Read Hatam SAMUEL GI NICAN 8 Bible Online

SAMUEL GI NICAN 8 - Hatam bible

SAMUEL GI NICAN 8

¹Jei bi lene Nibou Ndig Daud njei bihwen mben Filistin bu. Noni bindei timek yok lene biyai ide dihyei hanjop nsi cem ba, ninyeng tak kep.

²Lene noni hwen mben Moab cem ba, bindei timek yok. Noni cuk yok ba, ibong kimus ei dihyeiti leu api yai nimai bak ibou can lene njiriek tungwagom leu api yai nimai bak ibou can kin bu lene njiriek tungwagom bu nok gima kikau ug bipek nipekti. Gima rino mben Moab icut bak Daud lene nindigsi nya igo kep belasten bak noni.

³Kikau ba, Daud bindei timek Nibou Ndig Hadadezer di Rehob nipmot de ninyeng tak kepti ei Zoba. Ba, Zoba ne minu ninyeng tak kepti gom di jo dideu minu ndig Damsyik ri. Mpe dima Hadadezer ningat rima kak puig sinon mem gima pindi ninyeng tak kepti di jo dideu Minyei Efrat nibrig hanyen.

⁴Mpe dima lene Daud kat tentara di iba kuda di ibikon pran kan nya ibou sribu gom sratus muhwindacan kin tentara di imbut imig ibou sribu nyatungwagom cem. Leu api Daud cuk nide tentara nya ba, ikos kuda dima yok imig kien ninggiluk noro sindui sut kuda poi di nimangti dem mem gima ikri kroba pran ningat sratus gom bigya.

⁵Lene mben Siria ei Damsyik ipinak ide tentara nya bikwei mpu Nibou Ndig Hadadezer. Noro Daud bindei timek yoni cem lene yai nimai bak yo dima ibou sribu nyatungwagom can.

⁶Leu api Daud hok prak meng yati di nok tentara nibousi di igya coi nya[4] ei ide minu ndig nya ba, ninyeng tak kep yok. Lene igo kep belasten bak noni. TUHAN bindei ba, Daud bindei timek nide siceu nya mem nituti di noni ug kon pran bit yok hagom.

⁷Daud nya ipos Hadadezer de tentara nya ide mun di ibipukep ser tibor ninggwenti nya di iba mas bibon hagom lene ittei biyuug sut ug ei minu ndig Yerusalem.

⁸Ter leu gima lene Daud yai ngkimom-tembaga di nibuhunti nindig bibor leu minu ndig Betah kin Berotai po Hadadezer ninyeng tak kep nya pima.

⁹Lene Daud ninghapti tut nibindei timek Hadadezer de tentara yahagomti tibim kwei ei nibou ndig Tou di bong ei minu ndig Hamat nitingou nsi.

¹⁰Apino noni sok nipigo Nibou Ndig Daudti ei nipmot Yoram dip ba, Yoram bikrau Daud ninda tut gi po bindei timek nide siceu nya pima. Gima hagom nok lewo Hadadezer kon kep pran bit nibou ndig Tou bijo ninno tu. Gima rino Yoram ttei ndigban mas kin perak kin ngkimom-tembaga binjei bak Nibou Ndig Daud.

¹¹Lene Nibou Ndig Daud kwas ndigban dima yok hagom tut TUHAN mem ibibon midut nya. Yai nok gima tut ndigban mas kin perak di pos leu Hadadezer kin mben Edom kin Moab kin Amon kin Filistin kin Amalek yahagom di noni bindei timek yok tu nya cem.

¹³ Tirigi Daud yai nimai bak mben Edom ibou sribu simnaimuhwidip brimigtehiningai ei Mbang Briep Asin leu ba, noni ngkwei hanyen lene tug ndei ninyeng di jei bikum eisi bu.

¹⁴Daud hok prak meng yati di nok tentara nibousi di igya coi nya[5] bidem Edom nisurti-nipekti leu api ninyeng tak kep mben Edom yahagom. TUHAN bindei ba, Daud bindei timek nide siceu nya mem nituti di noni ug kon pran bit yok hagom.

¹⁵Ninyeng tak kep mben Israel titut yam lene ba ningon di gom kin ningon di sren bibon yok cem.

¹⁶Mpe dima lene Daud ta nibou di inyeng jei mem nide limwa nya. Inyeng rino, Yoab di Zeruya nipmot ne nibou tentara ngat ri. Yosafat di Ahilud nipmot ne sekertaris di pas kep srat ei nibou ndig de ig ri. Zadok di Ahitub nipmot kin Ahimelekh di Abyatar nipmot ne imam nya ri. Seraya ne sekertaris di pas kep srat mem Daud ninyeng tak kepti ri.

¹⁸Benaya di Yoyada nipmot ne nibou mem yo di igya ser nibou ndig nonti njem ri. Daud nipmot bat nya rino igyai midyai nok imam ei nide ig.