Read Hatam NIBOU NDIG NYA GI NIGOM 16 Bible Online

NIBOU NDIG NYA GI NIGOM 16 - Hatam bible

NIBOU NDIG NYA GI NIGOM 16

¹Lene TUHAN sok nihyet ei Nabi Yehu di Hanani nipmot dip bak Baesa bipai “Ma atri tut dihyet dini bak Baesa,

²‘Nipou yo lene abon anyeng bi noro dikon na ba, anok nibou di bie tut Ditde limwa mben Israel leu api nogindini abon sisar noyam kin Yerobeam. Abindei ba, Ditde limwa mben Israel cem icut ei nibon sisarti apino sisar dima bindei ba, digga bibor.

³Gima rino midicok tut nani kin ade ig bei nsi nya bitut ade bat nya yahagom noyam kin hukum di dikes ei Yerobeam dip pima.

⁴Nsien miyem yo di inggre kin ade ig bei nsi nya di imai ei minu ndig nya ingut bingwig lene ha krubri nya mipuk bigyem gi hi di imai ei ngoi dumti di gahai minu ndig nya bingwig bu.’ ”

⁵Nabi Yehu tri tut TUHAN nihyet di sok ei noni dip bak Baesa kin nide ig bei nsi nya dima drek dip nide nibon sisarti di kinei bou TUHAN Niyai him. Baesa bindei ba, TUHAN gga bibor drek dip sisar di kinei bibor dima he bi noro drek dip niyai nimai bak Yerobeam de ig bei nsi nya yahagom hak pima cem. Nipui mun nindigsi nya tut Baesa niyai munti nya kin nibrim ningkekti nya hagom jo ei srat Nibohon Nibou Ndig Mben Israel Nyati. Baesa mai lene itig ei Tirza leu api nipmot Ela ya luei nohoti bigwam nok nibou ndig bu.

⁸Tirigi Nibou ndig Asa ninyeng tak kep timiei Yehuda nya mem nijam ari bingwam nyatungwagom ba, muhwindagom tu lene Ela di Baesa nipmot kui bigwam nok nibou ndig ba, ninyeng tak kep mben Israel. Noni bong ei Tirza lene ninyeng tak kep mben Israel mem nijam ari bingwam can.

⁹Nibou tentara Zimri di bie tut tentara di ikrau kroba pran kan nimpung gom yok ningon gom mem gima ham nimbuk kep nibou ndig Ela. Mpe di gom tirigi Ela gwam bit Arza nibou di nyohou ig nibou ndig de dima ei Tirza lene Ela dut-dut nyen mun di pu no kikau ba, nibou ngwakti sibui.

¹⁰Lene Zimri coi ug ei ig dima biyai nimai bak Ela hak leu api kui bigwam nok nibou ndig biya luei Ela nohoti bu. Zimri yai nimai bak Ela tirigi Nibou Ndig Asa ninyeng tak kep timiei Yehuda nya mem nijam ari bingwam nyatungwagom ba, muhwindacan tu.

¹¹Haninyai tirigi Zimri kui bigwam nok nibou ndig tu lene noni yai nimai bak Nibou Ndig Baesa de ig bei nsi nya yahagom bitut nide bat nya kin nisut bat di pinai nya cem ba, hi di ningwes ngun leu ninda nsi bi.

¹²Gi yai nimai bak Baesa de ig bei nsi nya yahagom dima dem igbit mun po TUHAN sok bak Baesa tug hon Nabi Yehu pima ri.

¹³Baesa kin nipmot Ela ikuk yo bak kwar nya bibindei ba, mben Israel icut ei sisarti. Gima rino ibindei ba, TUHAN Allah di suar mben Israel ikuk yok bak dima gga bibor.

¹⁴Nipui mun nindigsi nya tut Ela niyai munti nya jo ei srat Nibohon Nibou Ndig Mben Israel Nyati.

¹⁵Tirigi Nibou Ndig Asa ninyeng tak kep timiei Yehuda nya mem nijam ari bingwam nyatungwagom ba, muhwindacan tu lene Zimri kui bigwam nok nibou ndig mem mben Israel bibong ei Tirza ba, ninyeng tak kep mben Israel ei ninsi njap muhwindacan. Mpe dima lene tentara Israel yuug yon ttai mben Filistin ide minu ndig Gibeton.

¹⁶Tirigi tentara nya imiap tut Zimri di yok ningon gom mem gima ham nimbuk kep nibou ndig Ela biyai nimai bak tu lene yahagom ikon ide nibou tentara Omri nok nibou ndig mem mben Israel mem njap dima ei mpia di yohok ide prak meng eisi dima.

