Read Hatam NIBOU NDIG NYA GI NIGOM 20 Bible Online

NIBOU NDIG NYA GI NIGOM 20 - Hatam bible

NIBOU NDIG NYA GI NIGOM 20

¹Mpe dima lene Benhadad di nok nibou ndig mem mben Siria nduk nide tentara nya kin nibou ndig hiter bu ibou ningot ningai ba, can bitut ide kroba pran nya kin ide kuda nya cem kwei ba, igyon ttai minu ndig Samaria bitin ei mem gima ibindei timek minu ndig dima.

²Leu api sok nihyet bak Ahab di nok nibou ndig mem mben Israel di bong ei minu ndig dima bipai,

³“Da di Nibou Ndig Benhadad dibidip huk nani leu binhyepo akes ade mas kin perak nya kin atnem bat-apmot bat di isindem nya bida bihigom.”

⁴Lene Ahab buhup “Jipai bak Nibou Ndig Benhadad di ninyeng jei bipia dice tut nihyet dima. Handei kon ba, ninyeng tak kep dani kin mun nyeng di dinyeng tut nya hagom hak ug.”

⁵Jei bi lene yo dima ikwei hanyen bitri tut Benhadad nibidip hukti hi kin bu bak Ahab. Nibidip hukti dima nibimbiti rinok gini “Nipou yo lene nyende nibou ndig bidip huk na leu binhyepo akes ade mas kin perak nya kin atnem bat-apmot bat nya bak noni bihigom.

⁶Noro tini bu ne noni micuk nide nibou tentara nya kwei ba, inggek ade ig nibou ndig dima kin yo di igya kui na cem ide ig nya bipos jide mun di bon ninyeng ei igyai him nya hagom bimbut tut. Njap di hyep mem mpia nok gini lene yoni mikwei kinyon eisi ug ri.”

⁷Lene Nibou Ndig Ahab jem nibou mben Israel yahagom kwei bitri tut nihyet “Jingat bou jiyai him bipia no dini joi sut ba mun di buhun bisrou nyeni. Lewo bidip huk da leu binhyepo dikes ditnem bat-dimunggwom bat nya bitut ditde mas kin perak nya cem hagom binoni ba, digirok nibidip hukti dima bi.”

⁸Lene nibou nya kin ide limwa nya ibuhup “Na di Anyeng jei e, ma amiap kep noni nihyet ba, acut bak ba, abit ningon kanti dima au.”

⁹Gima rino Ahab buhup yo di Benhadad cuk yok kwei dima bipai “Ma jipai bak jide nibou ndig di ninyeng jei dima bipia dice tut nibidip huk dati di nipou he noro nibidip huk dati nican dini ne dice tut bi.” Lene yo dima ikiju bingkwei hanyen ba, jei bi lene ikwei hanyen bipai bak Ahab,

¹⁰“Nyende nibou ndig mipinak nide tentara nya imangti nok gi dem mem gima ibindei sar ade minu ndig dini kwei. Imangti dima nok gi dem mem iba inda he bikon minu ndig nindung-diemti hagom ba, intek tut hak. Nibou Ndig heng bitug hon kwar nya inyeng bipia suar kwar dima yok ikes hukum ei noni dip bigyai nimai bak cem hak gino noni yai mun dima bipek kep nehengti dima bi.”

¹¹Nibou Ndig Ahab buhup “Ma jipai bak Nibou Ndig Benhadad ‘Nipou tirigi ikon pran bigyo ne tentara ningat-ngat nya illei-lau bi noro illei-lau ei niabiati tirigi ikon pran bibindei timek siceu nya leu tu.’ ”

¹²Lene yo dima ingkwei bipai sut Ahab nibuhupti bak Benhadad tirigi noni sindi dut-dut nyen mun di pu noni bit nibou ndig nindigsi nya di ibicom yam bit noni ei ide prak meng yati. Miap tut nibuhupti dima lene Benhadad cuk nide nibou tentara nya ba, itin ei mem gima icoi Samaria bigyati. Gima rino itin ei bit leu nicuk yoti.

¹³Tirigi siceu itin ei mem ihwen Samaria lene nabi gom ug ngat Nibou Ndig Ahab bipai bak “TUHAN pai ‘Angat tentara di imang bibor dima e? Njap di ammani midibindei ba, abindei timek yoni yahagom. Mijo nibreisi mem na bipia Dani ne TUHAN ri.’ ”

¹⁴Lene Ahab hig ser noni “Tou rima bie tut yok mem gima ihwen yok nipou ngig-ngat i?” Lene Nabi dima buhup “TUHAN pai bipia tentara pilei nya di injei bit nibou hanjop nya ibie ba, ikinyon ei nikon pranti.” Lene Nibou Ndig hig ser bu “Tou ngat rima nok nibou pran di minjei sut yok mem gima ihwen siceu nya i?” Lene nabi dima buhup “Na di Anyeng Jei nanti rima anjei sut yok a.”

