Read Hatam NIBOU NDIG NYA GI NICAN 1 Bible Online

NIBOU NDIG NYA GI NICAN 1 - Hatam bible

NIBOU NDIG NYA GI NICAN 1

¹Tirigi Ahab di nok nibou ndig mem mben Israel mai leu su lene mben Moab ikiek imig jou tut mben Israel bikon pran bit yok.

²Mpe di gom ne Ahazia di nok Nibou Ndig mem mben Israel cut nai bibor leu ninsi bas di binut ig ngat ninggre gi anai ei nide ig nibou ndig ei Samaria ba, nibokti buhun. Apino cuk tungwatu ba, yuug hig ser mben Filistin ei minu ndig Ekron ide kwar Baal-Zebub leu binhyepo ndo igbit tut nibokti di buhun dima pia mikei hanyen yo e, he mikei bi e?

³Noro TUHAN de malaikati cuk Nabi Elia di bong Tisbe bipia suar noni ug um yo di Nibou Ndig Ahazia cuk yok pima bihig ser yok, “Allah hi ningat rin ei minu Israel bi apino bitig dino juug hig ser kwar Baal-Zebub ei minu ndig Ekron leu binhyepo ndo igbit tut nibou ndig nibokti di buhun pima e?

⁴Ma jipai bak nibou ndig bipia TUHAN pai nok gini ‘Mporo ma akei hanyen bi noro amai ug ri.’ ” Tirigi Elia yai igbit TUHAN nicuk noti dima leu su,

⁵lene yo dima ingkwei hanyen bingat nibou ndig leu api noni hig ser yok “Nggon rino jingkwei hanyen kwei i?”

⁶Lene ibuhup “Pinai gom kwei um nye lene cuk nye biningkwei hanyen lene suar nipai biNa Di Anyeng Jei bipia TUHAN simbot dat tut Na Di Anyeng Jei bipia Allah hi ningat rin ei minu Israel bi apino bitig dino acuk nye di nuug hig ser kwar Baal-Zebub ei minu ndig Ekron leu binhyepo ndo igbit tut abokti di buhun dima e? Lewo akei hanyen bi noro amai ug ri.”

⁷Nibou ndig hig ser yok “No dima niimaisi notou i?”

⁸ Lene ibuhup “Noni juk mindhe ngkek nok sinsun ndok di jei lene ba mindhe ngkek bikri kep nintig bou a.” Nibou ndig pai biyok “Ayo! No dima ne Nabi Elia ri.”

⁹Lene noni cuk nibou tentara gom bitut nide tentara ibou ningot muhwi leu binhyepo yuug kat Elia kwei. Nibou tentara dima ug ba, tau kep Elia di gwam ei mbigdip gom lene pai bak “Na di Allah de awak e, nibou ndig cuk nani bipia ajuk kwei!”

¹⁰ Lene Elia buhup “Gino dani ne Allah de awak ningat-ngat rin lene nnaba, hum di cig-cai cut kwei leu mpia-bbed him biyem nani kin tentara nya di ibit na jahagom ba, jisar bijingwig ug. Hammi tirigi Elia pai nok rino hum cut biyem nibou tentara dima kin tentara ibou ningot muhwi di ibit pima yahagom ba, isar bingwig hak.”

¹¹Leu api nibou ndig cuk nibou tentara hi kin bu leu binhyepo ya tut nide tentara ibou ningot muhwi biyuug bu. Yo dima yuug ba, ipai bak Elia “Na di Allah de awak e, nibou ndig cuk na bipia ajuk haninyai kwei!”

¹²Lene Elia buhup “Gino dani ne Allah de awak ningat-ngat rin lene handei kon ba, hum di cig-cai cut kwei leu mpia-bbed him biyem nani kin tentara nya di ibit na jahagom ba, jisar bijingwig hak.” Hammi tirigi Elia pai nok rino hum cut biyem nibou tentara dima kin tentara ibou ningot muhwi di ibit pima yahagom ba, isar bingwig hak.

¹³Leu api nibou ndig cuk nibou tentara gom kin bu leu binhyepo ya tut nide tentara ibou ningot muhwi biyuug bu. Nibou tentara dima kui ba, ug krau mbigdip pima lene ba nibiau bicom mpia ei Elia noho bei bahara mem “Na di Allah de awak e, ma akos ser nyende mun di kinei o! Angondut da kin ditde tentara di ibit da dini nahagom o! Ma ayai nimai binyeni au!

¹⁴Hum di cut leu mpia-bbed him yem nibou tentara ibou can bisar tut ide tentara nya tu. Noro dahara mem nani leu binhyepo angondut da o!”

¹⁵Pai nok rino TUHAN de malaikati pai bak Elia “Abit noni ba, jijuk leu mbigdip dini lene ma attin tut au.” Gima rino Elia kiju bijuk leu mbigdip dima bit nibou tentara dima biyuug ngat nibou ndig mben Israel,

¹⁶bipai bak “TUHAN pai ‘Acuk tungwatu nya biyuug hig ser kwar Baal-Zebub ei minu ndig Ekron tut abokti di buhun tereu nok akan bipia Allah hi ningat rin ei minu Israel dini mem gima ahig ser tut bi. Gima rino nani ma akei hanyen bu bi noro amai drek dip ug ri.’ ”

¹⁷Lene Ahazia mai bit leu TUHAN nipai tug hon Eliati. Ahazia yai nipmot bat nya hi bi. Gima rino nide adig-ajoi di Yoram kui bigwam nok nibou ndig mem mben Israel biya luei Ahazia nohoti. Gima pek kep mem yok tirigi Nibou Ndig Yosafat di Yehoram nipmot ninyeng tak kep timiei Yehuda nya mem nijam ari bingwam can tu.

¹⁸Nipui mun tut Nibou Ndig Ahazia niyai munti nindigsi nya hagom jo ei srat Nibohon Nibou Ndig Mben Israel Nyati.