Read Hatam NIBOU NDIG NYA GI NICAN 10 Bible Online

NIBOU NDIG NYA GI NICAN 10 - Hatam bible

NIBOU NDIG NYA GI NICAN 10

¹Mpe dima lene Ahab nignyon bat nya ibou ningot muhwindacan ibong ei minu ndig Samaria. Gima rino Yehu pinak srat gom bak ndigpoi nya di inyohou Ahab nignyon bat dima yok cem bak yo di inyeng jei kin nibou di ibie tut limwa nya yahagom ei minu ndig Samaria cem. Srat dima nibimbiti nok gini,

²“Ahab nignyon bat nya ingat rin ei jindati ba, jinyeng tut kroba pran kin kuda kin minggwen kin minu ndig di bon ngug tig di sindem bibor nya. Gima rino tirigi jikwop srat dini tu lene ma jidimig tungwagom di kei dor njiriek Ahab nignyon bat dima yok ba, jikon binok nibou ndig haninyai. Leu api ma jibrim jingkek bijicuon ser niyaisi.”

⁴Noro nibou di inyeng tak kep Samaria nya ittin bibor bipai biyam “Bit bon Nibou Ndig Yoram kin Nibou Ndig Ahazia ihwen Yehu bicut biyok kan bi! Gima rino nyeni cem ba, igya kep bihwen noni kan bi.”

⁵Gima rino nibou mem ig nibou ndig kin yo di inyeng jei nya kin nibou di ibie tut limwa nya kin ndigpoi di inyohou Ahab nignyon bat dima yok ei minu ndig dima isok ighyet hanyen bak Yehu bipai “Nyeni ne na di Andigpoi ade awak hak rin ba, nitin ei mem mun nyeng hagom di Na di Andigpoi acuk nye binibon nya. Noro dem mem gima nikon tungwa hi bigwam nok nibou ndig mem nye bi. Gima rino ma ayai igbit angon kanti di kei mem nye hak ug.”

⁶Leu api Yehu ba srat gom kin bu bicuk yok “Gino jitti kin dani ba, jitin ei mem gima jiyai igbit dicuk jeti nya lene ma jiyai nimai bak Ahab nignyon bat dima yok yahagom. Leu api ma jirop yahagom itibou kwei bida mem njap di hyep mpia di nok gini.” Ahab nignyon bat nya ibou ningot muhwindacan dima ibong bit nibou nya di inyeng jei ei minu ndig Samaria nya ba, nibou dima yok inyohou yok.

⁷Tirigi nibou pima yok igyai Yehu de srat bikwop tu lene igyai nimai bak Ahab nignyon bat nya ibou ningot muhwindacan dima yahagom leu api ikes itibou keyam ei bansi nyati bipinak hagom bak Yehu ei Yizreel.

⁸Tirigi hi pai sut itibou nikweisi bak Yehu rino noni cuk tungwatu nya ba, idingug itibou dima keyam ei mpia ttou nsi can hammi dimbou pmem nuhui ei minu ndig dima ba, isindui sut bijo ei sirima kikau ug bipek njap di hyep bu.

⁹Njap tekti lene Yehu hei ug ei dimbou pmem nuhui bipai bak yo di idem yam ei su “Dani rino diyok dingon gom mem gima diyai nimai bak Nibou Ndig Yoram ba, jeni ne jibiang nibuhunti tut mun dima bi. Noro diyai nimai bak yo di itibou jo ei dini bi.

¹⁰Gini bindo bipia mun nyeng hagom di TUHAN pai sut Ahab nignyon bat nya micut igkep yok. TUHAN yai mun bipek kep nipreusi di tug hon Nide awak di Elia tu.”

¹¹ Leu api Yehu yai nimai bak Ahab nide bat nindigsi nya di ibong ei Yizreel yahagom bitut yo di igya kui noni kin nisut bat di ningon kieti nya kin nide imam nya cem. Yehu sindui sut gom biningwes ngun bi sren.

¹²Lene Yehu jo leu Yizreel buug ei Samaria. Noni ug krau mpia gom di ijem ninyeng Gembala Nya Ide Prak Meng Yati ei puig sinon,

¹³lene tau kep Ahazia di nok Nibou Ndig mem timiei Yehuda nya nide bat nya ibou poi bihig ser yok “Je tou i?” Lene ibuhup “Ahazia nide bat nya rinyeni. Nuug ei Yizreel ba, nicem kep nibou ndig de ig bei nsi nya kin Nibou Ndig Ahab nitnem Izebel nidrot bat nya.”

¹⁴Lene Yehu cuk nide tentara nya “Ma jikat yok lo, jiyai nimai biyok au e!” Leu api ikat yahagom bikri yok ug ei dideu jui gom biyai nimai biyok ei sirima. Yo dima yahagom sok yam imangti ibou ningot bitai ba, can. Igisindui sut gom biningwes ngun bi sren.

¹⁵Yehu bimbut kikau ba, ug ei puig sinon lene Yonadab di Rekhab nipmot kwei um noni. Yehu pigo bipai bak “Nyeni ingon jo gom bi e? Ajoi sut gima akon hampiap bou tut da e?” Lene Yonadab ce bipai “Igbit rin dijoi sut.” Yehu pai bak “Gi nok lene akwei ba, sikrau yam nda.” Ikrau yam nda lene Yehu brim Yonadab ninda bikui ei nide kroba pranti bibit.

¹⁶Lene Yehu pai bak “Akwei ba, ayok ayai kep gi dibrim dingkek mem TUHAN bou ayai him.” Leu api yahacem iba kroba pran dima bimbut ug ei Samaria.