¹⁵Leu api nibou ndig nduk nimpung tentara pilei nya di injei bit nibou hanjop nya ba, idem yam. Yahagom sok yam dem ibou sratus can ningot ningai ba, can. Lene noni nduk tentara Israel cem ba, idem yam lene imangti ibou sribu muhwindacan.

¹⁶Ikinyon ei nihwen siceu nyati mem mpia huk pijum tirigi Benhadad ya tut nibou ndig ibou ningot ningai ba, can di ibicom yam bit noni ingat rin ei ide prak meng yati bidut-dut nyen mun di pu yok.

¹⁷Yo di injei bibie rino nimpung tentara di pilei nya. Noro tentara di Benhadad cuk yok di igyok itta kep siceu nya ikwei pai bak Benhadad bipia nimpung tentara gom di injei kwei ndam nye leu Samaria kwei idideu kwei su.

¹⁸Lene Benhadad cuk nide limwa nya leu binhyepo ikat siceu ide tentara dima yok tut igyaisi he. Nok gino ikwei kon pran e, he ikwei bakei yamti he lo, ma ikat yok tut igyaisi.

¹⁹Nimpung tentara pilei nya di Nibou Ndig Ahab nduk yok keyam pima ikiju bimbut leu Samaria bibie leu api tentara Israel nindigsi nya injei bram yok.

²⁰Bikwop tungwagom-gom yai nimai bak siceu di iba yoho rok yam nya. Apino tentara Siria nya inang leu yoho bei leu api tentara Israel yuhuk bram yok. Noro Benhadad kui ei nide kuda dip binang ba, ningwes ngun ug bitut nide tentara di ikui kuda kan ibou poi di injei bit noni.

²¹Nibou Ndig Ahab cem kiju bicoi ug ei mpia di ikon pran bit yam eisi dima leu api nggek kroba pran di siceu ide nya biyai nimai bak kuda di ikri kroba pran dima yok cem. Njap dima ne tentara Siria nya icut nindig bibor.

²²Lene Nabi pima kwei ngat Ahab hanyen bu bipai bak “Ma akinyon ei nitin ei ade tentara nyati ba, isindem bibor lene abikos tut puig di mungkun kei nya cem. Lewo nibou ndig mben Siria mikwei hanyen bihwen je bu mem bed di biang hou ningwigsi ei ari bingwam di nidipti bu yo.”

²³Mpe di gom ne Nibou Ndig Benhadad de nibou tentara nya ipai binoni “Nung nya di mben Israel ikuk yok bak nya inyeng tak kep hanjop nungug him he. Gima rino tentara Israel ibindei timek nyeni a. Ne gino ikon pran bit yok ei briep bou him lene nyeni mibindei timek yok.

²⁴Aba ade nibou tentara nya biluei nibou ndig ibou ningot ningai ba, can pima yahagom yohoti.

²⁵Leu api Na di Anyeng Jei akus ade nimpung tentara nindig bibor nok siceu di nimangti noyam kin tentara nipou po icut pima hanyen bitut kuda nya kin kroba pran nya cem. Tirigi ade tentara ikon pran bit tentara Israel ei briep bou him lene nikan tut bipia yoni micut binyeni.” Lene Nibou Ndig Benhadad ce tut ighyet nghwak him dima bibit nide nibou tentara dima yok ingon kanti.

²⁶Noni nduk nide tentara nya mem bed di biang hou ningwigsi ei ari bingwam di nidipti bu leu api njei sut yok ug ei minu ndig Afek leu binhyepo ya tut yok bihwen mben Israel.

²⁷Mben Israel cem injei siceu binduk ide tentara nya kwei ba, ikrau ide minggwen bidem yok. Leu api tentara Israel dima injei nimpung tentara can ba, yohok ide prak meng yati di birok kik tentara Siria. Gino ibinai tentara Siria di ikieng kep bibong bidem minu dima hagom lene nimpung tentara Israel dem kep nok kambir nimpung can he.

²⁸Mpe dima lene nabi gom kwei ngat Nibou Ndig Ahab bipai bak “TUHAN pai ‘Tentara Siria dima ikan bipia disindem tirigi Dingat rin ei hanjop nungug him lo, tirigi Dingat rin ei briep bou him lene disindem bi. Gima rino midibindei ba, jibindei timek ide tentara di nindig bibor dima yahagom ug ri. Mijo nibreisi mem nani kin ade limwa nya cem bipia Dani ne TUHAN ri.’ ”

²⁹Tentara Siria kin mben Israel ingat rin ei ide prak meng yati kikau mem njap nitindur muhwindacan ba, iba yoho rok yam. Ei njap gi nimuhwindacan lene ikiju ba, ikon pran bit yam. Leu api tentara Israel igyai nimai bak tentara Siria ibou sribu sratus gom.

