Read Hatam NIBOU NDIG NYA GI NICAN 17 Bible Online

NIBOU NDIG NYA GI NICAN 17 - Hatam bible

NIBOU NDIG NYA GI NICAN 17

¹Tirigi Nibou Ndig Ahas ninyeng tak kep timiei Yehuda nya mem nijam ari bingwam simnaibrimigcan tu lene Hosea di Ela nipmot kui bigwam nok nibou ndig mem mben Israel. Noni bong ei Samaria ba, ninyeng tak kep mben Israel mem nijam ari bingwam muhwindatai.

²Noni cem bon sisar tut TUHAN noro nide sisar di bon dima nimangti noyam kin nibou ndig mben Israel di inyeng tak kep nipou nya ide sisar di ibon nya bi.

³Salmaneser di nok nibou ndig mem mben Asyur kon pran bit nibou ndig Hosea ba, bindei timek noni. Noni cuk Hosea bigo belasten bak noni bikwop ari bingwam hagom.

⁴Noro mpe di gom bu ne Hosea cuk tungwatu nya biyuug ngat So di nok nibou ndig mem mben Mesir leu binhyepo kwei bahati tut noni. Mpe dima cem Hosea kes ninda tut gima go kep belasten bak minu Asyur. Tirigi Salmaneser kan tut Hosea niyai munti dima lene kat noni ba, bindei coi ug ei ig bui nsi.

⁵Leu api Salmaneser di nok nibou ndig mem mben Asyur[9] hwen mben Israel lene bindei ba, tentara nya igyon ttai minu ndig Samaria. Igyon ttai minu ndig Samaria mem nijam ari bingwam ningai,

⁶tirigi Hosea ninyeng tak kep mben Israel mem nijam ari bingwam muhwindatai tu. Leu api Salmaneser bindei timek minu ndig Samaria leu lene yai biyati leu api bindei ba, tentara nya ikat mben Israel bikri yok ug ei minu Asyur ba, isima. Ikri yok ba, ikes nite hi bisima ei minu ndig Halah lene ikes nite hi bu bisima dideu Minyei Habor ei hanjop Gozan lene ikes nite hi bu bisima ei minu ndig gom-gom ei hanjop Madai apino yahagom inok awak ei ingkaisi.

⁷Minu ndig Samaria cut drek dip gi mben Israel ibon sisar tut ide TUHAN Allah di teu yok bingwes ngun leu nibou ndig mem mben Mesir ninda nsi bibuwak yok ba, yehei leu minu dima. Mben Israel ikuk yok bak nung nya cem ba,

⁸igyai bram mben nya di TUHAN jji yok leu minu Kanaan ei mpe di po mben Israel ihwen yok bibindei timek yok pima igyai kepti nya cem ba, igyai bram nibou ndig mem mben Israel igyai kepti nya di ntun yonti ingon kanti him ba,

⁹igyai kep mun di bindei ba, ide TUHAN Allah ningon kei sut bi nya cem hagom. Lewo iwin mpia di mem ikuk yok bak kwar eisi nya bidem ide minu mien nya kin ide minu ndig nya cem hagom.

¹⁰ Lene itas kwar nisop Asyera bitut nidihim ngot di ya sren ei bikwop mbigdip nya kin biei di nimeng nggrou nibehei nya cem.

¹¹Indig biei nggrai di ui-gwang kei ei nimbar hum ndok hagomti bak ide kwar noyam kin mben nya di TUHAN jji yok leu minu Kanaan tu ibon kepti nya. Mbro nok gino TUHAN ggai ser nikuk yo bak kwar nyati lo, ibisinggre bikuk yok bak. Ibon munti di kinei bibor nya hagom bindei ba, TUHAN gga yok nindig bibor.

¹²

¹³TUHAN pinak Nide awak nya kin Nide nabi nya cem ndam limwa Israel kin timiei Yehuda nya leu binhyepo isok kep yok “Ma jikes hon jibon munti di kinei nya lene ma jibit dicuk jeti nya kin dikos tutti nya di diyai bak jidigup bat-jidigai bat nya ba, diyai bak jeni cem tug hon Ditde awak di nabi nya dima.”

