Read Hatam NIBOU NDIG NYA GI NIGOM 15 Bible Online

NIBOU NDIG NYA GI NIGOM 15 - Hatam bible

NIBOU NDIG NYA GI NIGOM 15

¹Tirigi nibou ndig Yerobeam ninyeng tak mben Israel mem nijam ari bingwam simnaimuhwidip brimigtehiningai tu lene Abiam kui bigwam nok nibou ndig mem timiei Yehuda nya,

²bibong ei minu ndig Yerusalem ba, ninyeng tak kep yok mem nijam ari bingwam ningai. Nidrot rino Maakha di Absalom nipmisop.

³Abiam bon kep sisar di nicig bon kep di nipou nya. Noni ba ningon di gom bibit nide TUHAN Allah hak noyam kin nidigup di Daud bi.

⁴ Noro TUHAN Allah di Daud kuk no bak yai nipmot gom bak Abiam drek dip TUHAN ningon di a tut Daudti. Nipmot dima ya luei Abiam nohoti ba, ninyeng tak kep timiei Yehuda nya. Noni bong ei minu ndig Yerusalem leu binhyepo bikat minu ndig dima bingkiem.

⁵ TUHAN yai nok gima drek dip Daud po yai mun bipwoi TUHAN ningon pima. Daud bon mun tunggwei TUHAN nicuk noti nya bi. Noro nitunggwei sutti gom rino munhyet po kim Uria di mben Het pima.

⁶ Rehabeam kin Yerobeam ikon pran bit yam ba, ikinyon eisi leu nijam di Rehabeam ninyeng tak kep timiei Yehuda nya bimbut kikau ug bipek nijam di Abiam ninyeng tak kep cem.

⁷Nipui mun nindigsi nya tut Abiam niyai munti nya hagom jo ei srat Nibohon Nibou Ndig Yehuda Nyati.

⁸Leu api Abiam mai lene itig ei Daud De Minu Ndig. Lene nipmot Asa ya luei nohoti bigwam nok nibou ndig bu.

⁹Tirigi Nibou Ndig Yerobeam ninyeng tak kep mben Israel mem nijam ari bingwam nyatungwagom tu lene Asa kui bigwam nok nibou ndig,

¹⁰bibong ei minu ndig Yerusalem ba, ninyeng tak kep timiei Yehuda nya mem nijam ari bingwam ningot bitai ba, gom. Nidrot rino Maakha di Absalom nipmisop.

¹¹Asa pwoi TUHAN ningon noyam kin nidigup di Daud.

¹² Noni cok tut pinai kin sop sundal di igyai midyai ei mpia ttou nsi di ikuk yok bak kwar nya eisi hagom. Lene cok tut kwar ngot po nibou ndig di nipou inyeng tak kep timiei Yehuda nya iwin mem gima ikuk yok bak nya hagom leu minu Yehuda.

¹³Lene bindei cut Maakha ninyeng leu nibou ndig sop cem. Lewo nidrot dima bon kwar di kinei bibor mem kwar sop Asyera di tungwatu nya ikan bipia bindei mun nyeng hagom nnum kei. Asa nggek kwar di ikuk yok bak dima bindig kep hum ei Mbang Briep Kidron.

¹⁴Mbro nok gino Asa cok tut mpia di ikuk yo bak kwar nya eisi hagom bi lo, noni ba ningon di gom bibit TUHAN nihyet kikau buug bimai kep.

¹⁵Noni ngkwei mun di iba mas kin perak bibon nya po nicig dimig ei pijum bak TUHAN tu pima hagom hanyen ei TUHAN De Ig bitut nide mun di ba mas kin perak bibon di nonti njem dimig pijum ei bak TUHAN nya cem.

¹⁶Nibou ndig Asa di nok nibou ndig mem mben Yehuda kin Baesa di nok nibou ndig mem mben Israel ikon pran bit yam kikau mem nijam di inyeng tak kep ide limwa nya.

¹⁷Baesa kiju bikon pran bit timiei Yehuda nya lene biwin minu ndig Rama bibindei ba, sindem bibor leu binhyepo binggam ser minu Yehuda de puig di imbut kak mem gima ingkwei-ngkwei nyen kep ide hanjop dima.

¹⁸Gima rino Nibou Ndig Asa kon nimbumbati di iba mas kin perak bibon mem TUHAN De Ig kin nibou ndig de ig nindig cem hagom ba, pinak bak Benhadad di nok nibou ndig mem mben Siria ei Damsyik. Benhadad ne Tabrimon nipmot ba, Hezion nignyon ri. Asa ba ndigban dima yok bicuk yo di igya kui noni ei nide ig nibou ndig ibou poi bisok nihyet ei yok dip bak Benhadad bipai,

¹⁹“Na di Andigpoi e, ma akwei ba, siyok singon gom noyam kin gi po side ndig poi nya igyok ingon gom nipou pima. Bitut dihyet dini ne dinjei mun di iba mas kin perak bibon dini bak nani. Lene dibahara na di Andigpoi leu binhyepo anggre kin Baesa di nok nibou ndig mem mben Israel bu au. Ayai nok gima leu binhyepo noni mibrim nide tentara nya leu ditde hanjop di dinyeng tak kep dini.”

