Read Hatam SAMUEL GI NICAN 9 Bible Online

SAMUEL GI NICAN 9 - Hatam bible

SAMUEL GI NICAN 9

¹ Nijam poi ser lene Daud hig ser tungwatu nya “Saul nide bat nya bihi rino igyaijo e? Gino hi niyaijo lene midingondut no dima ba, dibiyok ngon kep Yonatan.”

²Gima rino tungwatu nya icuk Ziba di nok awak mem Saul nide bat nya pima bipia ug ngat Daud. Lene nibou ndig hig ser noni “Anyeng Ziba e?” Lene noni buhup “Andigpoi e, dinyeng ri.”

³ Lene nibou ndig hig ser noni “Saul nide bat nya bihi no igyaijo e? Dikos tut bipia midingon gom tut Saul tug hon gi dingondut yok bit leu nok dipreu ei mem Allah tu.” Lene Ziba buhup “Andigpoi e, Yonatan nipmot gom nonaha lo, nimig hacem lit.”

⁴Leu api nibou ndig hig ser noni “No dima bong bit tou i?” Lene Ziba buhup “Noni bong bit Makhir di nicig ninyeng Amiel ei Lodebar.”

⁵Gima rino Nibou Ndig Daud sok nihyet bihig Yonatan nipmot dima kwei ngat noni.

⁶Tirigi Yonatan nipmot Mefiboset di nignyon ninyeng Saul kwei su lene kuk no biba ningwak bikik dihyei ei Daud nimig him bikon ninyenga. Lene Daud pigo noni bipai “Mefiboset e?” Leu api Mefiboset buhup “Andigpoi e, dinyeng ri.”

⁷Lene Daud pai binoni “Attin tut au. Lewo midingondut na bidibiyok ngon kep acig di Yonatan. Miditug agnyon Saul de dihyei hanjop nsi hagom hanyen bina ba, disindui sut nani ayem njita bit da ei ig nibou ndig dini kikau cem.”

⁸Lene Mefiboset kuk no biba ningwak bikik dihyei hanyen bu bibuhup “Andigpoi e, ade awak dem mem gima bi! Nggon rino Andigpoi angondut da nok i?”

⁹Lene nibou ndig hig Ziba kwei bipai binoni “Midiyai mun di Saul kin nide bat nya inyeng tut nya bak Mefiboset leu binhyepo noni ba nokep hagom leu nignyon di Saul po aceu pima.

¹⁰Suar nani kin apmot bat kin ade awak nya jahagom jiyai miai ei aceu Saul de hanjop nsi nya mem Saul nide bat nya bibiyai njita ningat nindig bibor mem yok. Noro disindui sut Mefiboset yem njita bit da ei ig nibou ndig dini kikau.” (Ziba yai nipmot bat nya ibou simnaimuhwidip kin nide awak nya ibou ningot can.)

¹¹Lene Ziba buhup “Midiyai hagom bit leu nok na di Andigpoi acuk dati.” Gima rino Mefiboset gwam kui nibou ndig de meja biyem njita noyam kin nibou ndig nipmot bat nindigsi nya.

¹²Mefiboset yai nipmot Mikha. Ziba nide bat nya yahagom yuubon yonti nok awak mem Mefiboset bu.

¹³Gima rino Mefiboset di nimig hacem lit bong ei minu ndig Yerusalem bigwam kui nibou ndig de meja biyem njita ei ig nibou ndig de.