Read Hatam SAMUEL GI NICAN 20 Bible Online

SAMUEL GI NICAN 20 - Hatam bible

SAMUEL GI NICAN 20

¹ Seba di yok nisinsiou ei mben Israelti no bong ei minu ndig Gilgal. Seba dima ne Bikri nipmot rin ba, ntun keret Benyamin him. Mpe di tentara nya injei ttai Daud bikwei sut lene Seba miep pun mbrei leu api tri tut “Nyeni imbier kim Daud bi ba, nggon rima injei bit noni i? Mben Israel jen, jikwei ba, nyeni ingkwei hanyen ug ei itimiesi!”

²Tri tut nok rino tentara Israel ikiju bikes Daud ei lene injei bit Seba. Noro keret Yehuda ingon gom tut Daud ba, injei bit noni leu api ijo leu Minyei Yordan nyai kikau ug ei minu ndig Yerusalem.

³ Tirigi Daud ug krau nide ig nibou ndig ei minu ndig Yerusalem lene buwak nitnem ndrim ibou simnai po kes yok mem gima ibong ser nide ig pima bibuwak yok ug ei ig gom di tentara nya igya ser bingkiem. Lene Daud tin ei mun di isuar nya hagom nok gi dem mem yok noro dideu yok biyem njita tut yok bu bi sren. Ba, ibong ei sirima tereu nok sop kibom kikau biyuug bimai kep.

⁴Lene nibou ndig cuk Amasa “Anduk tentara Yehuda yahagom keyam ei ninsi njap ningai leu api aya tut yok bijikwei.”

⁵Leu api Amasa ug ba, nduk yok keyam. Noro ug binyen leu ba, kwei krau mem njap di nibou ndig preu ei mem yo dima bi.

⁶Lo bi lene nibou ndig pai bak Abisai “Seba dima mihwen bit nye bibor dor njiriek Absalom nihwen bit nyeti bu ug ri. Gima rino ma aya tut ditde tentara nya ba, juhuk bram noni. Leu binhyepo nang leu nyeni ba, ningwes ngun ug ei minu ndig gom di bon nide ngug tig di ngkiem bibor bi.”

⁷Leu api Abisai ya tut nimpung Yoab kin tentara nya di igya ser nibou ndig nonti njem kin nimpung tentara nindigsi yahagom ba, injei leu minu ndig Yerusalem leu binhyepo yuhuk bram Seba.

⁸Tirigi yuug krau tig nindig di jo ei Gibeon lene Amasa kwei um yoni ei sirima. Mpe dima Yoab juk sinsun pran tut simeda di jo nahamti di bikri kin nintig bou. Tirigi noni son ndam Amasa lene simeda dima naham pas bicut ei bei ninda prak.

⁹Lene Yoab ya um Amasa bipai “Disut e, hagom nok gi kei e?” Lene su ninda com bikrau Amasa nuhui nta tereu nok mei ningyoi.

¹⁰Noro Amasa gingat simeda di Yoab krau ei ninda prak bi. Leu api Yoab dat Amasa ninghopti kros ba, brim simeda tut ba, ninghop tigwau biyem mpia ei dihyeisi mu. Lene ningut tti bimai hak ei sirima. Apino Yoab gidat noni nimbican bu bi. Lene Yoab kin nikinjoi Abisai yuhuk bram Seba kikau.

¹¹Yoab de tentara gom di ya dideu Amasa ningut tri tut “Tungwa tou rino tti kin Yoab Daud nya lene ma bit Yoab hak ug.”

¹²Amasa mai bibong ninggromti ei puig ninggimau yon ei. Lene no dima ngat lo, yo di injiriek mpia dima yahagom ikwei ya hon nimbiam ngut bingig igyai kep. Gima rino kri nimbiam ngut dima ug ei ngoi dumti lene tin ban dut kep.

¹³Tirigi kri nimbiam ngut dima leu puig ninggimau lene tentara yahagom imbut kikau bram Yoab ba, yuhuk bram Seba pima.

