti.

²⁸Mbro nok gino dicig Saul nide bat nya yahagom idem mem gima na di Andigpoi ayai nimai biyok lo, asindui sut da ba, diyem njita bit na di Andigpoi ei ade meja dip. Dani dem mem gima dahara na di Andigpoi tut mun nyeng hi bu bi.”

²⁹Lene nibou ndig buhup “Cobi. Ma akes ahyet hon lewo dimiap tu. Dikos tut bipia nani kin Ziba jahacem jikwas ndigban di jiba jekep leu Saul pima tut yam.”

³⁰Noro Mefiboset buhup “Nna ba Ziba ba nokep hagom hak ug. Dingon cut hon gino na di Andigpoi angwes ngun ba, akwei hanyen tu.”

³¹ Lene Barzilai leu Gilead cem kwei leu Rogelim leu binhyepo ya tut nibou ndig tirigi noni sigon Minyei Yordan.

³²No dini wer andig-ndau ba, nide njap ug ei ari bingwam ningot muhwindaningai tu. Noni nyeng tut ndigban nindig bibor. Tirigi Daud bong ei minu ndig Mahanaim pima lene Barzilai ngondut noni bikwas njita tut noni kin nide limwa nya.

³³Lene nibou ndig bidip huk noni “Ma abit da ba, suug bong ei minu ndig Yerusalem leu api midinyohou na.”

³⁴Noro Barzilai buhup “Andigpoi e, jei bi lene dimai ug ri. Gima rino nggon rino midibit na di Andigpoi ug ei minu ndig Yerusalem i?

³⁵Ditde njap ug ei ari bingwam ningot muhwindaningai tu. Dingat dingwes ei mun nyeng hiti bu bi. Diyem njita hagom kei bi ba, biei ngat ningei hagom nok minyei he lene ditingou nam ser yo di ipai doia ighyet cem tu. Gino duug bong bit na di Andigpoi lene midinok mun di buhun mem nani.

³⁶Dem mem gima angondut da nok gima bi. Gima rino tirigi sisigon minyei lene midibit na di Andigpoi mbigom he leu api midingkwei hanyen.

³⁷Handei kon ba, na di Andigpoi asindui sut da ba, duug hanyen ei ditimieisi leu binhyepo itig dingut simiak dicig dipmem nya ijui dip. Angat dipmot Kimham dini e? Abuwak noni leu binhyepo noni miya kui na di Andigpoi ba, abibon noni bit leu angon kanti.”

³⁸Lene nibou ndig buhup “Midibuwak noni leu api midibibon noni bit leu angon kanti. Lene midiyai mun di asuar nya hagom bina mpe dino ahara da.”

³⁹Lene Daud kin nide limwa nya yahagom isigon Minyei Yordan. Tirigi yuug dihip ei nite hi bu lene Daud mei Barzilai ningyoi bingat nadi tindei mun di kei mem noni. Lene Barzilai ngkwei hanyen ug ei nitimieisi.

⁴⁰Tentara Yehuda yahagom kin tentara Israel niken igya tut nibou ndig ba, isigon minyei leu api nibou ndig ug ei Gilgal ba, Kimham bit noni.

⁴¹Lene mben Israel yahagom induk yam kwei bigya ei nibou ndig noho bei lene yihig ser noni “Andigpoi e, nggon rino nisut bat di keret Yehuda nya ikan bipia idem mem gima ikwei um na di Andigpoi bibie bitut nani kin ade bat nya kin ade limwa nya jahagom tirigi jisigon Minyei Yordan i?”

⁴²Lene Yehuda nya ibuhup “Niyai nok gima lewo nibou ndig tig mbier tut nye. Nggon rino niyai munti dima bindei ba, jiwok nye i? Nibou ndig ba njita bingondut nye bikwas mun nyeng gom tut nye cem bi.”

⁴³Lene mben Israel ipai “Mbro nok gino nibou ndig tig mbier tut je lo, nyeni nidem mem gima nibuwak noni nindig bibor mbisimnai bu njiriek je. Nggon rino jingon jei ba, jingwes pri gau nye i? Ma jiyok ngon kep bipia nyeni nisimbot kep biyam tut nibuwak nibou ndig hanyen kweisi bibie leu je!” Noro Yehuda nya ighyet singga bibor dor njiriek mben Israel ighyet.