Read Hatam NIBOU NDIG NYA GI NIGOM 22 Bible Online

NIBOU NDIG NYA GI NIGOM 22 - Hatam bible

NIBOU NDIG NYA GI NIGOM 22

¹Hon kep njap dima kui lene mben Israel kin mben Siria ingon kwes kin yam ba, ikon pran bit yam bi kikau mem ari bingwam can biniken.

²Noro Yosafat di nok nibou ndig mem timiei Yehuda nya kwei cem kep Ahab di nok nibou ndig mem mben Israel mem ari bingwam gi niningai.

³Nipou tirigi Yosafat kwei bigyo lene Ahab hig ser nide nibou di igya kui noni “Jikan tut bipia minu ndig Ramot ei hanjop Gilead ne minu ndig di nye di mben Israel ide ri! Nggon rino igyai ibou tut ba, ipos minu dima hanyen leu nibou ndig mben Siria bigyo i?”

⁴Gima rino Ahab hig ser Yosafat “Gino nye di mben Israel nikon pran bit mben Ramot lene je di timiei Yehuda nya mijiba je kum nyeni e?” Yosafat buhup “Ditin ei su ba, ditde tentara kin tentara nikui kuda nya cem itin ei su.”

⁵Noro ma sihig ser Allah tut ningon kanti mem sa nipou ug e.

⁶Gima rino Ahab hig nabi nya ibou sratus bitai kwei bihig ser yok “Duug ya kep bidihwen minu ndig Ramot e, he bi e?” Lene yahagom ibuhup “Aug hak ug lewo Allah mihwen minu ndig dima mem na di Andigpoi.”

⁷Lene Yosafat hig ser Ahab bu “Nabi hiter di mihig ser Allah mem sa ningat rin bi e?”

⁸Lene Ahab buhup “Mikha di Yimla nipmot nonaha. Noro dingon mpo tut noni lewo noni mbot kep mun di mipek kep ei nidipti bu di kei bibor bibuhup dihyet bi sren noro noni mbot kep mun di mipek kep ei nidipti bu di kinei bibor bibuhup dihyet kikau.” Lene Yosafat buhup “Aye! Apai nok gima au!”

⁹Lene Ahab hig nibou di ya kui noni gom kwei bicuk noni buug buwak Mikha haninyai kwei.

¹⁰Mpe dima lene Ahab kin Yosafat yahacem ijuk ide sinsun nibou ndig bigwam ei ide banggo mbrei dip kui dimbou hui ei Samaria dideu gumihyep gom di tungwatu nya illet gandum ninjep leu nisina bai eisi. Nabi pima yok yahagom ighyet kui yam bitri tut ide nimbot kep tut mun di mipek kep ei nidipti bu pima bijo ninno.

¹¹Nabi Zedekia di nicig ninyeng Kenaana ya srig nindigsi ikieti. Noni sindi ba ngkimom nitu bibon mindhe nibou nggai bou ninda him pai bak Ahab “Andigpoi e, Allah tri tut bipia tirigi ahwen mben Siria lene aba ngkimom nitu di nok mindhe nibou nggai dini bibui yok bibindei ba, icut bak na di Andigpoi.”

¹²Lene nabi nindigsi nya cem yahagom indat kep nihyet dima bu bipai “Andigpoi e, gino ahwen minu ndig Ramot lene Allah mibindei ba, yo dima micut bak na di Andigpoi ri.”

¹³Lene awak di ug buwak Mikha kwei pima sok kep noni bipai “Nabi nindigsi nya yahagom itri tut ide nimbot mun di mipek kep ei nidipti bu di kei bibor bipai bipia nibou ndig de siceu nya ei Ramot micut bak noni. Gima rino ma nani cem ma ambot kep tut mun di mipek kep ei nidipti bu di noyam kin yoni.”

¹⁴Noro Mikha buhup “Diba neheng tug hon Allah di niyaijo ninyeng bipai bipia miditri tut Allah nipingok dati he!”

¹⁵Tirigi Mikha kwei ya ei Nibou Ndig Ahab noho bei lene Ahab hig ser noni “Mikha e, ace tut ba, Nibou Ndig Yosafat nyeni mininjei siceu binihwen minu ndig Ramot e?” Lene Mikha buhup “Dwai. Jinjei bijihwen hak ug! Jo nibreisi bipia Allah mimpu je bibindei ba, jicoi ug ei minu ndig dima bijiyai bijiyati.”

¹⁶Noro Ahab buhup “Gino ambrap bit da tug hon Allah ninyeng lene suar apai sut mun di igbit. Suar dipingok angonti nok gima mbipig bu i?”

