Read Hatam NIBOU NDIG NYA GI NIGOM 7 Bible Online

NIBOU NDIG NYA GI NIGOM 7 - Hatam bible

NIBOU NDIG NYA GI NIGOM 7

¹Salomo ngot ig nibou ndig mem nonti cem. Nijam ningot nide ig nibou ndig dima yem ari bingwam simnaibrimigningai.

²Salomo tap ninsi Ninsi Baham Libanon[4] ei nide ig nibou ndig dima ba, nijeisi meter ningot bitai ba, bitai lene ninyanti meter ningot can ba, can lene nanaisi meter simnaibrimigningai biniken. Ig ndig dima bon cou dihim nipuig ningai jop yam ba, bikwop nipuig dima bon cou dihim ningat simnaimuhwidip. Iba biei buom Libanon bibon cou dihim dima yok hagom. Lene iba biei buom Libanon bibon bot di iprion ei cou dihim dima yok dip. Iba buom Libanon bibon biei igtab bei cem ba, ibitap bot pima hagom.

⁴Lene itu kendera mihyeti nya ei ig dima nitta bei nijjai lene bei nibiho cem ba, nipuig ningai jo ig dima nitta nite hi bibirok kik nipuig ningai di jo nite hi bu. Itu dimbou hui kin kendera mihyeti ninggilai di bon nuhuisi bitaisi ba, hagom sur yam kei.

⁶Salomo ngot Ninsi Cou Dihim cem ba, ninsi dima nijeisi meter nyatungwagom ba, can lene ninyanti meter simnaibrimigningai biniken. Lene ibinut jut gom di bon nidihim kin lin mbrei cem ei bei nisai ma kwei.

⁷Ninsi hi kin bu rino Ninsi Mem Nibou Ndig De Banggo Mbrei joti ba, indat ninsi dima ninyeng hi Ninsi Di Nikei Mbus Munhyet Eisi. Tukan nya iba buom Libanon bikibi kep ig dini ei ig jou bikui kikau ug bipek ig tap cem. Salomo mbus munhyet hagom ei ninsi diniti.

⁸ Tut Salomo nibongti ne tukan nya ingot noyam kin ninsi nindigsi nya cem ei mpia di jo bas hak di ngug tig bikrop ttai hiter bu bei Ninsi Di Nikei Mbus Munhyet Eisi ninghim. Lene ingot ninsi hi kin bu di noyam kin Salomo de ninsi mem nitnem di nibou ndig mben Mesir nipmisop.

⁹Tukan nya iba tig mma di sra kei nya di iprion ei nikiou kikau kui ug bipek kin ig tap bingot ig dima yok hagom bitut mpia di jo bas hak di ngug tig bikrop ttai di nindig bibor cem. Itin ei tig dima yok hagom ei mpia di iki tig ei dihyei nyemti lene iba sigigi bikos bibit leu nijeisi kin ninyanti bei nisai lene bei ninsi cem ba, hagom tot yam nok gi kei.

¹⁰Lene tukan nya iba tig ndig ngat di nibok kak bidingug mem ig dima yok hagom nitriti. Tig dima yok bihi nijeisi meter ningai biniken lene bihi nijeisi meter bitai.

¹¹Lene iprion tig di nibok kak hiter bijo-jo yam dip ei nidip bu ba, ikos tig dima dem igbit tig nitriti ninyanti leu api iba buom Libanon bibon bot hi kin bu biprion eisi.

¹²Tukan nya iprion tig nipuig ningai bijo nijou lene iprion buom Libanon nipuig gom bijo dip lene iprion tig nipuig ningai bijo dip lene iprion buom Libanon nipuig gom bijo dip lene nok gima kikau mem dring ei mpia di jo bas hak di ngug tig bikrop ttai bei nibou ndig de ig dima kin dring ei mpia di jo bas hak di ngug tig bikrop ttai bei ninsi ei TUHAN De Ig lene bei ninsi ndig di jo hammi dimbou hui mem TUHAN De Ig cem.

¹³Mpe dima lene Huram bong ei minu ndig Tirus. Huram ningon ki bibor tut midyai niba ngkimom-tembaga bibon mun nyeng hagom bigwam kep tu. Nicig ne timiei Tirus di ningon ki bibor tut midyai niba ngkimom-tembaga bibon mun nyeng hagom rin lo, mai leu su. Nipmem ntun keret Naftali him. Gima rino Nibou Ndig Salomo cuk tungwatu ba, yuug buwak Huram kwei bikon noni nok nibou mem midyai niba ngkimom-tembaga bibon mun nyeng hagom. Apino Huram ce tut ba, kwei bon kep mun di Salomo hara mem dima.