¹⁴Seba bikwam ser pui bitunggwei mben Israel ide minu ndig nya hagom ba, ug krau minu ndig Abel-Bet-Maakha. Lene yo di inggre kin Bikri ninsi de nya yahagom yuum noni ei sirima bicoi ug ei minu ndig nsi.

¹⁵Yoab de limwa nya imiap tut bipia Seba ningat rin ei mpia dima leu api injei siceu bigyon ttai minu ndig dima mem gima ihwen yok. Itig dihyei bikam ba, injei keyam kui ngug tig dima nisai leu api ikinyon ei nitig dihyei ei ngug tig dima nikiouti leu binhyepo ibindei ba, ngug tig dima nonti tti.

¹⁶Mpe dima lene sop ndig di ningon ki gom ningat rin ei minu ndig dima. Noni kiju biya ngug tig dip bijem biyok “Jingig jitingou mem dihyet dini o! Jingig jitingou mem dihyet dini o! Suar jihig Yoab nonti kwei bimbrap bit dani o!”

¹⁷Lene Yoab kwei ba, sop ndig dima hig ser “Andigpoi Yoab nani rin e?” Lene Yoab buhup “Yo, dani rin o.” Lene sop dima jem bak “Andigpoi e, amiap dihyet dini mbigom ug e.” Yoab buhup “Yo, dingig ditingou mem ahyet tu o.”

¹⁸Lene sop dima jem bak “Nipou yo lene itri tut ‘Gino asuar hi ndo puig bina lene ma aug hig ser timiei minu ndig Abel nya.’ Lene dem igbit ighyet dima ba, timiei Abel nya ide nibuhupti ndo puig di igbit mem igyaisi.

¹⁹Nyende minu ndig Abel dini nindig bibor ba, timiei nya ibong kei igwam kei cem ba, dem mem gima jiba jingon com nye dor njiriek gi jiba jingon com minu ndig di mben Israel ide hagom. Nggon rino na di Andigpoi anggok puig mem gima abindei sar minu ndig dini i? na di Andigpoi e, ajoi sut gima anggek TUHAN de dihyei hanjop nsi dini e?”

²⁰Lene Yoab buhup “Dijoi sut nok gima bi sren! Dijoi sut dinggek ade minu ndig dima ba, dibindei sar cem bi sren.

²¹Nyeni nitin ei ningon kanti nok gima bi. Noro Seba di timiei nungug him Efraim di nicig ninyeng Bikri hwen bit Nibou Ndig Daud ba, ningat rima ei minu ndig ade dima. Gino jikes noni ei dindati lene minikes je binimbut leu je ri.” Lene sop dima buhup “Mbigom minicom no dima nitibou leu ngug tig dini hwou bak na di Andigpoi ug ri.”

²²Leu api ug ba ningon di ki-kut binggok puig bak timiei minu ndig dima. Leu api yo dima irop Seba nitibou leu lene ittei bicom bak Yoab ei ngug tig nisai ma kwei. Leu api Yoab miep pun mbrei binduk nide tentara nya ba, ikus leu minu ndig dima lene ingkwei hanyen ba, tungwagom-gom ug ei nide ig. Lene Yoab cem ngkwei hanyen ug ei minu ndig Yerusalem ba, ug bingat nibou ndig Daud.

²³Gini ne nibou di inyeng jei di Daud ta yok nya inyeng ri. Nibou di bie tut tentara Israel yahagom rino Yoab. Nibou mem tentara nya di igya ser Daud nonti njem hak rino Yoyada di Benaya nipmot.

²⁴Nibou di nok nibou mem midyai niyai nimuhup bi di yo di yuubon yok nok awak nya igyai kep rino Adoram. Nibou di nyohou mitiei Israel rino Yosafat di Ahilud nipmot

²⁵Sekretaris di pas kep srat ei Daud ninyeng tak kepti rino Seya. Imam nya rino Zadok kin Abyatar.

²⁶Imam di inok imam ei nibou ndig de ig rino Ira leu minu ndig Yair.