Read Hatam SAMUEL GI NICAN 22 Bible Online

SAMUEL GI NICAN 22 - Hatam bible

SAMUEL GI NICAN 22

¹Tirigi TUHAN teu Daud biningwes ngun leu Saul kin nide siceu nindigsi nya cem inda nsi lene Daud pai doia dini bibinggei sut TUHAN. [

²TUHAN e, dingon ngakei Na. Nani asindem tut da.]

³TUHAN ne tentara nibousi di diya coi di bindei ba, dingon jo nyahan ri. Digwam coi Noni lewo Noni nok bor ngug biyon gau da. Noni ba Nide mun di bipukep ser tibor ninggwenti nya binyohou da kikau.

⁴Dahara TUHAN lewo Noni dem mem gima tungwatu inggei sut Noni ba, teu da bidingwes ngun leu ditde siceu nya yahagom inda nsi.

⁵Minu nimai nya ide yon ttai da bidem kep nok muk di tti nindig bibor di hwen da.

⁶Minu nimai nya ide yon ttai da ba, bon di jo ei jui nimai nya ide jo doho bei.

⁷Tirigi mun di buhun cut igkep da lene dahara TUHAN. Dihig ditde Allah leu binhyepo Noni mikwei mpu da. Noni miap dihyet tirigi gwam ei Nide ig lene yok ngon kep ditde nahara Noti.

⁸Lene dihyei ugwa-kwei ba, mun brim apino nungug kiou nya kit ba, ugwa-kwei lewo Allah gga bibor!

⁹Hum mmup brou kwei leu nuhwap nsi ba, hum njeng kin hum mbom cig-cai kwei leu ninsi a.

¹⁰Noni bindei kki mpia-bbed him bikki hacan leu api juk kwei ba, co bumbuhui di dindi-kai dip.

¹¹Noni bri bigwam ei kerub dip bidimba tut ba, dwop-dwop nyen ei nai hou him ninyehei.

¹²Noni ba nidinditi di dindi kai binggai kep Nonti ba, jinnum di dindi kai bikrop ttai Noni.

¹³Noni bindei hei bumbuhui kin biget mbras di nok tig njep kin hum mbom leu kigyei di ninjeng tot-tot nyen bibie nohobei.

¹⁴Lene TUHAN bindei ba, kru cut kwei leu mpia-bbed him. No Di Sindem Bibor bindei ba, tungwatu nya imiap nihyet.

¹⁵Noni prindei Nide siceu nya ba, bindei bintek gimahap lene ba Nide kigyei ninjeng di srei bitot-tot nyen bibindei ba, inang.

¹⁶Tirigi TUHAN ba nigga biborti bikon nihyet kep Nide siceu rino muk jou nikiou tau bijo nibreisi ba, dihyei ninghim cem tau.

¹⁷TUHAN su ninda leu anai kwei bikrau da lene brim da leu minyei di jut bibor.

¹⁸Lene teu da bidingwes ngun leu siceu di isindem bibor kin yo di ingon mpo tut da nya inda nsi lewo isindem njiriek da.

¹⁹Yoni injei bihwen da tirigi mun di buhun bibor cut igkep da noro TUHAN cuon diyaisi.

²⁰Noni kwek da leu mun di nahanok micut igkep da lene teu da bidingwes ngun lewo noni joi sut da.

²¹TUHAN birop hanyen bida tut diyai munti di igbit nya. Noni njei mun di kei bak dani lewo diyai mun tunggwei bi.

²²Dibit TUHAN de nicukti nya ba, digikiek doho tai leu ditde Allah bi.

²³Dibit Nide nikos tutti nya hagom lene digitunggwei sut Nide nicukti nya bi.

²⁴TUHAN kan tut bipia mun di kinei hi rap da bi ba, doom danti ei minu ting leu mun di kinei.

²⁵TUHAN buhup bida tut dibon munti di igbit nya lewo Noni kan tut bipia diyai mun di tunggwei hi bi.

²⁶TUHAN e, angon gom tut yo di ingon gom tut Na ba, asingat bibor tut yo di isingat nya.

