Read Hatam SAMUEL GI NICAN 23 Bible Online

SAMUEL GI NICAN 23 - Hatam bible

SAMUEL GI NICAN 23

¹Yakub de Allah dimig Daud di Isai nipmot bita noni nok nibou ndig bibindei ba, ninyeng jei cem. Daud pas kep doia di kei bibor nya mem mben Israel. Noni mbrap gi ningwigsi bipai,

²TUHAN Ninnei tri tut nihyet tug hon dani ba, nicuk tungwatu nyati tibim ei duhui him.

³Mben Israel ide Allah mbrap tu. No di ya srak ko hagau Israel pai bida “Nibou ndig di ninyeng tak kep limwa nya kin ningon di sren di bie tut yok ei nibit Allah nihyetti cem,

⁴noyam kin mpia njap di piga bibor kei mem nijam di mpia kwes ba, noyam kin mpia njap di bindei ba, mintu-minta sieng kei mem nijam di mpia but nggilei cem.”

⁵Tug hon nisinati dima ne Allah minjei mun di kei bak ditde nintun him di bram yamti lewo Noni preu ei mem da tut gima bijo ninno bijo kikau tu. Noni nyohou yai mun nyeng hagom leu api miluei ningonti tut nipreu ei mem dati dima bi. Gino Allah bindei ba, dingon kanti dima mipek kep mem ditde nintun him di bram yamti lene midingon cut hon Nide nipreu ei mem dati.

⁶Noro yo di igwam ei TUHAN ninghim idem kep nok cibou nggwen di tungwatu nya icom bihigom. Bit bon iba inda krau ninggwenti dima kan bi.

⁷Suar iba biei kin ngkimom nitu bikam cibou nggwen dima. Gi bi lene ingget ba, ikrau cem bi. Nok gima cem yo di igwam Allah ninghim pima mitug ndei hum di yem yok bingwig.

⁸Daptar dini tibim tut Daud de nibou tentara di inyeng jei nya. No di nigom rino Ishbaal di mben Hakhmoni di nok nibou di bie tut ‘Nimpung Nihwen Kep Mun Cig Gi Niningai’[14] Mpe di gom ne tentara Daud ikon pran bit siceu nya leu api Ishbaal nongkom bindei timek siceu ibou sratus muhwindaningai biba nide micim bidat yahagom bimai ei njap gom.

⁹No di nican ei Nimpung Nihwen Kep Mun Cig Gi Niningai dima rino Eleazar di Dodo leu Ahohi ninsi de nipmot. Noni ya kui Daud mpe di tentara Israel injei siceu bihwen mben Filistin di idem yam ei mem gima ikon pran. Tirigi tentara Israel isujou leu,

¹⁰lene Eleazar brim ningkek biyai nimai bak mben Filistin ninno ba, nisindemti ngwig leu no kep. Ninda cem nggap kep nide simeda leu ba, pas leu ninda kan bi. TUHAN bindei ba, tentara Israel ibindei timek siceu nya bibor ei njap dima. Nimpung mben Israel po isujou pima ikwei hanyen bigya Eleazar niyati di hwen siceu nya eisi pima leu api ijuk sinsun pran hagom leu nimbiam ingut di icut bimai sinsiou ei mpia dima.

¹¹No di niningai ei Nimpung Nihwen Kep Mun Cig Gi Niningai dima rino Sama di Age leu Harari nipmot. Mpe di gom tentara Filistin idem yam ei Lehi dideu miaisi gom di mpung tut kiju ngwoi ba, igya kep bihwen tentara Israel lene nimpung Israel isujou leu yok ug.

¹²Noro Sama nongkom kon pran bit yok kikau biya kep bihwen yok lene bindei timek tentara Filistin ba, ya bingkiem ser miai kiju ngwoi dima cem. Nok gima rino TUHAN bindei ba, tentara Israel ibindei timek ide siceu bibor mem njap dima.

¹³Mpe di gom tirigi nijam dem mem tungwatu nya ipuk njita ngat kui ig gudan lene ibou ningai leu Daud de nibou tentara ibou ningot ningai di inyeng jei ijuk ug ei Hak Mihyeti Adulam. Mpe dima lene Daud ningat rin ei mpia di inen biei ser siceu bigya nding di iwin ei hak mihyeti dima. Mben Filistin yohok ide prak meng yati ei Mbang Briep Refaim lo, ide tentara nimpung gom yuug ba, ibong ei Betlehem.

