Read Hatam SAMUEL GI NICAN 21 Bible Online

SAMUEL GI NICAN 21 - Hatam bible

SAMUEL GI NICAN 21

¹Ei nijam di Daud ninyeng tak kep mben Israel lene ninggum di buhun bibor hwen mben Israel mem nijam ari bingwam nitindur ningai. Leu api Daud hig ser TUHAN bindo ningon kanti bak tut ninggum dima. Lene TUHAN buhup “Diba ninggum di buhun bibor dima bihwen Israel drek dip Saul kin nide ig bei nsi nya itunggweisi tirigi igyai nimai bak mben Gibeon pima ri.”

² (Mben Gibeon intun mben Israel him bi. Noro inok nimpung poi mien di imbier kim mben Amori. Nipou ne mben Israel ipreu ei mem Gibeon nya tug hon neheng bipia mingget yok bi. Noro Saul nikan-kan nyen tut mun di bon ninyeng mem mben Israel kin keret Yehudati bon ninyeng mem noni apino bingon ei mem gima bindei sar yoni.) Lene Daud hig mben Gibeon dima kwei,

³bihig ser yok “Dibon mindei mem jeni i? Lewo dijoi sut dibon mun mem dibibrim nitunggweisi di bitut jeni nipou su pima hanyen leu binhyepo jingat nadi tindei mun di kei mem nye di TUHAN de limwa nya.”

⁴Lene ibuhup “Bit bon hi ba perak kin mas bikwam minggwen bit nyeni kin Saul de ig bei nsi nya drek dip munhyet di kim yok kan bi. Tut gima cem nyeni nidem mem gima niyai nimai bak mben Israel hi bi.” Lene Daud pai biyok “Ginok lene jahara da leu binhyepo dibon mindei mem je i?”

⁵Lene ibuhup “Saul di TUHAN dimig nok nibou ndig pima joi sut bindei sar nyeni nahagom leu binhyepo nahagom nisar ningwig leu minu Israel nisurti-nipekti.

⁶Gima rino ma akes Saul de nintun him di bram yamti nipinai ibou muhwindacan binye leu binhyepo nahak ingut ei dihim ninggwenti ei TUHAN Noho bei ei minu ndig Gibea di nibou ndig Saul nitimieisi.” Lene nibou ndig Daud ce ighyet “Igbit ri. Midikes yok ei jindati.”

⁷ Noro Daud gikes Mefiboset di Yonatan nipmot ei indati bi drek dip noni kin Yonatan ide gi preu po yeheng biyam ser tu pima.

⁸ Yo di Daud kes yok ei Gibeon nya indati rino Saul nipmot bat cin di Rizpa di Aya nipmisop pima yai bak Saul ba, yoni inyeng rino Armoni kin Mefiboset. Lene noni kes Saul nignyon bat nya ibou muhwi di nipmisop Merab yai bak Adriel di Barzilai leu Mehola nipmot.

⁹Nibou ndig kes yok ei mben Gibeon indati leu api yahak ingut ei dihim ninggwenti ei TUHAN Noho bei ei mbigdip gom ba, ibou muhwindacan dima yahagom imai sur yam. Ikes hukum nimai ei yok dip mem nijam di ikinyon ei nipuk gandum-barli ningan kui igudan ei nimbie him.

¹⁰Nok rino Saul nitnem ndrim Rizpa ba kron bohok prak meng mem nonti ei tig dip gom dideu mpia di Gibeon nya yahak yo dima ingut eisi bimbut leu bi mem nijam di ikinyon ei nipuk gandum-barli ninganti dima kikau ba, biget but hanyen mem nijam bed di biang hou nitausi. Sindui sut ba, ha nya ipuk ingut mem njap bi. Lene sindui sut ba, mindhe di ten nya igyem ingut mem mpia mmun cem bi.

¹¹Tirigi itri tut Rizpa niyai munti dima bak Daud lene,

¹² noni ug ket Saul Yonatan nya injum leu timiei minu ndig Yabes ei Gilead. (Yo dima yuug pos injum leu minu ndig Bet-San de biyati di mben Filistin yahak Saul Yonatan nya ingut eisi tirigi po ibindei timek yok ei mbigdip Gilboa tu pima.)

¹³Yoni ittei injum leu mpia dima lene imbus ibou muhwindacan di yahak yok ei dihimti pima injum cem bijo keyam.

¹⁴Leu api itig Saul Yonatan nya injum bitut ibou muhwindacan pima injum ei Saul nicig Kish nijui di jo ei Zela di keret Benyamin ide dihyei hanjop nsi. Tirigi igyai gima yok hagom bit leu nibou ndig nicuk yokti tu lene Allah buhup ide nadi di ingat mem ide minu dima.

¹⁵Jei bi lene mben Filistin kin mben Israel ikon pran bit yam hanyen bu. Gima rino Daud ya tut nide tentara nya ba, yuug kon pran bit yok. Ikon pran bit yam kikau ba, Daud ninghuisi sindem bu bi.

¹⁶Leu api tentara anjan Yisbi-Benob tau kwei. Nide micim dima ne micim di iba ngkimom-tembaga bibon di nibuhunti kilo ningai biniken ri. Noni kri simeda di nijep-jau gom kin nintig bou bikan bipia miyai nimai bak Daud hak.

¹⁷Noro Abisai di Zeruya nipmot kwei mpu Daud bitot tentara anjan dima biyai nimai bak. Gima leu lene Daud de tentara nya ibidip huk noni leu binhyepo preu ei mem yok bipia mibit yok tirigi yuug kon pran bu bi. Ipai bak “Na di Anyeng Jei e, nani ne nibou ndig di mben Israel yahagom iba ingon com ri. Nikou sut gima Na di Anyeng Jei asar leu nye a.”

¹⁸Jei bi lene ikon pran bit mben Filistin mbigom kin bu ei Gob. Leu api Sibkhai leu Husa di ya tut Daud nya iyai nimai bak Saf di tentara anjan gom.

¹⁹Jei bi lene ikon pran bit mben Filistin ei Gob mbigom kin bu lene Elhanan di Yair leu Betlehem nipmot yai nimai bak Goliat[13] leu Gat. Micim di Goliat de dima nika dem kep oi ka di jei.

²⁰Jei bi lene ikon pran bit mben Filistin mbigom kin bu ei Gat. Tentara anjan gom di ningon ya mem gi kon kep pran ningat rin ei sirima. Ninda hacem bon ninda pijum ningat muhwindagom ba, nimig hacem bon nimig nda pijum cem ningat muhwindagom.

²¹No dini srep huk tentara Israel. Gima rino Yonatan di Daud nikindig Simea nipmot yai nimai binoni.

²²Ibou bitai di Daud ya tut nide nimpung nya di igyai nimai biyok dima ne yo di intun keret anjan nya him ei Gat ri.