¹⁷ Lene Mikha buhup “Dikan huk tentara Israel di igya sinsiou bidem nungug tou nya ba, yahagom inok domba di ibon ide gembala hi bi. Allah pai sut yoni bipia yo dini ibon ide nibou di bie tut yok hi bi. Nna ba yahagom iba ingon di jo nyahan bintek gimahap bingkwei hanyen ug ei ide ig.”

¹⁸Lene Ahab pai bak Yosafat “Mikha nibuhupti dima bit leu nok gi dipai bina pima rin bi e? Noni mbot kep tut mun di mipek kep ei nidipti bu di kei bibor bitut da hi bi sren noro mbot kep tut mun di mipek kep ei nidipti bu di kinei bibor bida bijo kikau!”

¹⁹ Lene Mikha binut bu bipai “Ma angig atingou mem Allah nihyet! Dingat Allah tirigi Noni gwam Nide banggo mbrei dip ei gwamti lene Nide malaikati nya yahagom igya kui Noni.

²⁰Lene Allah hig ser yok ‘Tou riris bak Ahab bibindei ba, noni mitug midut ei Ramot i?’ Lene malaikati nya ibou poi ibuhup nok gini lo, bihi ibuhup nok gima.

²¹Kikau bibou ninnei gom ya bibie mem yok bison kwei ei Allah Noho bei lene pai binoni ‘Midiris bak noni.’

²²Lene Allah hig ser noni ‘Aris bak noni notou i?’ Lene ninnei dima buhup ‘Duug ngat Ahab de nabi nya lene midibindei ba, yahagom iris mun.’ Lene Allah cuk noni ‘Aug ba, aris bak noni hak ug lewo ayai munti dima mingat ningat ug ri.’ ”

²³Lene Mikha pai ningwigsi biyok “Mun dini yok hagom pek kep mem je! Allah bindei ba, ade nabi dini yok yahagom iris mun bak na di Andigpoi. Lewo Noni kos tut mem gima mbigom na di Andigpoi atug midut ug ri!”

²⁴Pai nok lene nabi Zedekia kwei ttem Mikha ningyoi bihig ser noni “TUHAN Ninnei kes da ei bipingok angonti apig su i?”

²⁵Lene Mikha buhup “Jei bi lene mun di bindo tut mijo nibreisi mem na tirigi acoi ug ei nghim nsi gom ba, aku na nyahan eisi.”

²⁶Lene Nibou Ndig Ahab pai bak nide nibou tentara gom “Akat Mikha ug ei Amon di nok nibou mem Samaria kin dipmot Yoas yoho bei.

²⁷Disok dihyet bak yoni leu binhyepo icom noni ug ei ig bui nsi lene ma ikwas njita poi mien he kin minyei poi mien he tut noni bibou dikwei hanyen leu Ramot bidingwes ngun ug e.”

²⁸Lene Mikha pai bak “Gino akwei hanyen ba, angwes ngun lene jo nibreisi bipia TUHAN tri tut nihyet tug hon da bi! Je di jingat rin e, jahagom jintu kep duhui tut ba, jimiap dihyet ei jitingou nsi tu.”

²⁹Lene Ahab di nok Nibou Ndig mem mben Israel kin Yosafat di nok Nibou Ndig mem timiei Yehuda nya yuug hwen minu ndig Ramot ei Gilead.

³⁰Ahab pai bak Yosafat “Tirigi sihwen yok lene midiluei ditta bidijuk sinsun bit leu nok diyai kepti bi. Noro ma ajuk ade sinsun nibou ndig bit leu nok ayai kepti.” Gima rino nibou ndig mben Israel luei nitta tirigi noni sindi kon pran.

³¹Lo bi lene nibou ndig mben Siria pingok ei nide nibou tentara ibou ningot ningai ba, can di ikui ide kroba pran kan nya ingonti leu binhyepo ihwen hiter bi noro ma igyai nimai bak nibou ndig mben Israel nongkom he.

³²Gima rino tirigi ingat Nibou Ndig Yosafat lene ikan bigya noni ne mben Israel ide Nibou Ndig ri. Lene yahagom imbut sindem mem gima ihwen noni. Noro noni hara ser yok.

³³Apino jo nibreisi mem yok bipia noni ne mben Israel ide nibou ndig rin bi. Gima rino inggek ingonti leu ba, ihwen noni bi.

