Read Hatam SAMUEL GI NICAN 6 Bible Online

SAMUEL GI NICAN 6 - Hatam bible

SAMUEL GI NICAN 6

¹Lene Daud nduk mben Israel ide tentara di isindem bibor hanyen kwei leu api yo di idem yam ei imangti ibou sribu ningot ningai.

² Lene noni bie tut yok ug ei Baal-Yehuda leu binhyepo ikon Brua Gi Preu di ijem ninyeng hi TUHAN Di Sindem Bibor De banggo mbrei di jo nai kerub[3] nya kwei leu sirima.

³ Yoni ikon brua dima kwei leu Aminadab de ig di jo mbigdip lene ikes ei kroba nijepti. Lene Aminadab nipmot bat cin di Uza kin Ahio imbut nitta lo,

⁴Ahio mbut bibie kroba dima noho.

⁵Lene Daud kin mben Israel nindigsi nya yahagom ipri-pri nyen bipai doia sindem bibor ba, ibinggei sut TUHAN. Lene ikek ide nggong mbrei nya kin ndug nya kin mun di nggileng nya kin gong di nok yeng tug nya.

⁶Tirigi yahagom imbut sur Nakhon de gudan di illet gandum ninjep leu nisina bai eisi lene sapi di ibrim tut kroba dima indrat mpia leu api Uza su ninda bikrau Brua Gi Preu ser nhyema cut bi.

⁷Lene TUHAN Allah ningon sibui sut noni tut nide nipigau hanjopti bingget brua dima apino yai nimai binoni kros simiak Brua Gi Preu.

⁸Gima rino hon kep njap dima kui ne tungwatu nya ijem mpia ttou nsi gom dima ninyeng Peres-Uza. Lene Daud ningon sibui sut gino TUHAN yai nimai bak Uza drek dip niyai munti dima.

⁹Noro noni ttin tut TUHAN cem bipai “Notou mem da gino dikon Brua Gi Preu dima bidimbut tut nogindini i?”

¹⁰Gima rino noni kos tut bipia mimbut tut Brua Gi Preu dima kikau ug ei minu ndig Yerusalem bigyo. Leu api noni kriek tut Brua Gi Preu ug ei Obed-Edom di nitimieisi leu Gat nide ig.

¹¹ Leu api Brua Gi Preu dima jo ei Obed-Edom de ig kikau mem bed ningai apino TUHAN njei mun di kei bak bitut nide ig bei nsi nya cem.

¹²Lene Nibou Ndig Daud miap tut bipia TUHAN njei mun di kei bak Obed-Edom bitut nide ig bei nsi nya kin mun di noni nyeng tut nya hagom drek dip Brua Gi Preu dima. Gima rino noni ug ei Obed-Edom de ig lene ba nimbos-hi-mbos bikon Brua Gi Preu dima buug sut hanyen ug ei minu ndig Yerusalem.

¹³Tirigi yo di ittei Brua Gi Preu dima imbut bicom imig mbimuhwindagom he lene noni cuk yok bigya leu api ba sapi nikre kin sapi mien di pap-nap kei bibon midut nindig mindhe kep humti bak TUHAN.

¹⁴Lene noni pri-pri nyen sindem bibor bibinggei sut TUHAN. Mpe dima lene noni juk nide sinsun ser nonti bi noro kri sre linen nicun he kep nintig boua.

¹⁵Gima rino noni kin mben Israel nindigsi nya yahagom iba nimbos-hi-mbos kin nimiep pun mbreisi nya bimbut tut Brua Gi Preu ug ei minu ndig Yerusalem.

¹⁶Tirigi sindi ittei Brua dima bicoi kwei ei minu dima lene Mikhal po Saul nipmisop pima ya ei kendera mihyeti bingat lo, Nibou Ndig Daud pri-pri nyen bibinggei sut TUHAN lene Mikhal ningon pus tut noni nindig bibor.

¹⁷Yo dima imbut tut Brua Gi Preu ug ei prak meng behei di Daud hok ei su bikes ei mpia di noni tin ei mem tu. Lene Daud bon midut nindig mindhe titut kep humti ba, bon midut nibiyai ningon kwes kin TUHANti cem bak TUHAN.

¹⁸Niabiati noni bon midut nya bingwig leu su lene ngat nadi tindei mun di kei mem nide limwa nya tug hon TUHAN Di Sindem Bibor ninyenga.

¹⁹ Leu api noni kwas njita tut yahagom. Noni yai mikwau di noni bam ei su ninggriet gom kin roti nindak gom kin roti nyop di biei ngat kismis joti nindak gom ba, ba gima bikwop pinai nya kin sop nya yahagom. Lene yahagom ingkwei hanyen ug ei ide ig.

²⁰Tirigi Daud cem ngkwei hanyen ug ei nide ig nibou ndig bipigo nide bat nya lene Mikhal hei um noni lene ba Daud bikek bipai “Njap di ammani nibou ndig Israel bon ninyeng jei bibor! Noni juk sinsun haigtu bi bou awak sop nya igyai him bibindei ba, sop di igyai midyai ei nide ig dima yok ikan bigya noni ne no di nintin kiek ri!”

²¹Lene Daud buhup “Dipri-pri nyen nok leu binhyepo dibinggei sut TUHAN di dimig dani ei nok nibou ndig mem Nide limwa nya leu api diya luei acig kin yo di intun noni him yohoti bu. Lene mbigom midipri-pri nyen kikau leu binhyepo dibinggei sut TUHAN.

²²Ditin ei mem gima limwa nya ipai da kinei dor njiriek gino aponi pima bu. Mbro nok gino angwes pri gau da lo, awak sop pima yok minggei sut da!”

²³Lene Mikhal di Saul nipmisop pima pijet drek dip kikau ug bipek niyaijo ningwig honti.