Read Hatam NIBOU NDIG NYA GI NIGOM 14 Bible Online

NIBOU NDIG NYA GI NIGOM 14 - Hatam bible

NIBOU NDIG NYA GI NIGOM 14

¹Mpe dima lene ninggwen cut igkep Abia di Yerobeam nipmot

²Gima rino Yerobeam cuk nitnem “Atin ei ba, abisinggre ba aluei atta binok sop hiter leu binhyepo hi ngat igbit nani bi. Leu api aug ngat Nabi Ahia ei nide ig ei Silo. Nabi Ahia dima ne no di nipou pini jug pai sut bipia midikui nok nibou ndig mem mben Israel pima ri.

³Ma apwoi roti nindak simnai kin roti nyop poi mien kin ahwei lon ningei ampou gom ba, ayai binoni. Ahig ser noni tut mun di mipek kep mem sipmot Abia leu api noni mipai sut bina.”

⁴Leu api Yerobeam nitnem kiju bimbut ba, ug ngat Nabi Ahia ei nide ig ei Silo. Nabi dima wer andig-ndau bibor tu ba, niyai tu tu.

⁵Noro TUHAN pai binoni bibie bipia Yerobeam nitnem mikwei ngat noni ba, mihig noni tut nipmot di nggwen pima. Lene TUHAN pingok Nabi Ahia ningonti tut mun dima noni mibuhup bak cem. Tirigi Yerobeam nitnem kwei krau Nabi Ahia nidim lene bisinggre biluei nitta binok sop hiter.

⁶Noro tirigi Nabi Ahia miap nimig di mbrap bit mpia ei dimbou heisi lene pai hak “Dikan tut nani ne Yerobeam nitnem rin ba, acoi kwei. Abisinggre ba, aluei atta nok hiter au. Nihyet di buhun no jo mem nani.

⁷Angkwei hanyen ba, apai sut bak Yerobeam bipia TUHAN Allah mben Israel pai ‘Didimig na di Yerobeam leu limwa Israel ikieti bidikon nani nok no di ninyeng tak kep Ditde limwa Israel tu.

⁸Dibrim Daud de ninyeng tak kepti nite hi leu nide nintun him yamti di bram yam nya bidiyai binani tu. Noro ayai bram Ditde awak di Daud niyai kepti nya bi. Noni ba ningon di gom hak bibit Dani kin dicuk noti nya cem. Noni bon kep mun di dijoi sut nya he.

⁹Noro tut nani ne abon mun di kinei nindig bibor dor tunggwei mun di kinei di yo di inyeng tak kep mben Israel ibonti nya pima nipou tirigi anyeng tak kep yok bigyo. Aba anghim bak Dani lene abindei ba, digga bibor tug hon gino abindei ba, tungwatu nya iba ngkimom nitu bibon kwar nya ba, ikuk yok bak cem tu.

¹⁰ Gima rino midikes hukum di buhun bibor ei na di Yerobeam ade nintun him di bram yam nya dip drek dip abon munti dima. Midiyai nimai bak munggwom pinai di intun nani him hagom bitut yo di igyati kwes kin awak nya cem yahagom. Midicok tut ade ig bei nsi nya yahagom noyam kin gi tungwatu nya icok mindhe nooi bipwoi leu cem.

¹¹Nsien miyem yo di inggre kin ade ig bei nsi nya di imai ei minu ndig nya ingut bingwig lene ha krubri nya mipuk bigyem gi hi di imai ei ngoi dumti di gahai minu ndig nya bingwig bu. Da di TUHAN dipai dihyet tu ba, ma ayok ngon kep!’ ”

¹²Lene Nabi Ahia binut bu bipai bak Yerobeam nitnem “Yo. Nogindini ma anyohou ngkwei hanyen leu api hammi tirigi acoi ug ei ade minu ndig dima rino apmot mimai ug ri.

¹³Limwa Israel yahagom mipim kep noni leu api itig. Apmot dima nongkom ngat he rino mitug ndei nitig ningut igbitti leu yo di intun Yerobeam him yahagom. Lewo nongkom ngat he rino pwoi TUHAN di Allah mben Israel ningona.

¹⁴TUHAN mikon nibou ndig gom mem mben Israel leu api no dima micok tut yo di intun Yerobeam him bingwig leu gima inyeng tak kep mben Israel nok nibou ndig a. Tto bou dideu kwei su! Jam dem mem,

¹⁵TUHAN kinyon ei midyai nikes hukum ei mben Israel dipti tu. Apino yoni midem kep krun di kit-kit nyen ei minyei di biam sindemti. TUHAN mohom mben Israel leu minu di nnum kei di Noni yai bak idigup bat-idigai bat nya nipou su dini. Noni mibindei ntek gimahap yok ug ei Minyei Efrat nite dima ug. Lewo ibindei ba, TUHAN gga yok drek dip kwar sop Asyera ngot di ibon nya.