¹⁵Lene Huram ba ngkimom-tembaga bibon cou dihim can di nijeisi meter muhwindaningai lene bikrop eisi bidem meter muhwi biniken ba, ngkimom-tembaga dima nindokti senti muhwindacan biniken. Cou dihim ngkimom-tembaga dima hacem bon ninyem bei ninsi. Lene noni ta cou dihim dini hacem ei bei dimbou hui ei TUHAN De Ig.

¹⁶Huram ba ngkimom-tembaga bibon mun di yahak ei cou dihim hacem dima niyenti hu kwei nya ba, nijeisi meter can biniken.

¹⁷Mun di yahak eisi dima dem kep mitou bakung di nijeisi meter gom biniken. Lene noni ba ngkimom-tembaga bibon biei delima ningat nipuig can jop yam binghau cou dihim dima hacem niyenti. Delima ningat di jop yam ei bikwop cou dihim niyenti dima nimangti hagom sok yam ningat sratus can. Leu api Huram ha kuk ngkimom-tembaga lene kes ei cou dihim dima yok niyenti nya. Kuk ngkimom-tembaga naha dima ninghau muhwindacan jo bikwop cou dihim dima hacem niyenti nya. Cou dihim hacem niyenti bon ninghausi,

²¹lene noni hak mun di dem kep mitou bakung pima ei cou dihim niyenti dima ninghausi dip. Lene Huram tas cou dihim dima yok ei dimbou coisi di ibicoi ug ei TUHAN De Ig nuhui dip ug ba, tas gom ei nite bei mpia nibiho lene tas gom bu ei nite bei mpia nijjai. Lene ijem cou di jo bei mpia nibiho ninyeng ‘Yakhin’[5] ba, ijem cou bei mpia nijai ninyeng ‘Boas.’[6] Nok gima lene Huram tin ei cou dihim dima hacem biput.

²³Leu api Huram ba ngkimom-tembaga bibon bokor nijut gom ba, nijutti meter can biniken lene ninyanti meter bitai biniken lene ninghausi meter simnaibrimigningai biniken.

²⁴Lene noni ba ngkimom-tembaga bibon aigmui ngat nipuig can di bijop yam lene bimau bokor dima nitta bei nisai. Noni bindei ba, aigmui ngat dima rap bokor nitta bingkiem-kiau tirigi noni ba ngkimom-tembaga di dem kep jep oi bibon bokor dima titut yam.

²⁵Lene noni kes bokor dima bijo sapi ngkimom-tembaga ningut simnaibrimigcan inghim dip ba, ningut ningai ibirok kik mpia nijjai lene ningut ningai ibirok kik mpia nibiho lene ningut ningai ibirok kik mpia nicutti lene ningut ningai ibirok kik mpia nipriti.

²⁶Bokor dima nindokti senti muhwindacan biniken ba, nuhui dip dem kep mok ninghas di kieng bei nisai noyam kin mitou bakung di nugyem kieng. Bokor dima dem mem yuhug minyei liter sribu ningot bitai eisi.

²⁷Huram ba ngkimom-tembaga bibon kroba ningat simnai. Kroba dima yok nijeisi meter gom biniken lene ninyanti meter gom biniken lene nanaisi meter gom biniken.

²⁸Kroba dima hagom bon nitta di Huram ba ngkimom-tembaga nisra bitaisi bibon ba, bikibi kin yam ei ninghas him nya.

²⁹Huram kilis singa kin sapi kin kerub ningwes ei nisra bitaisi dima ba, pindur mitou nimbeu di kilis nya ei nuhui dip di jo nai singa kin sapi ningwes pima nidip lene ei nuhui dip di jo nibehei cem bidem ninghas him nya.

³⁰Huram ba ngkimom-tembaga bibon bikwop kroba dima hagom nimig bitai bitut mun di ban sibui dip nya di bikon kroba nimig kin ningat. Lene noni ba ngkimom-tembaga bibon dihim bitai di bikat bokor bidem kroba nuhuisi bitai nya leu api kilis mitou nimbeu di bimau bei nisai cem.

³¹Lene noni ba ngkimom-tembaga bibon nibikibi yamti ninghausi gom di bikat bokor pima bikrau dihim bitai pima niyenti hu kwei cem. Noni kes nibikibi yamti ninghausi gom bikibi kep dihim di bikat bokor niyenti nya ba, dihim dima nijeisi ei kroba nidip senti ningot bitai biniken lene ninggreti ndam ninjek dip nibehei senti ningot can biniken. Lene noni kilis mun ngwes ei nibikibi yamti ninghausi di kibi kep dima nuhui dip cem.

³²Kroba nimig dima yok nijeisi senti ningot muhwindagom ba, muhwindagom krau kroba nitta nibehei a. As di bicom nimig bikon kroba ningat binut yam binok gom hak.