¹⁴Noro limwa Israel kin timiei Yehuda nya itingou ndok ser nihyet. Ingkek ndok noyam kin idigup bat-idigai bat nya di iba ingon com ide TUHAN Allah bi.

¹⁵Mben Israel kin timiei Yehuda nya ikou sut gima ibit TUHAN nicuk yokti nya lene iba ingon di gom biyok ngon kep gi preu po TUHAN bon mem idigup bat-idigai bat nya pima bi. Isem tut TUHAN nipingok kep yokti nya cem leu api ikuk yok bak kwar nya di bon ninyeng bi. Apino yonti cem ibon inyeng ei TUHAN niyai him bi. Mbro nok gino TUHAN ggai ser yok lo, iba ingkek di ndok biyai bram mben di ibong ttai yok igyaisi nya hagom.

¹⁶ Lene igyai mun tunggwei ide TUHAN Allah nicuk yokti nya hagom. Iba ngkimom-tembaga di indig bijet bibon kwar sapi ningut can bikuk yok bak ba, ibon kwar nisop Asyera cem ikuk yok bak ham mpia-bbed him nya ba, ikuk yok bak kwar Baal cem hagom.

¹⁷ Iba imunggwom bat nya di idat bindig kep hum ei nimbar hum dokti bikuk yok bak kwar nya cem. Ita ibou ei niyai nisindemti di bindei ba, ikan tut mimun nya tug hon gi yuug ngat yo di nung kui yok di imbrap bit ninnei di kinei nya leu binhyepo ninnei dima yok indo ingon kanti biyok. Ibrim ingkek mem mun nyeng mang bibor di bindei ba, TUHAN ningon kei sut yok bi.

¹⁸Apino TUHAN gga yok bibor di nyohou yok cem bu bi. Leu api com yok leu dihyei di Noni yai biyok. Gi jo ndia rino nibou ndig timiei Yehuda nya inyeng tak kepti he.

¹⁹Timiei Yehuda nya cem igibit ide TUHAN Allah niggai serti nya bi. Noro igyai bram mben Israel igyai kepti nya.

²⁰Apino TUHAN rok Nide limwa di Israel yahagom bikes hukum di buhun ei yok dip tug hon gima kes yok ei ide siceu di iten-pos nya inda nsi. TUHAN ningon cun di nyohou yok bu bi lo, com yok leu dihyei di yai biyok tu.

²¹Niabiati TUHAN bindei ba, mben Israel kin timiei Yehuda nya ikwas yam lene mben Israel ikon Yerobeam di Nebat nipmot nok ide nibou ndig. Leu api noni bindei ba, mben Israel iba inghim bak TUHAN bibon sisar nindig bibor.

²²Igyai bram Yerobeam niyai kepti nya ba, ibon kep sisar ninyeng hagom di noni bon nya,

²³apino TUHAN ningon cun di nyohou yok bu bi ba, com yok leu dihyei di yai biyok. Ba, gima dem igbit TUHAN nisok kep yokti tug hon Nide awak di nabi nya. Lene ide siceu nya ikat limwa Israel bicom yok ug ei ingkiaisi ei minu Asyur ba, ibong ei sirima kikau kwei bipek ammani kep.

²⁴Tirigi Nibou Ndig mem mben Asyur kat mben Israel ba, inok awak ei minu Asyur tu lene noni cuk timiei Babel kin Kuta kin Awa kin Hamat kin Sefarwaim nya imang bibor ba, kes yok bigya luei mben Israel yohoti ei minu mien hagom ei Samaria.[10] Yo dima igyai minu mien ngot dima bigyati lene ibibong timiei ei niti cem.

²⁵Nimbie him ngat di ibong ei sirima lene ikuk yok bak TUHAN bi. Gima rino TUHAN kes mindhe singa nya kwei kep yok ba, ham tungwatu dima yok nite hi bisar.