²⁰Lene Benhadad ce tut nibou ndig minu Yehuda ningon kanti dima. Leu api cuk nide nibou tentara nya bigya tut ide tentara nya bihwen mben Israel ide minu ndig nya. Lene ibindei timek minu ndig Iyon kin Dan kin Abel-Bet-Maakha kin Kinerot di jo dideu Igpong Galilea bitut hanjop keret Naftali titut yam cem.

²¹Tirigi Baesa miap tut mun di cut igkep mben Israel dima lene kes ninda tut midyai di yai di bindei sindem minu ndig Rama pima leu bingkwei hanyen ug ei Tirza. Lene bong hak ei Tirza ba, gikon pran mem nijam dima bu bi.

²²Gima leu lene Nibou Ndig Asa cuk nide limwa Yehuda nya yahagom hak leu ba, hi di gwam bi noro yahagom ipian tig kin biei di Baesa mbus keyam ei minu ndig Rama mem gima biyai midyai nibindei sindem minu ndig dima buug sut ug ei minu ndig Mizpa kin Geba leu binhyepo Asa ba nimbumbati dima mem biyai midyai nibindei sindem minu ndig cin dima. Geba ne minu ndig gom ei keret Benyamin ide hanjop nsi ri.

²³Nipui mun nindigsi nya tut Nibou Ndig Asa niyai munti nya kin nibrim ningkekti kin midyai nibindei sindem minu ndig nya hagom jo ei srat Nibohon Nibou Ndig Yehuda Nyati. Ninggwen ninyeng gom hwen Asa nimig cin ei nijam di wer andigpoi su.

²⁴Leu api noni cem mai lene itig ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Yosafat ya luei nohoti bigwam nok nibou ndig bu.

²⁵Tirigi Nibou Ndig Asa ninyeng tak kep timiei Yehuda nya mem nijam ari bingwam can tu lene Nadab di Yerobeam nipmot ya luei nicig nohoti bigwam nok nibou ndig mem mben Israel ba, ninyeng tak kep yok mem nijam ari bingwam can.

²⁶Noni cem bon sisar di kinei bibor tut TUHAN noyam kin nicig di ninyeng tak kep mben Israel nipou su. Niyai munti dima bindei ba, mben Israel cem ibon sisar.

²⁷Mpe di gom tirigi Nadab ya tut nide tentara nya ba, igyon ttai minu ndig Gibeton ei mben Filistin ide hanjop nsi lene Baesa di Ahia nipmot di ntun keret Isakhar him njei siceu ba, ya kep bihwen Nadab biyai nimai bak.

²⁸Mun dini cut igkep Nadab tirigi Asa ninyeng tak kep timiei Yehuda nya mem nijam ari bingwam ningai su. Gima rino Baesa kui bigwam nok nibou ndig mem mben Israel biya luei Nadab nohoti bu.

²⁹ Haninyai tirigi Baesa kui bigwam nok nibou ndig lene noni yai nimai bak Yerobeam de ig bei nsi nya bitut nide bat nya yahagom. Gima dem igbit TUHAN nikwai ceti di pai tug hon Nide awak di Nabi Ahia leu Silo nuhui him pima. Apino Baesa yai nimai bak yo di intun Yerobeam him yahagom ba, hi di ningwes ngun bi.

³⁰Mun di buhun dini cut igkep yok lewo Yerobeam bindei ba, TUHAN Allah di mben Israel ikuk yok bak gga bibor drek dip sisar di noni bon kin sisar di noni bindei ba, mben Israel cem ibon.

³¹Nipui mun nindigsi nya tut Nadab niyai munti nya jo ei srat Nibohon Nibou Ndig Mben Israel Nyati.

³²Baesa di nok Nibou Ndig mem mben Israel kin Asa di nok Nibou Ndig mem timiei Yehuda nya ikon pran bit yam kikau mem nijam di inyeng tak kep ide limwa nya.

³³Tirigi Nibou Ndig Asa ninyeng tak kep timiei Yehuda nya mem nijam ari bingwam ningai lene Baesa di Ahia nipmot kui bigwam nok nibou ndig ba, ninyeng tak kep mben Israel titut yam. Noni bong ei Tirza ba, ninyeng tak kep mben Israel mem nijam ari bingwam nyatungwagom ba, bitai.

³⁴Noni cem bon sisar tut TUHAN lene bindei ba, mben Israel icut ei nibon sisarti noyam kin Nibou Ndig Yerobeam di ninyeng tak kep mben Israel pima cem di bindei ba, mben Israel icut ei sisarti nipou pima.