Read Hatam NIBOU NDIG NYA GI NICAN 14 Bible Online

NIBOU NDIG NYA GI NICAN 14 - Hatam bible

NIBOU NDIG NYA GI NICAN 14

¹Tirigi Yoas di Yoahas nipmot ninyeng tak kep mben Israel mem nijam ari bingwam nyatungwagom tu lene Amazia di Yoas nipmot kui bigwam nok nibou ndig mem timiei Yehuda nya.

²Mpe dima lene Amazia de njap ug ei ari bingwam nyatungwagom ba, muhwi. Noni bong ei minu ndig Yerusalem ba, ninyeng tak kep limwa nya mem nijam ari bingwam nyatungwagom ba, muhwindatai. Nipmem ne Yoadan di timiei minu ndig Yerusalem ri.

³Amazia bon mun di bipwoi TUHAN ningon noro noyam kin nidigup-nidigai di Daud bi. Noni yai bram nicig niyaisi lene nggek mpia di nide limwa nya ikuk yok bak kwar eisi nya bi. Apino limwa nya ibon midut nindig mindhe-ndhe kin nibon midut nindig biei nggrai di ui-gwang kei cem ei mpia dima ba, ibikuk yok bak kwar nya.

⁵Tirigi Amazia kui bigwam nok nibou ndig bitug ndei nisindemti tu rino noni kes hukum nimai ei nibou di igya kui nicig po igyai nimai bak pima yahagom dip,

⁶ noro bitut nibou dima yok imunggwom bat nya bi. Lewo noni bit TUHAN nicukti ei Srat Musati dipai “Ma jiyai nimai bak andigpoi nya drek dip mun di mbuk nya di imunggwom bat nya igyai au. Lene ma jiyai nimai bak munggwom nya drek dip mun di mbuk nya di icig bat ipmem bat nya igyai cem au. Suar tungwagom tug ndei hukum nimai drek dip nonti njem nide mun di mbuk di yai nya he.”

⁷Mpe di gom tirigi Amazia kon pran lene noni yai nimai bak mben Edom ide tentara ngat nya ibou sribu simnai ei Mbang Briep Nsim leu api yai minu ndig Sela biyati. Noni jem minu ndig dima ninyeng Yokteel ba, ninyeng dima jo nok kikau kwei bipek ammani kep.

⁸Leu api Amazia ba tungwatu nya bisok nihyet bak Yoas di nok Nibou ndig mem mben Israel bisrep huk noni leu binhyepo ikon pran bit yam.

⁹Noro Nibou Ndig Yoas ba tungwatu pima yok bisok nibuhupti hanyen kwei tug hon nihyet nibiti ninda bipai bak “Mpe di gom ne tigau war ei Nungug Libanon sok nihyet bak buom ninjem gom bipai ‘Na di buom e, ma ayai apmisop gwam nitta pilei bak dipmot biwak nok nitnem.’ Noro jei bi lene mindhe bigbehei nindig ningut gom kak puig dima bico kep tigau war Libanon dima bimui ningwig a.

¹⁰Na di Amazia e, abindei timek mben Edom tu apino angon jei sut ayaisi dima. Gino abindei timek siceu lene gima dem bi e? Handei kon ba, agwam hak ei ig bei! Apriet kin munhyet di mibindei ba, mun di buhun micut igkep nanti kin ade limwa nya hanyen mem mindei i?”

¹¹Noro Amazia gimiap kep Yoas nisok kep noti dima bi. Gima rino Yoas ya tut nide tentara nya binjei ug ei Bet-Semes ei minu Yehuda bikon pran bit Amazia.

¹²Tentara Israel ibindei timek tentara timiei Yehuda leu api yahagom inang bingkwei hanyen ug ei ide ig.

¹³Yoas kat Amazia leu api ug ei minu ndig Yerusalem ba, nggek ngug tig ei minu ndig Yerusalem. Ikinyon ei si binggek leu Dimbou Pmem Efraim kikau ug bipek kin Dimbou Pmem Nuhuisi ba, nijeisi meter sratus can.

