Read Hatam SAMUEL GI NICAN 4 Bible Online

SAMUEL GI NICAN 4 - Hatam bible

SAMUEL GI NICAN 4

¹ No di ntun Saul him hi kin bu ne Mefiboset di Yonatan nipmot ri. Nimig hacem lit habiei ei mpe di nide njap ug ei ari bingwam muhwi tirigi po Saul Yonatan nya imaisi pima. Lewo tirigi nihyet tibim tut imaisi kwei leu minu ndig Yizreel lene sop di nyohou kep Mefiboset hon binang tut lo, ba nibinang bidor apino munggwom dima cut di ba nimig hacem bisar mpia. Tirigi Saul nipmot Isyboset miap tut Abner di mai ei Hebron tu lene nide mimbri cut ba, limwa mben Israel yahagom igwam nidigitti. Isyboset bon nide nibou di ibie tut tentara nya di ikon kep pran ibou can. Nibou cin dima gom ninyeng rino Baana lene hi ninyeng rino Rekhab. Icig ninyeng rino Rimon leu Beerot di ntun keret Benyamin him. (Minu ndig Beerot coi keret Benyamin ide dihyei hanjop nsi lo, timiei ngat nya inang ba, yuug ei Gitaim bibong timiei ei sirima kikau kwei bipek ammani kep.)

⁵Nibou tentara di Rekhab kin Baana dima ikiju biyuug ei Isyboset de ig bikwei krau mem mpia huk pijum hammi tirigi Isyboset bong kep ninghuisi mem mpia huk pijumti dima.

⁶Sop di ningat rin ei ig dima cig gandum ngan lene iiman bibong leu su. Gima rino Rekhab kin Baana icoi nyahan ug ei ig bei nsi.

⁷Ba, icoi kikau ug ei Isyboset de ninsi di bongti tirigi bong mai leu su lene idat noni bimai ei nibongti. Leu api irop nitibou leu lene ittei bimbut tut ba, ibiya kak Mbang Briep Yordan kikau mem mmun jei dima.

⁸Tirigi yuug krau Hebron lene ittei Isyboset nitibou dima ba, ikes bak Daud lene ibipai bak “Saul nipmot Isyboset po ba nitok biNa di Anyeng Jei bibor po yai nibou tut gi yai nimai bak Na di Anyeng Jei cem nitibou rigini. Njap di ammani TUHAN buhup bak Saul kin nide nintun him di bram yam nya ba, ibiang nibuhunti drek dip igyai munti di kinei sut Na di Anyeng Jei tu.”

⁹Noro Daud buhup “TUHAN di niyaijo di teu dani leu mun di buhun hagom kan bipia mun di miditri tut dini ne nijit ri.

¹⁰ Tirigi po dingat rin ei Ziklag pima lene hi pai sut Saul nimaisi bida lene no dima kan bipia noni ttei nihyet di kei rikwei sut dima. Noro dikat noni lene diyai nimai bak cem. Gima ne nimuhup di dibirop binoni tut gi po kwei pai sut Saul nimaisi bida pima ri.

¹¹Gima rino midiba nibuhun biborti dor njiriek gima bu bibuhup bak yo di imbuk bibor di igyai nimai bak no di ningon ngun di bong kep ninghuisi nyahan ei nonti nide ig. Nogindini midibuhup hanyen bije drek dip gi po jiyai nimai bak Isyboset pima ba, dicok tut je leu dihyei ninjek dip dini.”

¹²Pai biyok nok leu lene cuk nide tentara nya ba, igyai nimai bak Rekhab kin Baana. Tirigi igyai nimai biyok leu su lene ikkin inda kin imig leu ba, ipindur ingut ei nai dideu igpong gom ei Hebron. Noro tut Isyboset nitibou lene ittei ba, itig ei Abner nijui ei minu ndig dima.