³⁰Gi hi di ingwes ngun inang bicoi ug ei minu ndig Afek noro ngug tig di bikrop ttai minu ndig dima lus bitak kep yok ba, ibou sribu nyatungwagom muhwindacan imai hak. Noro Benhadad ningwes ngun ei minu ndig lene coi biku no nyahan ei dapur nsi ei ig bei gom.

³¹Nide nibou tentara nya ikwei ngat bipai bak “Tungwatu itri tut bipia nibou ndig mben Israel ingon nggriu. Gino ace tut lene mijuk sinsun kron di bindo tut ninso nyenti tut niyai mun tunggweisi dini lene ikri kuk ei ikimam di bindo tut ibou di cut binoni ba, yuug ngat nibou ndig mben Israel. Mpaba noni miyai nimai biNa di Anyeng Jei bi e?”

³²Lene yoni ijuk sinsun kron leu api iba kuk bikri kep ikimam biyuug ngat Ahab bipai bak “Benhadad ne Na di Anyeng Jei ade awak ri. Noni hara ser Na di Anyeng Jei leu binhyepo ayai nimai bak noni au.” Ahab buhup “Benhadad niyai no jo yo e? No dima tereu nok dikinjoi ri!”

³³Ningat ne nibou tentara di Benhadad de dima yok ibet ingon mem Ahab nibuhupti di nok bindo di kei. Tirigi Ahab hig Benhadad tereu nok nikinjoi lene ibuhup “Igbit, Benhadad ne Na di Anyeng Jei akinjoi ri!” Leu api Ahab cuk yok “Jibuwak noni kwei.” Tirigi Benhadad kwei krau lene Ahab cigit bikui ug ei kroba pranti.

³⁴Leu api Benhadad pai bak “Midingkwei minu ndig ngot di dicig pos leu na di Andigpoi acig biyati nya hagom hanyen bina di Andigpoi. Midisindui sut ba, na di Andigpoi awin nitri-nipek mun nibousi ei Damsyik mem nitri-nibipek mun cig nya noyam kin gi dicig win ei Samaria pima.” Lene Ahab buhup “Midikes nani ba, angwes ngun drek dip mun di na di Andigpoi apreu ei mem dati dima.” Gima leu lene Ahab kwam minggwen bit noni ser leu api kes noni bimbut.

³⁵Mpe dima lene nabi gom leu nimpung nabi nya ikieti ba TUHAN nicuk noti bibidip huk nisut nabi gom leu binhyepo bui noni noro nisut dima kou sut.

³⁶ Leu api nabi dima pai bak “Abit TUHAN nicuk nati dima bi apino haninyai tirigi akes da leu ba, angkwei hanyen lene mindhe singa gom maham nani.” Tirigi nabi pima kes nisut dima leu ba, nisut ngkwei hanyen rino mindhe singa gom ham noni bimai dem igbit nabi pima nipaisi.

³⁷Leu api nabi pima ug ngat nisut nabi hiter bu bicuk noni “Abui da!” Leu api no dima bui buhun bibok-ba ug.

³⁸Gima leu lene nabi pima ba minghas gom binggai kep niimaisi ser leu binhyepo hi ngat igbit noni bi leu api ug biya hak ei puig nghas ser nibou ndig mben Israel di jei bi mbut kak puig binjiriek noni.

³⁹Tirigi nibou ndig mbut binjiriek noni lene nabi ba nihyet ndig bipai bak “Na di Anyeng Jei Di Akei-kau e, mpe di po dikon pran ei briep bou him pima lene disut tentara gom kat siceu gom kwei lene kes bida. Leu api noni cuk da ‘Suar aya ser no dini mungkun kei. Gino noni nang lene nani rima abiang ayai munti dima nibuhunti ba, atug ndei nimai drek dip e, he aba mitiei perak nitig sribu ningai bigo gau nanti e.’

⁴⁰Jei bi ne dibou ngwak sibui sut mun nyeng hiter leu api no dima kiju binang hak leu da biningwes ngun.” Lene nibou ndig buhup “Nanti rino abindei ba, hukum di buhun micut igkep na drek dip apino suar abiang ayai munti dima nibuhunti.”

⁴¹Lene nabi pima kwek minghas di binggai kep niimaisi leu no leu api nibou ndig ngat lo, noni ne tungwagom di nggre kin nimpung nabi nya ri.

⁴²Leu api nabi pai bak nibou ndig “TUHAN pai bipia ‘No dicuk na bipia suar ayai nimai bak pima ne asindui sut ba, ningwes ngun tu. Gima rino suar aya luei nohoti ba, atug ndei nimai drek dip. Ade tentara nya yahagom misar bingwig drek dip gino isindui sut di ide siceu nya inang di ingwes ngun hak ug a.’ ”

⁴³Lene nibou ndig ba ningon kinei kin nigga biborti cem bingkwei hanyen ug ei Samaria.