²⁷Ando Nanti nok No di kwes bak yo di ingon kwes nya cem noro aba nitok bak yo di isibut nya.

²⁸Ateu yo di yoom kep ingonti bingwes ngun noro acut yo di ingon jei nya.

²⁹Ditde TUHAN Allah e, atin ditde mini njeng binjeng kei. Ade ninjeng piga ditde nidinditi.

³⁰Asindem tut da leu binhyepo dicok tut ditde siceu nya. Dicut ide tentara nibousi di igya coi leu ba, diyai bidiyati tug hon ditde Allah di mpu da.

³¹TUHAN nibon munti nya kei bibor kei. Nyeni iba ingon com Nide nipreu eisi nya cem. Noni dem kep mun di ibipukep ser tibor ninggwenti nya mem yo di igya coi Noni yahagom.

³²Lewo TUHAN Nongkom he rino Allah. Nongkom he rino ya srak ko hagau nye.

³³Noni ne Allah di sindem tut dani bibindei ba, mun nyeng hi bigen ser ditde puig bi ri.

³⁴ Noni sindem tut dimig binok rusa nimig leu binhyepo didilleu bi. Noni cuon diyaisi tirigi dimbut-mbut nyen ei nungug him.

³⁵Noni ngginau da mem gima dikon pran apino diyar ditde hampiap di sindem bibor.

³⁶TUHAN e, anyohou dani ba, ateu da bidingwes ngun. Aba Ade nisindemti bahati tut da cem abindei ba, Ade nibon munti dima bindei hei da bidinok no di sindem bibor dor njiriek nindigsi nya.

³⁷Anyohou da ser nhyema disima ba, dicut bi sren.

³⁸Diyon igkep ditde siceu nya ba, dibindei timek yok. Dingkwei leu yok bi bibou dihwen yok bingwig ug e.

³⁹Diba yok bihwen mpia ba, igikiju hanyen bu kan bi. Bit bon igyai ideti bi ba, itti bimai ei dimig him.

⁴⁰Ayai nisindemti bida mem gima dibikon pran ba, dibicut ditde siceu nya cem.

⁴¹Abindei ba, ditde siceu ikiju binang leu da apino dibindei sar yo di iba nitok bida cem yahagom.

⁴²Yahara noro hi gimpu yok bi. Yahara TUHAN noro Noni buhup ighyet bi.

⁴³Dihwen yok binem-nnai bidem kep dihyei ndung di kimba-kimba wai. Dico kep yok noyam kin gi dico kep igkrop di jo ei puigsi.

⁴⁴Akwek da bidingwes ngun leu nimpung di ibit Ade nicukti bi nya inda nsi leu api akon da bidinok no di ninyeng tak kep ngkiai nya tu. Mben ngkiai di dikan tut yok bi nya inok ditde awak bu tu.

⁴⁵Ngkiai nya ibou cut bida. Gino imiap ditde nicukti nya lene ice tut bibit hak ug.

⁴⁶Mimbri di kui ingkek cut leu yok leu api iba idigit-digoi behei leu ide tentara nibousi di igya coi nya.

⁴⁷TUHAN niyaijo o! Dikon ditde No di ya srak ko hagau da ninyeng o! Jikon ditde Allah di teu da bidingwes ngun ninyeng di jei o!

⁴⁸Noni sindem tut da leu binhyepo dibindei timek ditde siceu nya ba, om ngkiai nya ei doho bei cem,

⁴⁹lene teu da bidingwes ngun leu ditde siceu di iba nitok bida nya. TUHAN e, asindem tut da leu binhyepo dibindei timek ditde siceu nya ba, anyohou da leu yo di imbuk tut tungwatu nya kindi-kindok cem.

⁵⁰ Apino dikon anyeng ei ngkiai nya ikieti lene dipai doia ba, dibikon anyeng a.

⁵¹Allah sindem tut Nide nibou ndig di Nonti kon ninyeng leu binhyepo bindei cut siceu nya bicut bibor ug. Ningon ngakei No di Noni dimig ei su kikau. No dima ne Daud kin nide nintun him di bram yamti bijo ninno bijo kikau ri.