³⁴Noro TUHAN bindei ba, tentara Siria gom pilei tibor hammi nide siceu nya ariwace lo, tibor dima tibim Ahab de sinsun pran ninggreti bindei noni. Lene Ahab hara no di krau nide kroba pran “Tibor gom ndei da tu! Akiek kroba tut sa ba, soom sa leu pran hak ug!”

³⁵Tentara nya ikon pran bit yam sindem bibor lene Ahab bong nyahan ei nide kroba pranti biyok niyai kep tentara Siria nya. Ninggrom silipti nide kroba pran ba, ut eisi kikau ug bipek mmunti leu api niyaijo ngwig hon.

³⁶Son dideu mpia nikimbasti lene tentara Israel icuk yam “Jikwei ba, yahagom ingkwei hanyen ug ei ide minu ndig kin ide hanjop cem.”

³⁷Ipai nok lewo Nibou Ndig Ahab mai su. Lene ikon Ahab ningut bingkwei hanyen tut ug ei Samaria ba, itig.

³⁸Lene nide awak nya ijem nide kroba pran biyuug sut ug ei minyei ugyou gom di ninyeng Samaria leu binhyepo iba minyei bipiap bipwoi hanyen lo, sop sundal nya no ikek ugyou dimati yo lene nsien nya cem ipiei Ahab ninggrom ei mpia dima cem bit leu nok TUHAN nipaisi.

³⁹Lene mun di ipui sut Ahab kin nide midyai nya hagom jo ei srat Nibohon Nibou Ndig Mben Israel Nyati bitut mun di ipas tut nide ig nibou ndig di noni ba gaja nikwai di jei bibor ningkek bimau kin minu ndig di noni win nya hagom.

⁴⁰Tirigi niabiati Ahab mai leu su lene nipmot Ahazia luei nohoti nok nibou ndig nijep bu.

⁴¹Tirigi Ahab di nok nibou ndig mem mben Israel ninyeng tak kep mem nijam ari bingwam bitai su lene Yosafat di Asa nipmot kui bigwam nok nibou ndig ei minu Yehuda biluei nicig nohoti.

⁴²Mpe dima lene nide njap ug ei ari bingwam ningot ningai ba, muhwi tu. Noni bong ei minu ndig Yerusalem ba, ninyeng tak kep timiei Yehuda nya kikau mem nijam ari bingwam nyatungwagom ba, muhwi. Nipmem ne Azuba di Silhi nipmisop ri.

⁴³Yosafat bon mun di igbit ei TUHAN niyai him noyam kin nicig Asa. Noni cok tut pinai kin sop sundal niken di nicig Asa cok tut bigyo nya di igyai midyai ei mpia di tungwatu nya ikuk yok bak kwar nya eisi yahagom leu nide hanjop nsi. Noro tut mpia di ikuk yo bak kwar nya eisi ne nggek gima bi. Limwa nya no sisip ibui mindhe-ndhe nya ei nimbar hum dokti bindig biei nggrai di ui-gwang kei lene ibikuk yok bak kwar nya ei mpia dima yo. Yosafat bon kibar Tarsis nya mem gima ug bittei mas leu Ofir kwei. Noro kibar dima yok gimbut bi sren drek dip mun di bindei ba, hagom kinei ei Ezion-Geber. Ahazia di nok nibou ndig mem mben Israel kin Yosafat imbot kep tut timiei kibar mben Israel nya leu binhyepo ikrau kibar bit Yosafat de limwa nya bimbut-mbut nyen. Mbro nok gino ingon kinei sut yam bi lo, Yosafat ce tut bi. Niabiati bu lene Yosafat mai ba, itig ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Yoram ya luei nohoti bigwam nok nibou ndig bu. Nipui mun nindigsi nya tu(...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²Tirigi Yosafat di nibou ndig timiei Yehuda nya ninyeng tak kep mem nijam ari bingwam simnaimuhwidip brimigtehican lene Ahazia di Ahab nipmot ya luei nicig nohoti bigwam nok nibou ndig mben Israel bu. Leu api ninyeng tak kep mben Israel mem nijam ari bingwam can ei Samaria.

⁵³Noni bon sisar tut TUHAN lewo yai bram nicig kin nipmem kin Nibou Ndig Yerobeam igyai kepti nya hagom di bindei ba, mben Israel icut ei sisarti.

⁵⁴Noni kuk no bak Baal binok awak mem kwar dima cem. Suar mben Israel ikuk yok bak TUHAN Allah noro Ahazia noyam kin nicig di ninyeng tak kep mben Israel nipou pima. Yahacem ibindei ba, TUHAN gga bibor.