Read Hatam NIBOU NDIG NYA GI NIGOM 2 Bible Online

NIBOU NDIG NYA GI NIGOM 2 - Hatam bible

NIBOU NDIG NYA GI NIGOM 2

¹Son dideu Daud niyaijo ningwig honti lene noni hig nipmot Salomo kwei bipingok ningonti ningwigsi kep bipai,

²“Son dideu diyaijo ningwig honti tu. Gima rino ma angon gom ba, abrim angkek,

³leu binhyepo ayai igbit ade TUHAN Allah nicuk nati nya hagom. Abit Nide niggai serti kin nicukti di Musa pas kep tu nya hagom leu binhyepo ningat nindig bibor mintun ayai munti nya hagom him bidem minu di aya bidem eisi nya.

⁴Gino abit TUHAN nihyet lene Noni miyai hagom bit leu nok Noni preu ei mem da tut ditde nintun him yamti di bram yam nya. Gino iba ingon gom bibit TUHAN nihyet lene inyeng mitak kep mben Israel bram yam kikau.

⁵ Lene dipai dingon kanti gom kin bu. Ayok ngon kep bipia Yoab bon mun tunggwei sut da tirigi noni hwen mben Israel ide nibou pran ibou can di Abner di Ner nipmot kin Amasa di Yeter nipmot pima. Mbro nok gino mben Israel ikon pran mem nijam dima bi ba, Abner kin Amasa ingon ngun lo, Yoab ba ningon nggrom bihwen yok drek dip tungwatu nya di yoni ihwen mem nijam di nyeni ikon pran nipou su. Nogindini dibiang nide niyai munti dima nibuhunti ba, ditug ndei ninghuisi wei drek dip.

⁶Dipmot na e, ma abuhup binoni bit leu angon kanti lene ma asindui sut noni bimai he ei niwer andig-ndausi au.

⁷ Noro ma asingat tut Barzilai leu Gilead nipmot bat nya ba, anyohou yok lewo ingondut da tirigi dinang leu akindig Absalom pima.

⁸ Dipai dingon kanti bu tut Simei leu Bahurim di nicig ninyeng Gera pima. Njap di dinang ug ei Mahanaim pima lene noni mbriom da nindig bibor kak puig sinon. Noro tirigi dingkwei hanyen bidisigon Minyei Yordan lene diba neheng bipreu ei binoni tug hon TUHAN ninyeng bipia midikes hukum nimai ei noni dip bi.

⁹Noro dicuk na bipia ma no dima ningwes ngun leu hukum au. Dikan tut bipia angon ki. Mbro nok gino noni wer andig-ndau su lo, suar abindei ba, noni cem tug ndei hukum nimai.”

¹⁰Lene Daud mai ba, itig ei Minu Ndig Daud.

¹¹ Daud ninyeng tak kep mben Israel mem ari bingwam muhwindacan ei Hebron lene mem ari bingwam ningot ningai ba, ningai ei minu ndig Yerusalem. Nimangti hagom sok yam ne ari bingwam ningot bitai ri.

¹² Salomo ya luei nicig Daud nohoti nok nibou ndig di nijep bu ba, ninyeng tak kepti sindem bibor ba, nddong kei cem.

¹³Mpe di gom lene Adonia ug ngat nidrot Batsyeba leu api Batsyeba hig ser noni “Aba angon di gom bikwei cem kep da e?” Lene Adonia buhup “Igbit,”

¹⁴bikum eisi bipai bak “Dahara Amei tut mun nyeng gom.” Batsyeba hig ser noni “Ahara da tut mindei ngan i?”

¹⁵Lene Adonia buhup “Amei e, akan tut bipia ningat ne suar dani rima diya luei dicig nohoti nok nibou ndig. Ba, mben Israel yahagom ingon ya mem gima nipou su. Noro mun dima gipek kep mem da nok gima bi ba, dikinjoi ya luei dicig nohoti binok nibou ndig bit leu TUHAN ningon kanti mem noni.

¹⁶Amei e, ma arok da tut dingon kanti gom dini au.”