¹⁷Tirigi yuug krau Samaria lene Yehu yai nimai bak Ahab nide bat nya yahagom ba, hi di ningwes ngun bi. Mun dima cut igkep Ahab nide bat nya dem igbit mun di TUHAN pai bak Elia nipou su.

¹⁸Yehu hig limwa Samaria nya yahagom kwei ba, idem yam ei gom leu api pai sut biyok “Ahab gibrim ningkek mungkun mem Baal haigtu bi. Noro midibrim dingkek mem Baal dor tunggwei noni ug ri.

¹⁹Gima rino jinduk Baal de nabi nya kin yo di ikuk yok bak Baal nya kin Baal de imam nya cem yahagom bidem yam ei gom. Ma hi gwam cem au. Lewo midibon midut nindig ei Baal de nimbar hum dokti bak noni. Tungwa tou rino kwei bi mitug ndei hukum nimai.” Yehu ba nicuk yokti dima biris yok leu binhyepo biyai nimai bak yo di ikuk yok bak Baal nya yahagom.

²⁰Yehu cuk yok “Suar jindo ngon bou gom pijum ei mem gima ikuk yok bak Baal.” Gima rino yo dima igyai igbit nicuk yokti dima,

²¹leu api noni tri tut ngon bou dima bidem minu Israel nisurti-nipekti. Ngon bou dima dem tu lene yo di ikuk yok bak Baal yahagom ikwei dem yam. Hi di gwam ei bi. Yahagom icoi ug ei ig Baal nibousi bibindei ba, Baal nibousi dima bimpung kei ei dimbou hui kikau ug bipek ig biho.

²²Yehu cuk yo di inyeng tak kep sinsun di limwa nya ijuk mem ibikuk yok bak Baal tirigi icoi ug ei ig Baal nibousi dima leu binhyepo igyai sinsun dima bak yo di ikwei mem gima ikuk yok bak Baal bijuk noyam. Tirigi igyai igbit nicuk yokti dima leu su,

²³lene Yehu kin Yonadab di Rekhab nipmot icoi bram yam ug ei Baal nibousi. Yehu sok kep yok “Jiyok jiyai kep mungkun gino yo di idem yam ei dini ne yo di ikuk yok bak Baal yongkom he rin e? Ma yo di ikuk yok bak TUHAN icoi kwei bisrig jikieti au.”

²⁴Leu api Yehu kin Yonadab icoi ba, ibon midut nindig mindhe ei nimbar hum dokti bak Baal. Yehu kes nibou tentara nya kin ide limwa di igya ser nya ibou ningot muhwindaningai bigya ser ig Baal dima nisai ma kwei tu. Lene bipai biyok “Ma jiyai nimai bak yo di idem yam ei su yahagom. Tentara tou rino sindui sut tungwagom binang ba, ningwes ngun lene no dima mitug ndei nimai drek dip!”

²⁵Yehu bon midut dima ei nimbar hum dokti bak Baal leu lene hei haninyai bicuk nibou tentara nya kin ide limwa di igya ser nya “Jicoi ug ba, jiyai nimai bak yo dima yahagom lene ma jisindui sut tungwagom biningwes ngun au!” Lene icoi sut ide simeda di ikrau ei indati ba, ibiyai nimai bak yo dima yahagom ei ig Baal nibousi dima. Leu api ikri nimbiam ngut dima yok hagom ug ei nisai. Leu api icoi ug ei Baal nibousi di jo ninsi bibor dima ba,

²⁶ibindei hei kwar Baal ug ei nisai bindig kep hum hak.

²⁷Indig kwar ningat bitut ig Baal nibousi cem. Ibindei ba, mpia dima noyam kin gumuhukti kikau kwei bipek ammani kep.

²⁸Yehu ba nisinati dima bicok tut yo di ikuk yok bak Baal bingwig hak leu minu Israel.

²⁹ Gima rino TUHAN pai bak Yehu “Abindei mbut mun nyeng hagom di dicuk na tut mem Ahab de nintun him yamti di bram yam nya yahagom bingwig su. Gima rino dipreu ei mem na bipia agnyon bat kin adigup bat-adigai bat nya leu pung nigom kikau ug bipek pung nibitai mikui bigwam nok nibou ndig ba, inyeng mitak kep mben Israel.” Noro jei bi lene Yehu ba ningon di gom bibit mben Israel ide TUHAN Allah nihyet bi. Ba, yai bram Yerobeam niyaisi di bindei mben Israel ibon sisar tug hon gi ikuk yok bak sapi di iba mas bibon di iwin ei minu ndig Betel kin Dan pima.

³⁰

³¹

³²Mpe dima lene TUHAN bindei kom minu Israel. Hazael di nok nibou ndig mem mben Siria kwei hwen tentara Israel ba, bindei timek yok. Nide tentara nya ikieng kep hanjop dima,

³³leu Minyei Yordan nite bei mpia nipriti kikau bipek kin minu mien Aroer nite bei mpia nibiho di jo dideu Minyei Arnon. Bitut hanjop Gilead kin minu Basan di nok mpia di keret Gad kin Ruben kin Manasye nite bei mpia nipriti ibongti cem ri.

³⁴Nipui mun tut Yehu niyai munti nindigsi nya hagom bitut nibrim ningkekti di bon ninyeng nya hagom jo ei srat Nibohon Nibou Ndig Mben Israel Nyati.

³⁵Yehu kui bigwam nok nibou ndig ba, ninyeng tak kep mben Israel mem nijam ari bingwam nyatungwagom ba, muhwindaningai. Leu api mai ba, itig ei Samaria. Leu api nipmot Yoahas kui bigwam nok nibou ndig biya luei nohoti.