²⁶Leu api tungwatu nya yuug pai bak Nibou Ndig mben Asyur bipia yo po noni cuk yok bibong timiei ei minu mien nya ei Samaria pima ikuk yok bak kwar di ninyeng tak kep minu ndig dima ba, ibit niggai ser yokti nya kan bi. Gima rino kwar dima kes mindhe singa nya kwei kep yok dino ham nite hi bisar.

²⁷Gima rino nibou ndig mben Asyur cuk yok leu binhyepo ikes imam gom leu yo di isima ei minu Asyur pima ikieti ba, pinak noni hanyen ug ei Samaria. Noni pai “Jicuk noni bingkwei hanyen bibong ei minu Israel leu binhyepo ngginau yo di ibong ser minu dima tut kwar dima nicuk yokti nya apino mikuk yok bak igbit.”

²⁸Lene imam mben Israel gom ngkwei hanyen ba, bong ei minu ndig Betel. Imam dima ne imam mben Israel gom po ikat ei Samaria bisima ei minu Asyur pima ri. Noni ngkwei hanyen leu api ngginau tungwatu nya ei sirima tut nikuk yo bak TUHAN igbitti.

²⁹Noro yo di ikwei bong ei Samaria dima ibon ide kwar nya mem yonti bijo kikau. Lene ikes bijo ei ig kwar po mben Israel di nipou ibong ei minu mien dima ingot ei ninsi. Bikwop nimpung nya ibon kwar biyonti ei minu mien di ibong ser nya.

³⁰Nimpung mben Babel ibon ide kwar Sukot-Benot. Nimpung Kuta ibon ide kwar Nergal. Nimpung Hamat ibon ide kwar Asima.

³¹Nimpung Awa nya ibon kwar Nibhas kin Tartak. Nimpung Sefarwaim nya ibui imunggwom bat nya bindig kep hum ei nimbar hum dokti ba, ibikuk yok bak kwar Adramelekh kin Anamelekh.

³²Ngkiai dima yok ikuk yok bak kwar nya leu api ibikuk yok bak TUHAN cem. Yoni idimig tungwatu hi gom hi gom leu ikieti ei mem gima igyai midyai nok imam. Nok gima cem ibui mindhe-ndhe bindig bak ide kwar nya gom-gom ei ig di kwar ide nyati.

³³Ba, ikuk yok bak TUHAN noro ikuk yok bak yonti ide kwar di ibon bou inda him bit leu nok igyai kepti nya di jo habiei kwei leu itimiesi di ikwei leusi nya.

³⁴ Niyai kepti di jo ninghig-niker dima yok jo kikau kwei bipek ammani kep. Ikuk yok bak TUHAN Nongkom bi. Igibit TUHAN niggai serti nya di Noni yai bak yo di intun Yakub him nya di Noni jem ninyeng Israel pima cem bi.

³⁵ Tirigi po TUHAN bon gi preu bit limwa Israel pima lene Noni cuk yok “Ma jinggei sut nung nya bijikuk je bak au. Ma jiyai midyai mem yok bijiyai midut nindig mindhe-ndhe ei nung dima ide nimbar hum dokti nya cem au.

³⁶ Ma jikuk je bak Da di TUHAN lewo Dani rino diba Ditde nisindemti di nindig bibor bibuwak je di jehei leu minu Mesir nipou pima tu. Ma jikuk je biDa. Lene ma jibon midut nindig mindhe-ndhe ei nimbar hum dokti ba, jibikuk je bak Dani he.

³⁷Ma jibit Ditde niggai serti nya di dipas ei mem je tu. Ma jikuk je bak nung nya au.

³⁸Ma jibbwe ser mun di Dani kin jeni ipreu kep yam tut nipou su au.

³⁹Ma jibit Da di jide TUHAN Allah dihyet leu api miditeu je leu jide siceu indati.”

⁴⁰Noro yo di ibong ser Samaria nya igimiap Nihyet bi ba, ikrau kep igyai kepti nya di jo habiei kwei su dima bingkiem.

⁴¹Ikuk yok bak TUHAN ba, ikuk yok bak ide kwar nya cem. Lene yo di intun yok him nya cem igyai bram niyai kepti dima kikau kwei bipek ammani kep.