¹⁷ Lene Batsyeba hig ser noni “Ahara da tut mindei i?” Lene Adonia buhup “Dahara Amei leu binhyepo ambrap bit Nibou Ndig Salomo leu binhyepo noni ce tut Abisag di sop timiei Sunem pima bidiwak nok ditnem. Dikan tut bipia gino na di Amei ambrap bit noni tut lene noni mirok ditde nahara nati dima bi.”

¹⁸Lene Batsyeba buhup “Kei. Midimbrap bit nibou ndig tut angon kanti dima.”

¹⁹Lene Batsyeba ug sut Adonia ningon kanti dima buug ngat nibou ndig biya hacan mem Adonia. Nibou Ndig kiju biya um nipmem lene bikuk no bak leu api gwam jug ei nide banggo mbrei dip hanyen. Lene cuk nide awak hi bikon bilen mbrei hi mem nipmem bigwam dip bei ninda com.

²⁰Tirigi Batsyeba gwam jug tu lene pai bak “Da di apmem dahara na tut mun nyeng gom he. Diba dingon com bipia arok da bitut mun di dahara na tut cem bi.” Lene Salomo hig ser noni “Amei e, ahara da tut mindei ngan i? Midirok angon kanti dima bi.”

²¹Leu api Batsyeba buhup “Gi nok lene ma asindui sut ba, akindig Adonia wak Abisag hak ug.”

²²Lene Salomo hig ser noni “Amei e, nggon rino ahara da tut mun dima i? Ahara da leu binhyepo dikes dinyeng nibou ndig bitut banggo mbrei dini cem bak Adonia e? Jo nibreisi bipia noni ne dikindig rin ba, Imam Abyatar kin Yoab itti kin noni.”

²³Tirigi Salomo pai nok leu lene heng bitug hon TUHAN ninyeng bipai “Handei kon ba, TUHAN sigion dani hak ug gino dikes hukum nimai ei Adonia dip drek dip ningon kanti di noni hara da tut dima bi!

²⁴TUHAN kon da bikes da ei dicig Daud de banggo mbrei ba, Nide nipreu ei mem dati pek kep mem da tu. Noni bindei ba, dani kin ditde nintun him di bram yam inyeng mitak kep mben Israel. Deheng bitug hon TUHAN di niyaijo ninyeng bipia Adonia mitug ndei nimai mem njap di ammani ug ri!”

²⁵Apino Nibou Ndig Salomo kes ningon kanti dima nyahan bak Benaya leu api Benaya ug yai nimai bak Adonia.

²⁶ Leu api Nibou Ndig Salomo pai bak Imam Abyatar “Angkwei hanyen ug ei atimieisi di Anatot. Dem tut gima dikes hukum nimai ei nani dip hak ug noro midibindei ba, atug ndei hukum nimai njap di ammani bigyo. Nok leu mpe di po angat rin bit dicig pima lene ayai anghuisi di wei bit noni ba, nani rino anyohou TUHAN de Brua Gi Preu pima cem.”

²⁷ Leu api Salomo cut Abyatar leu ninyeng imam. Tug hon Salomo niyai munti dima ne mun di TUHAN pai ei Silo tut imam Eli de nintun him yamti di bram yam nya cut igkep yok tu.

²⁸Yoab miap tut mun di pek kep dima hagom tu lene ttin tut bibor drek dip gi nipou ne noni tti kin Adonia noro tti kin Absalom bi. Gima rino noni nang ug ei TUHAN De Prak Meng bikat nimbar hum dok nikoisi nya.[2]

²⁹Leu api hi pai Yoab ninghapti bak Nibou Ndig Salomo apino nibou ndig cuk Benaya ba, ug yai nimai bak Yoab.

³⁰Benaya ug ei TUHAN De Prak Meng bipai bak Yoab “Nibou Ndig cuk na leu binhyepo ahei kwei o!” Noro Yoab buhup “Dikou, miditug ndei nimai ei mpia dini.” Leu api Benaya ngkwei hanyen bipai sut Yoab nibuhupti dima bak nibou ndig.