¹⁵Lene Daud ningon ngguk tut nitimieisi dima bipai “Ayoo! Handei krai minyei di biam leu minyei bousi di jo dideu dimbou pmem nuhui ei Betlehem kwei bididut kep dinggobiausi ug o!”

¹⁶Nibou tentara ibou ningai dima imiap Daud nihyet lene injei yo ba, ijjei sin mben Filistinti ei yohok ide prak meng yati eisi nyahan bitau minyei leu minyei bousi dima leu api ittei kwei bak Daud. Noro Daud kou sut gi dut minyei dima leu api siber minyei dima nok munkwas di bikuk no bak TUHAN.

¹⁷Lene pai “TUHAN e, gi mbun didut minyei dini kan bi! Gino didut lene gima noyam kin didut yo di inggok imai eisi dini inggrom ri!” Gima rino Daud dut minyei dima bi sren. Nipui sut nibou tentara ibou ningai di mimbri kui ingkek dima ide niyai munti di mipbor ngat nya ri.

¹⁸Tungwatu nya ijem nibou tentara ibou ningot ningai di inyeng jei dima ‘Nimpung Ningot Ningai.’ Abisai di Zeruya nipmot di Yoab nikinjoi rinok nibou di bie tut yok. Mpe hi lene ba nide micim biyai nimai bak ibou sratus ningai. Gima bindei bininyeng jei noro noni ne mimbri ngat noyam kin ‘Nimpung Nihwen Kep Mun Cig Ningai’ pima bi.

²⁰Nibou tentara gi ter bu di ninyeng jei ne Benaya di Yoyada leu Kabzeel nipmot ri. Noni cem ba mimbri ngat bibrim ningkek mbirimang bibor. Noni yai nimai bak pinjoi ndig leu Moab di isindem bibor ibou can ba, mimbri kui ingkek cem lo, imai hak. Mpe di gom tirigi es nggai kep dihyeisi lene Benaya jug ug ei jui nsi gom bitot singa ningut gom bimai.

²¹Mpe hi bu lene noni yai nimai bak no di anjan leu Mesir di mimbri kui ningkek ba, krau micim ei nindati. Benaya ba nide tom he bihwen lene pos micim di jo mben Mesir dima nindati leu lene ba micim dima bidat niceu hanyen bimai.

²²Nipui mun dima tut Benaya leu ‘Nimpung Ningot Ningai’ pima niyai munti di mipbor ngat nya ri.

²³Ei nimpung dima ne Benaya ninyeng jei dor njiriek nindigsi nya noro noyam kin ‘Nimpung Nihwen Kep Mun Cig Gi Niningai’ pima bi. Daud kon Benaya binok nibou mem tentara nya di igya ser Daud nonti njem.

²⁴Yo di ibicom yam bit Nimpung Ningot Ningai dima ne Asael di Yoab nikinjoi kin Elhanan di Dodo leu Betlehem nipmot, kin Sama kin Elika di mben Harod kin Heles di mben Palti, kin Ira di Ikes leu mben Tekoa nipmot kin Abiezer leu mben Anatot, kin Mebunai leu mben Husa kin Zalmon leu mben Ahohi, kin Heleb di Baana leu mben Netofa nipmot kin Itai di Ribai leu mben Gibea ei keret Benyamin ide dihyei hanjop nsi, kin Benaya leu mben Piraton kin Hidai leu mbang briep Gaas, kin Abialbon leu mben Araba kin Azmawet leu mben Bahurim, kin Elyahba leu mben Saalbon kin Yasyen nipmot bat nya, kin Yonatan kin Sama leu mben Harari, kin Ahiam di Sarar leu mben Harari nipmot kin Elifelet di Ahasbai leu mben Maakha nipmot, kin Eliam di Ahitofel leu mben Gilo nipmot, kin Hezrai leu mben Karmel, kin Paerai leu mben Arbi kin Yigal di Natan leu mben Zoba nipmot, kin Bani leu mben Gad kin Zelek leu mben Amon, kin Naharai leu mben Beerot di ttei kep Yoab de minggwen nya, kin Ira kin Gareb leu mben Yetri kin Uria leu mben Het. (...)