Read Hatam NIBOU NDIG NYA GI NIGOM 13 Bible Online

NIBOU NDIG NYA GI NIGOM 13 - Hatam bible

NIBOU NDIG NYA GI NIGOM 13

¹Mpe dima lene nabi gom ningat rin ei minu Yehuda. TUHAN cuk noni leu binhyepo ug ei minu ndig Betel. Noni ug ba, ug krau hammi tirigi Yerobeam ya kui nimbar hum dok bibon midut nindig mindhe titut kep humti.

² Nabi dima pai kep nimbar hum dok dima bit leu TUHAN nicuk noti bipai “Na di nimbar hum dok e! Na di nimbar hum dok e! TUHAN tri tut bipia Yosia mintun Daud de ig bei nsi nya him. Noni miyai nimai bak imam ngot di ibon midut ei mpia di ikuk yo bak kwar eisi nya kin imam di ibon midut nindig mindhe titut kep humti ei na di nimbar hum dok dip nya cem. Noni mindig tungwatu nya injum cem ei dip.”

³Lene nabi dima binut bu “Nimbar hum dok dini nonti mitti bibindei ba, atriem ndung di jo dip mikiber ug ei dihyeisi ug ri. Gima ne mun di bindo tut bipia TUHAN cuk da kwei ri.”

⁴Hammi tirigi Yerobeam miap nihyet dima rino noni su ninda bindo huk nabi dima lene cuk awak nya “Jikat no dima!” Noro hammi tirigi noni pai nok rino ninda nggicai hak ba, bit bon brim ninda bikrop hanyen kan bi.

⁵Lene nimbar hum dok dima cem lus kros bibindei ba, atriem ndung di jo dip kiber ug ei dihyeisi dem igbit nabi nipaisi di bit leu TUHAN nicuk noti.

⁶Lene Nibou Ndig Yerobeam hara nabi dima “Angat nadi tindei da bak ade TUHAN Allah leu binhyepo Noni ngondut da bikinding dinda bikei hanyen!” Lene nabi dima ngat nadi tindei nibou ndig dima bak TUHAN leu api ninda kei hanyen.

⁷Leu api nibou ndig cigit noni kui ig bipai bak “Akwei ba, ayem njita bit da ei ditde ig. Diba munkwas di kei bibuhup mun di abindei bipek kep mem da.”

⁸Noro nabi dima buhup “Mbro nok gino Na Di Anyeng Jei akwas ade mun di anyeng tut nya nite hi tut da lo, midibit na bidiyem njita cem didut mun ngei hi bit Na Di Anyeng Jei cem bi.

⁹TUHAN cuk da bipia ma diyem njita bididut ndia ngei hi ba, dingkwei hanyen kak puig di dimbut kak kwei pima cem au.”

¹⁰Lene nabi dima ngkwei hanyen bikak puig hiter bu.

¹¹Mpe dima lene nabi andig-ndau gom no bong ei minu ndig Betel. Nipmot bat nya ipui sut nabi leu Yehuda dima nikweisi kin mun di noni bon ei minu ndig Betel mem njap dima kin mun di pai bak Nibou Ndig Yerobeam cem bak icigya.

¹²Leu api nabi andig-ndau dima hig ser yok “Tirigi nabi dima ngkwei hanyen lene kes no kak puig di tou i?” Lene indo puig dima bak.

¹³Lene noni cuk yok leu binhyepo iba mun di gwam dip bijuk nide keledai ninghim mem no. Tirigi kui bigwam keledai dip lene mbut,

¹⁴bram nabi di kwei leu Yehuda lene tau kep noni tirigi gwam kep ninghuisi ei biei ndig behei gom. Lene nabi andig-ndau dima hig ser “Apo nani ne nabi leu minu Yehuda pima rin e?” Lene no dima buhup “I, dani ri.”

¹⁵Lene nabi andig-ndau dima pai bak “Akwei yem njita bit da ei ditde ig ug e.”

¹⁶Noro nabi leu Yehuda dima buhup “Andigpoi e, doom da leu acigit da kui igsi. Midibit na ug ei ade ig ba, diyem njita bididut ndia ngei ei mpia dini bit na cem bi.