¹⁴Leu api noni pian ndigban di iba mas kin perak bibon kin mun nyeng hagom di jo ei Tuhan De Ig dima kin ndigban ngot di jo ei nibou ndig de ig hagom bimbut tut. Lene ikat tungwatu ibou poi kin bikri yok ug ei Samaria hanyen.

¹⁵Nipui mun tut Yoas niyai munti nindigsi nya bitut mimbri di kui ningkek tirigi kon pran bit Amazia di nok nibou ndig mem timiei Yehuda nya hagom jo ei srat Nibohon Nibou Ndig Mben Israel Nyati.

¹⁶Yoas mai lene itig ei jui nsi di ibet ei mem itig kep nibou ndig mben Israel eisi ei Samaria. Lene nipmot Yerobeam Nican kui bigwam nok nibou ndig biya luei nohoti.

¹⁷Tirigi Yoas di nok nibou ndig mem mben Israel mai leu su lene Amazia di nok nibou ndig mem timiei Yehuda nya niyaijo mem nijam ari bingwam simnaimuhwidip bu.

¹⁸Lene ibou poi ei minu ndig Yerusalem igyok ingon gom mem gima igyai nimai bak noni. Gima rino noni nang ug ei minu ndig Lakhis. Noro yo di imbuk tut nya yuhuk bram ba, igyai nimai bak ei minu ndig dima. Lene iba kuda bikon ningut hanyen kwei ei minu ndig Yerusalem leu api itig ei jui nsi di ibet ei mem itig kep nibou ndig Yehuda nya eisi ei Daud De Minu Ndig. Apino timiei Yehuda nya ikon Uzia[5] di Amazia nipmot leu api noni kui bigwam nok ide nibou ndig biya luei nohoti. Mpe dima lene Uzia de njap ug ei ari bingwam simnaimuhwidip brimigtehigom yo. Nipui mun tut nibou Ndig Amazia niyai munti nindigsi nya hagom jo ei srat Nibohon Nibou Ndig Mben Yehuda Nyati.

²²Tirigi Uzia nicig mai leu lene noni hwen minu ndig Elat lene biyai minu ndig dima biyati hanyen lene win hanyen bu.

²³Tirigi Amazia di Yoas nipmot ninyeng tak kep timiei Yehuda nya mem nijam ari bingwam simnaimuhwidip tu lene Yerobeam Nican di Yoas nipmot kui bigwam nok nibou ndig mem mben Israel bibong ei minu ndig Samaria. Ninyeng tak kep mben Israel mem nijam ari bingwam ningot bitai ba, gom.

²⁴Noni bon sisar tut TUHAN lewo yai bram Nibou Ndig Yerobeam Nigom niyai munti di bindei ba, mben Israel icut ei sisarti.

²⁵ Yerobeam Nican rino ug pos minu ndig mben Israel ide di ide siceu nya ibindei timek bigyati nya pima titut yam hagom hanyen kikau ug bipek kin puig di ug ei Hamat nite bei mpia nijjai kikau ug bipek kin Igpong Nsim nite bei mpia nibiho. Ba, niyaisi dima dem igbit mben Israel ide TUHAN Allah nipreu eisi di tug hon Nabi Yunus di Amitai leu Gat-Hefer nipmot pima.

²⁶TUHAN ngat mun di buhun bibor di cut igkep kep mben Israel bou niyai him ba, tungwa hi di mpu yok cem bi sren.

²⁷Gima rino Noni ba Yerobeam Nican bimpu yok lewo tin ei ningon kanti mem gima bindei sar mben Israel bihigom bi.

²⁸Nipui mun tut Nibou Ndig Yerobeam Nican niyai munti nya kin mimbri di kui ningkek kin nikon pranti bipos minu ndig Damsyik kin Hamat leu minu Yehuda leu binhyepo mben Israel igyati hanyen dima hagom jo ei srat Nibohon Nibou Ndig Mben Israel Nyati.

²⁹Tirigi Yerobeam Nican mai lene itig ei jui nsi di ibet ei mem itig kep nibou ndig mben Israel eisi leu api nipmot Zakharia kui bigwam nok nibou ndig mem mben Israel biya luei nohoti.