¹⁶TUHAN mikes ninda leu mben Israel drek dip sisar di Yerobeam bon nya di bindei di mben Israel cem ibon sisar.”

¹⁷Tirigi Nabi Ahia pai gima yok hagom bak tu lene Yerobeam nitnem kiju bingkwei hanyen ug ei Tirza. Hammi tirigi noni su nimig bicoi ug ei nide ig lene nipmot ninnei kimbas bimai.

¹⁸Lene limwa Israel ipim kep leu api itig dem igbit TUHAN nipaisi di tug hon Nide awak di Nabi Ahia.

¹⁹Nipui mun nindigsi nya tut Nibou Ndig Yerobeam de ninyeng tak kepti kin nibie tut tentara di ikon kep pran nyati hagom jo ei srat Nibohon Nibou Ndig Mben Israel Nyati.

²⁰Yerobeam ne nibou ndig di ninyeng tak kep mben Israel kikau mem nijam ari bingwam nyatungwagom ba, can ri. Leu api mai ba, itig leu api nipmot Nadab ya luei nohoti bigwam nok nibou ndig bu.

²¹Tirigi Rehabeam di Salomo nipmot kui bigwam nok nibou ndig mem minu Yehuda lene nide njap ug ei ari bingwam ningot bitai ba, gom. Ninyeng tak kep timiei Yehuda nya kikau ei nijam ari bingwam simnaimuhwidip brimigtehican ei minu ndig Yerusalem. TUHAN dimig minu ndig dima leu minu Israel nindigsi nya ikieti pijum ei nok gumihyep di mben Israel ikuk yok bak Noni eisi. Rehabeam nipmem ninyeng Naama ba, noni ntun mben Amon him.

²²Mpe dima lene timiei Yehuda ibon sisar di kinei bibor tut TUHAN leu api sisar dima bindei ba, TUHAN gga yok bibor dor njiriek nigga idigup bat-idigai bat nya drek dip ide sisar di ibon nya.

²³ Iwin mpia ttou nsi di mem ikuk yok bak kwar nya eisi ba, iba tig di jei biwin dihim di itas pijum nya di mem ide kwar sop Asyera cem itas kwar nisop dima ei mbigdip nya kin biei di nimeng nggrou nibehei nya cem bikuk yok bak eisi.

²⁴ Ibon nicut tut yamti ei mpia ttou nsi dima yok leu binhyepo iba nisinati dima bikuk yok bak kwar nya. Pinai nya cem ibon yonti nok sundal ei mpia dima. Timiei Yehuda ibon kep sisar di kinei bibor ninyeng hagom noyam kin timiei minu dima ibon kepti nya tirigi po TUHAN jji yok leu itimieisi ei mpe di mben Israel icoi bigyai bigyati pima.

²⁵ Rehabeam ninyeng tak kep timiei Yehuda nya mem nijam ari bingwam muhwi leu api Sisak di nok nibou ndig mem mben Mesir kwei hwen minu ndig Yerusalem.

²⁶ Lene noni pos mun di nibok kak ei TUHAN De Ig nya hagom kin gi hi di jo ei nibou ndig de ig nindig hagom bitut mun di tentara nya isu ba, ibipukep tibor nggwen nya di Salomo ba mas bibon nya cem hagom bimbut tut.

²⁷Leu api Nibou Ndig Rehabeam ba ngkimom-tembaga bibon mun di ibipukep tibor nggwen nya ba, kes biluei niceti hanyen. Noni kes hagom bak yo di igya ser dimbou pmem ei nibou ndig de ig lene ba ningon com yok tut.

²⁸Bikwop mpe di nibou ndig ug ei TUHAN De Ig lene yo di igya ser pima ittei mun di ibipukep tibor nggwen dima yok bingkwei hanyen tut ei tentara nibousi di igya coi.

²⁹Nipui mun nindigsi nya tut Nibou Ndig Rehabeam niyai munti nya hagom jo ei srat Nibohon Nibou Ndig Yehuda Nyati.

³⁰Rehabeam kin Yerobeam ikon pran bit yam nyen-nyen kikau mem nijam jei di Rehabeam ninyeng tak kep timiei Yehuda nya.

³¹Rehabeam mai lene itig ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Abiam ya luei nohoti bigwam nok nibou ndig bu.