³³Nimig dima yok noyam kin kroba pran nimig cem. Huram ba ngkimom-tembaga bibon nimig ninghausi kin ninggai nya kin nidihim kin ninggai nibousi nya hagom.

³⁴Lene ba nidihim bitai bintun kroba nuhuisi bitai dima leu bei nibehei ba, hagom krau kroba ningat bingkiem binok gom.

³⁵Nitta gom kin bu di ninyanti senti ningot can ba, can jo ttai kroba dima ninghas bei nidip. Nidihim nya di bikat kroba nitta dini kin yam binut yam binok gom kin kroba ningat a.

³⁶Lene noni ba kerub kin singa kin biei dui nya ningwes bimau nidihim di bikat nya kin nitta dima di bon ningwakti di dem mem nya hagom leu api kilis mitou nimbeu di bimau bei ninghas him cem.

³⁷Huram bibon kroba dima yok hagom tug hon nisinati dima ba, hagom noyam kei. Nindigsi bitut nijeisi kin ninyanti kin nanaisi hagom noyam kei.

³⁸ Lene Huram bibon bokor ndig ningat simnai mem bikwop kroba dima yok gom-gom bidem hagom. Bikwop bokor dima ne ninyanti meter gom biniken ba, dem mem yuhug minyei liter sratus muhwindaningai eisi.

³⁹Huram kes kroba dima ningat muhwi ei TUHAN De Ig nite bei mpia nibiho lene kes ningat muhwi bu ei nite bei mpia nijjai. Lene kes bokor nijut bibor di ba ngkimom-tembaga bibon pima ei TUHAN De Ig dima nuhuisi nite bei mpia nipriti kin mpia nibiho ikieti.

⁴⁰Huram bibon yeng ngkuong nya kin sikop nya kin mok nya cem ba, bibon gima yok hagom leu lene nide midyai di yai mem Nibou Ndig Salomo ei TUHAN De Ig put. Mun nyeng di bibon mem TUHAN De Ig nimangti ne, Cou dihim di ninding krop can. Mun di nok mok ndig di yahak ei cou dihim can pima dip can. Kuk ngkimom-tembaga di yaha binghau ei cou hacem nibou pima yok dip. Biei delima ningat sratus bitai di iba ngkimom-tembaga bibon ba, inghau nipuig can jop yam ttai kuk di yaha binghau cou dihim pima nidip. Kroba ningat simnai. Bokor di nindig ningat simnai. Bokor di nindig krop gom di iba ngkimom-tembaga bibon. Sapi ningut simnaibrimigcan di iba ngkimom-tembaga bibon mem gima ikes bokor di jut pima bijo ei sapi dima inghim dip. Yeng ngkuong nya kin sikop nya kin mok nya cem. Huram ba ngkimom-tembaga di idip ba, sieng-siau kei bibon mun dima yok hagom bit leu Nibou Ndig Salomo nicuk noti mem TUHAN De Ig.

⁴⁶Nibou ndig cuk Huram bipia bibon nimbumbati dima yok hagom ei pabrik di iba ngkimom-tembaga di dem kep jep oi bibon nya eisi di jo Sukot kin Sartan ikieti ei Mbang Briep Yordan.

⁴⁷Nimbumbati dima yok mang bibor apino Salomo bindei ba, ibakilo hagom nibuhunti bi. Gima rino hi kan tut hagom sok yam nibuhunti bi.

⁴⁸ Nibou Ndig Salomo cuk tukan nya ba, iba mas bibon nimbumbati nindigsi nya mem TUHAN De Ig cem. Mun nyeng di iba mas bibon dima yok nimangti rinok gini juug, Nimbar hum dok. Meja di mem roti nibikuk yok bak Allah. Mini njeng di bon nidihim simnai di itas ei Ninsi Di Kwes-Kwau bei nibiho ba, nidihim muhwi jo nite bei mpia nibiho lene nidihim muhwi jo nite bei mpia nijjai. Mitou nya. Mini njeng nika nya. Mun di bindei mu mini nika ninjeng nya. Mok mien di nikrausi joti nya. Bokor mien nya. Srier ngot di mem biei nggrai di ui-gwang kei nya. Srier ngot di mem hum mbom joti nya. Nisibuisi di krau dimbou kin nidihim kin yam ei Ninsi Di Kwes-Kwau kin dimbou heisi mem TUHAN De Ig nisai ma kwei cem.

⁵¹ Tirigi Nibou Ndig Salomo bindei ba, ingot TUHAN De Ig biput tu lene noni bindei ba, inju mun po nicig Daud dimig ei mem TUHAN po noni bindei ba, tukan iba perak kin mas bibon pima bitut ndigban nindigsi nya pima ei gudan gom di itap ei TUHAN De Ig dimati.