¹⁷Lewo TUHAN cuon ser da leu binhyepo diyem njita bididut ndia ngei ba dingkwei hanyen kak puig di dimbut kak kwei pima cem au.”

¹⁸Leu api nabi andig-ndau di bong ei minu ndig Betel dima ris mun bak bibuhup “Dani cem nabi noyam kin nani. TUHAN sok nihyet ei Nide malaikati gom dip kwei bida leu binhyepo dikwei um nani ba, dicigit na kui ig bisiyem njita bit yam.”

¹⁹Apino nabi leu Yehuda dima bit nabi andig-ndau dima ug ei nide ig ba, yem njita bit.

²⁰Tirigi igwam kep njita dima bigyem lene TUHAN mbrap bit nabi andig-ndau dima.

²¹Lene noni pai kep nabi di kwei leu minu Yehuda “TUHAN sindi pai bipia agibit nihyet pima bi. Agiyai mun igbit nicuk na tutti pima bi.

²²Angkwei hanyen tu ba, ayem njita ba, adut ndia ngei cem ei mpia di Noni ggai ser na tut pima tu. Gima rino atug ndei nimai ug rin ba, mibon nituti mem ade bat nya itig angut ei ide jui nsi bi.”

²³Tirigi igyem njita bindei yok tu lene nabi andig-ndau dima ba mun di gwam dip bijuk nabi Yehuda de keledai ninghim,

²⁴leu api nabi dima bri nide keledai bimbut. Lene mindhe singa gom tau bittem noni ei puig sinon leu api bindei mai noni ba, ningut tti bibong ser puigsi lo, nide keledai no ya simin a. Lene mindhe singa cem ya hak niyati.

²⁵Lene tungwatu ibou poi di ikak puig dima ingat lo, nimai ngut jo nijoti ei mpia dima ba, singa cem ya simin. Leu api imbut kikau ug ei minu ndig Betel bitri tut mun di ingat bou igyai him dima.

²⁶Tirigi nabi andig-ndau dima miap tut tu lene pai “Gima ne nabi di bit TUHAN nihyet bi pima ri! Gima rino TUHAN pinak singa dima di ttem noni biyai nimai bak dem igbit TUHAN nipai sutti di nipou pima ri.”

²⁷Leu api nabi andig-ndau dima pai bak nipmot bat nya “Jikon mun di digwam dip bijibijuk ditde keledai ninghim.” Tirigi kui bigwam nide keledai dip tu lene bimbut,

²⁸bitau kep nabi leu minu Yehuda pima ningut bingat lo, ningut jo hak ser puig lene keledai kin singa pima igya simin. Noro singa ttem keledai dima ba, yem nimbiam ngut dima cem bi.

²⁹Lene nabi dima kon nimbiam ngut bikes ei nide keledai dip leu api bittei ba, ngkwei hanyen tut ug ei minu ndig Betel lene pim kep bitig.

³⁰Nabi andig-ndau dima nonti tig nimbiam ngut dima ei nide bat nya ide jui nsi leu api ya tut nipmot bat nya ba, ipim kep bipai “Disut ndia ug o! Dingondut na o! Disut ndia ug o!”

³¹Itig nimbiam ngut tu lene nabi andig-ndau dima pai bak nipmot bat nya “Mpe dino dimai lene ma jitig da ei jui nsi dini ba, jiprion dingut simin nabi dima ningut,

³²lewo nipai kep nimbar hum dokti ei minu ndig Betel dima kin mpia di ikuk yok bak kwar eisi nya di jo bidem minu ndig nya ei hanjop Samaria hagom cem bit leu TUHAN nicuk noti mipek kep yo.”

³³Nibou Ndig Yerobeam krau kep nibon munti di kinei-kinau kikau ba, gikes hon bi. Ninda jo kep nindo imam nya leu nide limwa nimikuisi nya ikieti leu binhyepo ibon midut nya ei mpia ttou nsi ngot di win mem nikuk no bak kwar eisi nya. Tungwa tou rino joi sut lene kon binok imam.

³⁴Nibon munti di kinei-kinau dima bindei ba, yo di intun noni him itug ndei hukum di buhun bibor ba, ibisar bihigom.