¹⁷Leu api Omri ya tut nide tentara nya ba, ikiju bijo leu Gibeton biyuug yon ttai minu ndig Tirza.

¹⁸Tirigi Zimri ngat lo, ibindei timek minu ndig dima bigyai bigyati tu lene noni coi ug ei nide ig nibou ndig bipindei ba, hum yem hagom bitut nonti njem cem biyahagom itimek.

¹⁹Hukum dini cut igkep noni drek dip nibon sisar di kinei bibor bou TUHAN niyai him ri. Zimri bon sisar tut TUHAN noyam kin sisar di Yerobeam bon pima di bindei ba, mben Israel nya icut ei sisarti.

²⁰Nipui mun nindigsi nya tut Zimri niyai munti nya kin niyok ningon gom mem gima ham nimbuk kep nibou ndig cem jo ei srat Nibohon Nibou Ndig Mben Israel Nyati.

²¹Mpe dima lene mben Israel ikwas yam hacan lewo bihi ibidip huk yam leu binhyepo ikon Tibni di Ginat nipmot ninyeng nok nibou ndig noro nindigsi nya itti kin Omri leu binhyepo ikon ninyeng nok nibou ndig.

²²Leu api yo di itti kin Omri ibindei timek yo di itti kin Tibni. Tibni mai lene Omri kui bigwam nok nibou ndig bu.

²³Gini cut igkep yok tirigi Nibou Ndig Asa ninyeng tak kep timiei Yehuda nya mem nijam ari bingwam ningot ningai ba, gom. Omri ninyeng tak kep mben Israel mem nijam ari bingwam simnaibrimigcan. Ninyeng tak kep mben Israel ei Tirza mem nijam ari bingwam muhwindagom di nimbie him.

²⁴Noro niabiati bu lene ba mitiei perak nitig sribu muhwindagom bipek nungug tou gom leu tungwagom di Semer leu api win minu ndig gom ei nungug tou dima dip bijem ninyeng Samaria. Noni ba Semer ninyeng bijem nungug tou dima ninyeng lewo Semer ninda rom nipou su.

²⁵Omri de sisar di bon nya dor tunggwei sisar di nibou ndig di inyeng tak kep mben Israel nipou su nya yahagom ibon nya.

²⁶Noni bon sisar di bindei ba, mben Israel cem icut ei sisarti. Noni kuk no bak kwar nya cem noyam kin Yerobeam bibindei ba, mben Israel icut ei sisarti. Tug hon nisinati dima ibindei ba, TUHAN Allah di suar mben Israel nya ikuk yok bak dima gga bibor.

²⁷Nipui mun nindigsi nya tut Nibou Ndig Omri niyai munti hagom jo ei srat Nibohon Nibou Ndig Mben Israel Nyati.

²⁸Tirigi Omri mai ba, itig ei Samaria lene nipmot Ahab ya luei nohoti bigwam nok nibou ndig bu.

²⁹Tirigi Nibou Ndig Asa ninyeng tak kep timiei Yehuda nya mem ari bingwam ningot ningai ba, muhwindaningai lene mben Israel ita Ahab di Omri nipmot nok ide nibou ndig leu api ninyeng tak kep yok ei Samaria mem ari bingwam nyatungwagom ba, can.

³⁰Noro noni bon sisar tut TUHAN nindig bibor dor njiriek mben Israel ide nibou ndig nitimiei nya yahagom.

³¹Noni bon sisar noyam kin Nibou Ndig Yerobeam nide sisar he bi noro kum eisi bu tirigi noni wak Izebel di Nibou Ndig Etbaal leu Sidon nipmisop ba, kuk no bak kwar Baal cem.

³²Noni ngot ig nikuk no bak Baal eisi ei Samaria ba, win nimbar hum dok mem Baal cem bikon ug ei ig dimati.

³³Lene noni bon kwar di dat kwar Asyerati. Niyai munti di kinei bibor dima bindei ba, mben Israel ide TUHAN Allah di suar ikuk yok bak ningon sibui sut noni nindig bibor dor njiriek nibou ndig mben Israel nitimiei nya yahagom.

³⁴ Ei nijam di Ahab ninyeng tak kep mben Israel lene Hiel di timiei minu ndig Betel gom win minu ndig Yerikho hanyen bu. Hammi tirigi noni kinyon ei minu dima nikiou biwin rino Abiram di nipmot mighumbou tug ndei nimai. Leu api hammi tirigi noni kon dimbou pmem bitas ei ngug tig di bikrop ttai minu dima rino Segub di nipmot nipumiap tug ndei nimai bu bit leu nok mun po TUHAN pai sut tug hon Yosua di nicig Nun nipou su pima.