Read Hatam SAMUEL GI NICAN 24 Bible Online

SAMUEL GI NICAN 24 - Hatam bible

SAMUEL GI NICAN 24

¹Mpe di gom bu ne TUHAN gga mben Israel apino Noni bindei ba, mun di buhun bibor cut igkep yok drek dip Daud ningon kanti. Nok rino TUHAN pai binoni “Apas kep tentara Israel kin Yehuda nya inyeng ba, akwop imangti.”

²Lene Daud pai bak Yoab di nibou tentara “Aya tut nibou tentara di igya kui na nya ba, juug bijiya bidem minu nisurti-nipekti nya lene apas kep ditde limwa nya yahagom inyeng.” Noni cuk nok leu binhyepo kan tut imangti.

³Noro Yoab buhup “Handei kon ba, Na di Anyeng Jei ade TUHAN Allah bindei ba, tentara Israel imangti kum eisi mbisratus-sratus bram yam njiriek leu imangti njap di ammani. Handei kon ba, Na di Anyeng Jei ayaijo kikau ba, angat yahagom bou ayai him. Noro Na di Anyeng Jei e, nggon rino akos tut bipia apas kep inyeng kin imangti i?”

⁴Noro nibou ndig krau kep nicuk yokti dima bingkiem. Gima rino Yoab ya tut nibou tentara di igya kui noni ba, ittei yam bipas kep tentara Israel inyeng kin imangti.

⁵Tirigi Yoab kin nide nibou nya isigon Minyei Yordan biyuug dihip ei nite hi lene yohok ide prak meng yati ei Aroer nite bei mpia nibiho. Aroer ne minu ndig gom di jo mbang briep dima ninggimau ei keret Gad de dihyei hanjop nsi ri. Ijo leu mpia dima bimbut ug ei nite bei mpia nijjai kikau ug ei Yaezer,

⁶bimbut kikau ug ei Gilead kin Kades ei mben Het ide minu nyeng tak kepti. Leu api yuug ei hanjop keret Dan leu api imbut ug ei nite bei mpia nicutti ba, yuug krau Sidon.

⁷Ijo leu minu ndig dima bimbut ug ei nite bei mpia nibiho ba, yuug krau minu ndig Tirus di bon nide ngug tig di bikrop ttai a. Lene yuug ei mben Hewi kin mben Kanaan ide minu ndig nya hagom biyuug kikau ug ei Bersyeba ei hanjop keret Yehuda bei mpia nibiho.

⁸Igya bidem minu ndig nya kin minu mien nya hagom ba, imbutti dima yem bed muhwindatai ba, njap nyatungwacan. Leu api ingkwei hanyen kwei ei minu ndig Yerusalem,

⁹bipai sut inyeng di ipas kep kin tentara nya imangti bak nibou ndig. Pinai Israel nya di idem mem gima ikon pran imangti ibou sribu sratus muhwindaningai lene pinai Yehuda nya ibou sribu sratus muhwi.

¹⁰Noro tirigi Daud bindei ba, Yoab nya ipas kep limwa dima imangti leu su rino ningon huk niti bikan lo, bon mun tunggwei sut tu. Leu api hara bak TUHAN bipai “TUHAN e, dibon sisar nindig bibor tu! Nnaba akos ser ditde sisar lewo diyai munti dima bindo tut dingon di mbum bibor.”

¹¹Lene TUHAN pai bak Nabi Gad di ya hacan mem TUHAN kin Daud “Aug pai bak Daud bipia dindo puig ningai bak leu api suar noni kos tut puig gom leu api midibindei mbut puig dima.” Njap di hyep bu tirigi Daud kiju leu nibongti,

¹³lene Gad kwei ngat noni bindat kep TUHAN nihyet di cuk no tut bak bipai “Puig di tou rino Na di Anyeng Jei akos tut i? Ninggum di hwen minu dini mem ari bingwam ningai e? he siceu yuhuk-huk nyen Na di Anyeng Jei kikau mem bed ningai e? he nsuwer ajar hwen minu dini kikau mem njap ningai e? Nogindini akos tut puig gi tou rino midibuhup hanyen bak TUHAN i?.”

