Read Hatam NIBOU NDIG NYA GI NICAN 12 Bible Online

NIBOU NDIG NYA GI NICAN 12 - Hatam bible

NIBOU NDIG NYA GI NICAN 12

¹Yehu ninyeng tak kep mben Israel mem nijam ari bingwam nimuhwindacan lene Yoas kui bigwam nok nibou ndig mem timiei Yehuda nya. Yoas bong ei minu ndig Yerusalem ba, ninyeng tak kepti mbut ei nijam ari bingwam ningot bitai. Nipmem ne sop timiei Bersyeba rin ba, ninyeng rino Zibya.

²Yoas pwoi TUHAN ningon kikau mem nijam di niyaijo ei dihyeisi dini lewo Imam Yoyada ngginau kep noni.

³Noro noni cok tut mpia di tungwatu nya ikuk yok bak ide kwar eisi nya bi. Apino limwa nya ibon kep nibon midut nindig mindhe titut kep humti kin nibon midut nindig kep biei nggrai di ui-gwang kei cem ei mpia dima ba, ibikuk yok bak ide kwar nya.

⁴ Mpe di gom lene Yoas jem imam nya kwei lene cuk yok bigyok mitiei di ibipek mun di ide limwa nya ibikuk yok bak TUHAN ei Nide Ig cem keyam. Mitiei dima yok rino mitiei nibigo gau nibon midut nindig mindhe titut ei nimbar hum dokti bak TUHAN kin mitiei di ittei bikwas pijum tut TUHAN bit leu ingon kanti.

⁵Suar bikwop imam buhup tut mitiei di noni bipek mun leu nide limwa di itug hon noni pijum ba, noni ya hacan mem yok cem. Mporo iba mitiei dima bikinding Tuhan De Ig nikineisi nya hagom.

⁶Noro imam nya ibinyen tut ba, ikinyon ei midyai nikinding Tuhan De Igti bigyo. Gima rino tirigi Yoas ninyeng tak kep limwa nya mem nijam ari bingwam nyatungwagom ba, ningai su lene,

⁷noni hig Imam Yoyada kin imam nindigsi nya kwei bipai biyok “Nggon rino jigikindig Tuhan De Ig nikineisi nya hi bigyo i? Hon kep njap di ammani kui lene disindui sut ba, jiyok mitiei di limwa nya ikwas tut jeni ei bu bi. Noro ma jingges jinda leu mitiei dima hagom leu binhyepo tukan nya ikinyon ei nikinding Tuhan De Ig nikineisi nyati.”

⁸Lene imam nya ice tut nicuk yokti bibrim mitiei leu limwa nya bigyok keyam ei bu bi. Lene igice tut gima yoni rima ibuhup tut midyai nikinding Tuhan De Ig nikineisi cem bi.

⁹Lene Imam Yoyada yai brua gom lene tu nimihye nimien gom ei nibeng hu kwei leu api kon bijo simin nimbar hum dok nitta ei dimbou hui di limwa nya ibicoi ug ei TUHAN De Ig bei inda com. Lene imam nya di igyai midyai ei dimbou coisi nya ikes mitiei di limwa nya ikwas tut Tuhan De Ig dima bibindei coi hagom ei brua dimati.

¹⁰Bikwop mpe dino mitiei di icom ei brua nsi dima mang bibor tu lene nibou ndig de sekertaris gom kin Imam Nibou Nindig ikwei kau brua dima leu ba, igyai mitiei dima hagom bikwop nimangti leu api inggai kep bigyok ei.

¹¹Tirigi ipas kep mitiei nimangti leu su lene ipwoi biyuug sut bikes bak mindor nya di inyeng tak kep midyai nikinding Tuhan De Ig nikineisi nya. Lene mindor nya iba mitiei dima bigo tukan di iprur biei kin yo di ingot ig igkei,

¹²kin yo di iprion tig igkei kin yo di yeheu tig igkei cem yahagom. Mindor di inyeng tak kep midyai dima iba mitiei dima bipek biei kin tig cem ba, inyohou dimig mitiei di hei mem nibikinding Tuhan De Ig nikineisi nya hagom.

¹³Noro iba mitiei dima bigo gau midyai niba perak bibon mok mien di bon nikrausi nya kin bokor mien nya kin pun mbrei nya kin mini njeng nidihim nimbumbati nya kin nimbumbati hiter di iba mas kin perak bibon bi.

¹⁴Iba mitiei dima bigo tukan di igyai midyai nikinding Tuhan De Ig nikineisi nya cem bipek mun nyeng di isuar mem midyai dima cem.

¹⁵ Tukan di inyeng tak kep midyai dima ingon sren kei. Gima rino igibuhup tut mitiei dima nimbutti hanyen bak nibou nya bi.

¹⁶ Noro imam nya icom mitiei di itug ndei leu nibon midut nibikum Allah de ningwam kin nibon midut nibiyai nikos ser sisarti cem ei brua pimati bi. Lewo imam nya yongkom itug ndei mitiei dima mem yonti.

¹⁷Mpe dima lene Hazael di nok nibou ndig mem mben Siria hwen minu ndig Gat leu ba, yai biyati tu. Lene noni kos tut bipia mihwen minu ndig Yerusalem cem.

¹⁸Apino Yoas pinak mitiei nibigo gau minu ndig Yerusalem bak nibou ndig mben Siria dima. Mitiei dima ne mun di Yoas nonti kin nibou ndig Yosafat kin Yoram kin Ahazia yahagom di inyeng tak kep timiei Yehuda nya ikwas tut TUHAN nipou su ri. Bitut mas di jo ei bruati ei Tuhan De Ig kin gi jo ei nibou ndig de bruati cem. Yoas niyai munti dima bindei ba, Hazael ningon cut leu nikos tutti dima ba, gi hwen minu ndig Yerusalem bi.

¹⁹Leu api nibou nya di igya kui Nibou Ndig Yoas igyok ingon gom mem gima igyai nimai binoni. Cin di igyai nimai bak Yoas rino Yozakar di Simeat nipmot kin Yozabad di Somer nipmot. Igyai nimai bak Nibou Ndig Yoas ei ig gom di ingot ei mpia di iji kep ba, sur yam kei ei minu ndig Yerusalem nite bei mpia nipriti dideu puig di juk ug ei Sila. Leu api itig Yoas ei jui nsi di ibet ei mem itig kep nibou ndig nya eisi ei Daud De Minu Ndig. Lene nipmot Amazia kui bigwam nok nibou ndig biya luei nohoti. Nipui mun tut Nibou Ndig Yoas niyai munti nindigsi nya hagom jo ei srat Nibohon Nibou Ndig Mben Yehuda Nyati.