³¹Miap tu lene nibou ndig cuk Benaya “Aug hanyen ba, ayai nimai bak Yoab bit leu nok nipaisi dima leu api atig. Leu binhyepo dani kin dicig de nintun him yamti di bram yam nya nibiang nibuhunti drek dip Yoab nibon mun tunggweisi di yai nimai bak yo cin di ingon ngun pima bi.

³²TUHAN mikes hukum nimai ei noni dip drek dip gi po yai nimai bak yo pima nyahan leu ba, dicig gikan tut bi. Yo cin dima ne Abner di nibou pran mben Israel kin Amasa di nibou pran Yehuda nya hi rin ba, yahacem ingon ngun ba, isingat kei dor njiriek Yoab cem noro noni yai nimai biyok.

³³Yoab kin nide nintun him di bram yam nya mibiang nibuhunti drek dip nibou pran cin dima imaisi bijo ninno bijo kikau. Noro TUHAN minjei mun di kei bak dicig Daud de nintun him yamti di bram yam nya di igya luei nohoti bigwam nok nibou ndig ba, yahagom mibong kei migwam kei.”

³⁴Leu api Benaya ngkwei hanyen ug ei TUHAN De Prak Meng biyai nimai bak Yoab ei mpia dima lene tig ei Yoab de biyati ei nide minu ndig nisai.

³⁵Leu api nibou ndig kon Benaya biya luei Yoab nohoti bigwam nok nibou ndig mem tentara Israel hagom ba, noni kon Zadok biya luei Abyatar nohoti bigwam nok imam cem.

³⁶Jei bi lene nibou ndig hig Simei kwei bipai bak “Angot ig mem nanti ei minu ndig Yerusalem dini ba, abong hak ei ig dima ba, atot mpia.

³⁷Gino abisinggre ba, asigon minyei pmot Kidron lene suar atug ndei nimai drek dip ba, abiang ayai munti nibuhunti drek dip atunggweisi dima.”

³⁸Lene Simei buhup “Na di Anyeng Jei e, acuk dati dima kei ba, miditug hon Na di Anyeng Jei ahyet dima.” Leu api Simei wer bong ninno ei minu ndig Yerusalem.

³⁹Ari bingwam ningai ser tu lene mun nyeng gom pek kep mem noni. Simei de awak cin inang ug ei minu ndig Gat bingat Nibou Ndig Akhis di Maakha nipmot. Tirigi Simei miap tut inangti dima,

⁴⁰lene ba mun di gwam dip bijuk nide keledai ninghim leu api kui bigwam dip buug ngat Nibou Ndig Akhis ei Gat binggok nide awak cin pima. Ngat yok tu lene buwak yok bingkwei hanyen kwei ei minu ndig Yerusalem.

⁴¹Tirigi Salomo miap tut Simei nibon munti dima,

⁴²lene cuk tungwatu ba, yuug buwak Simei kwei leu api pai bak “Dibindei ba, apreu ei tug hon TUHAN ninyeng bipia ma ambut-mbut nyen leu minu ndig Yerusalem bi. Lene disok kep na bipia gino ambut-mbut nyen leu minu ndig Yerusalem lene mporo atug ndei hukum nimai. Sipreu ei mem yam ba, ace tut bipia abit dihyet dima tu.

⁴³Nggon rino nogindipa angon njiriek sipreu ei mem yamti pima ba, apwoi dingon cem bi i?

⁴⁴Ayai munti di kinei bibor di bitut dicig hagom jo nibreisi mem na tu. TUHAN mikes hukum ei nani dip drek dip gima ug ri.

⁴⁵Noro tut dani ne TUHAN minjei mun di kei bak dani ba, Noni mibindei ba, dicig nide ninyeng tak kepti ngkiem kei bijo ninno bijo kikau.”

⁴⁶Nibou ndig pai nok lene cuk Benaya buug yai nimai bak Simei. Hon kep njap dima kui lene Salomo de nisindemti kieng kep ninyeng tak kepti titut yam.