¹⁴Lene Daud buhup bak “Ayo! Buhun bibor mem dani o! Dikou sut gima limwa nya ikes hukum ei da dip a. Gima rino ma TUHAN kes mun di buhun ei nyeni dip bit leu Nonti ningon kanti hak ug lewo ningon nggriu sut nye nindig bibor.”

¹⁵Leu api TUHAN ba nsuwer ajar bihwen mben Israel mem njap tekti dima kikau bipek njap di Noni kos tut ei su. Apino mben Israel di imai tug hon nsuwer ajar dima imangti ibou sribu ningot muhwindacan.

¹⁶Tirigi TUHAN de malaikati di bindei nsuwer ajar hwen yo dima kwei krau Arauna di timiei minu ndig Yebus de ig gudan di illet gandum ninjep leu nisina bai kikep eisi ei minu ndig Yerusalem lene TUHAN ngat lo, malaikati dima tin ei mem gima bindei sar timiei minu ndig dima cem ri. Lene Noni luei ningonti tut nikos tutti ba, kes ninda tut gi ba nsuwer ajar bihwen yo dima bipai bak malaikati dima “Dem tu! Akes hon hak ug!”

¹⁷Tirigi Daud ngat malaikati di ba nsuwer ajar bihwen limwa nya lene pai bak TUHAN “Dani rino dibon sisar a. Dangkom ngat rino dibon mun di tunggwei dima. Noro yo di yuum hukum dima ne itunggwei sut mindei ngan i? Suar akes hukum ei dani kin ditde ig bei nsi nya dip hak ug.”

¹⁸Lene Nabi Gad kwei ngat Daud mem njap dima bipai bak “Na di Anyeng Jei e, suar akui ug ei Arauna de ig gudan di illet gandum ninjep leu nisina bai kikep eisi ba, awin nimbar hum dok mem TUHAN ei sirima.”

¹⁹Lene Daud kiju bimbut dem igbit TUHAN nihyet di pai binoni tug hon Nabi Gad pima.

²⁰Tirigi Arauna su nibou bisuskui nimo jug lene ngat lo, nibou ndig kin yo di ibit nya ikui bidideu kwei su. Lene Arauna kuk no biba ningwak bikik dihyei ei nibou ndig noho bei bihig ser,

²¹“Mindei rino Na di Anyeng Jei akwei sut i?” Lene Daud buhup “Dikwei pek ade ig gudan dini ba, diwin nimbar hum dok mem TUHAN eisi leu binhyepo nsuwer ajar kes leu nye.”

²²Arauna miap gima tu lene pai bak “Na di Anyeng Jei e, ayai titut yam hak ug ba, akwas tut TUHAN dem igbit Na di Anyeng Jei angon kanti. Sapi dini yok mem nibon midut nindig mindhe titut kep humti ei nimbar hum dokti lene aba biei di diprion ei sapi ninggibi dip nya kin biei ner di sapi ico kep gandum ninjep eisi nya cem abindig hum ei nimbar hum dokti hak ug.”

²³Lene Arauna yai gima yok hagom bak nibou ndig bipai bak “Handei kon ba, Na di Anyeng Jei ade TUHAN Allah mijoi sut nibon midut nindig mindhe titut kep humti ei nimbar hum dokti dima.”

²⁴Noro nibou ndig buhup “E bi! Midiba mitiei bipek mun dima yok hagom leu na. Dikou sut gima diba mun di diyai mikui-kausi bibon midut bak ditde TUHAN Allah.” Leu api Daud ba mitiei perak ningot muhwi bipek ig gudan dima bitut sapi nya cem.

²⁵Leu api noni win nimbar hum dok gom mem TUHAN ei mpia dima lene ba sapi dima yok bibon midut nindig mindhe titut ei nimbar hum dokti kin midut nibiyai ningon kwes kin TUHANti cem. Apino TUHAN buhup Daud de nadi ba, nsuwer ajar di hwen mben Israel pima kes hon hak ug.