Read Hatam NIBOU NDIG NYA GI NICAN 18 Bible Online

NIBOU NDIG NYA GI NICAN 18 - Hatam bible

NIBOU NDIG NYA GI NICAN 18

¹Tirigi Nibou Ndig Hosea di Ela nipmot ninyeng tak kep mben Israel ba, ug ei nijam ari bingwam gi ningai lene Hizkia di Ahas nipmot kui bigwam nok nibou ndig mem timiei Yehuda nya.

²Mpe dima lene Hizkia de njap ug ei ari bingwam nyatungwagom ba, muhwi. Noni bong ei minu ndig Yerusalem ba, ninyeng tak kep timiei Yehuda nya mem ari bingwam nyatungwagom ba, muhwindatai. Nipmem ninyeng rino Abia di Zakharia nipmisop.

³Hizkia bon mun nyeng di bipwoi TUHAN ningon noyam kin nidigai Nibou Ndig Daud.

⁴ Noni ya kep mpia di tungwatu nya ikuk yok bak kwar eisi nya binggek hagom bitut kwar nidihim nya kin kwar Asyera ngot cem bingwig. Lene noni nggek wou ngkimom-tembaga di Musa bon di ibijem ninyeng Nehustan cem. Lewo mben Israel indig biei nggrai di ui-gwang kei ba, ibikuk yok bak wou dima kikau bipek nijam dima kep.

⁵Nibou ndig mem timiei Yehuda gi nipou nya kin nibou ndig gi niabiati nya hi di noyam kin Hizkia bi. Hizkia ba ningon com mben Israel ide TUHAN Allah ba,

⁶ningon gom tut Noni kikau. Noni srep tut TUHAN bi sren noro bit TUHAN de nicukti nya di Noni kes tug hon Musa hagom nok mungkun kei.

⁷Gima rino TUHAN mpu no kikau apino noni ngat ningat di kei bidem nide midyai di yai nya hagom. Hizkia kiek nimig jou tut nibou ndig mem mben Asyur ba, kou sut gima kon ninyeng cem.

⁸Noni bindei timek mben Filistin nya leu lene coi ug ei ide minu mien nya kikau ug bipek kin minu ndig nya bitut Gaza kin hanjop di jo ttai nya cem lene cat ide ndigban di joti nya hagom bingwig.

⁹Tirigi nibou ndig Hizkia ninyeng tak kep timiei Yehuda nya mem ari bingwam bitai ba, nibou ndig Hosea ninyeng tak kep mben Israel mem ari bingwam muhwindacan lene Salmaneser di nok nibou ndig mem mben Asyur hwen mben Israel ba, nide tentara ikwei yon ttai Samaria.

¹⁰Igyon kep ngug tig dima kikau mem ari bingwam nitindur ningai leu api mben Samaria icut bak. Mun dini cut igkep yok tirigi Hizkia ninyeng tak kep timiei Yehuda nya mem ari bingwam muhwindagom ba, Hosea ninyeng tak kep mben Israel mem ari bingwam muhwindatai.

¹¹Nibou ndig mem mben Asyur kat mben Israel dima ba, isima ug ei minu Asyur. Noni kwas yok ei nimpung ningai ba, nimpung gom isima ei Halah lene nimpung gom isima ei Gozan dideu Minyei Habor lene nimpung gom isima ei timiei Madai ide minu ndig gom-gom.

¹²Mben Israel ibit ide TUHAN Allah nihyet bi bitig dino timiei Samaria icut bak ide siceu nya. Yoni ikou sut mun di Noni preu ei mem yok pima ba, ico tunggwei nicukti di Musa po TUHAN de awak pima yai biyok hagom cem. Yahagom itingou nam ser TUHAN nihyet ba, ibit nicuk yokti nya bi.

¹³Tirigi nibou ndig Hizkia ninyeng tak kep timiei Yehuda nya mem ari bingwam simnaibrimigtai tu lene Sanherib di nok nibou ndig mem mben Asyur hwen minu ndig di bon tentara nibousi di igya coi nya ei minu Yehuda leu api yahagom icut bak noni.

¹⁴Tirigi Sanherib ningat rin ei Lakhis lene Hizkia sok nihyet bak noni bipai “Andigpoi e, diyai mun tunggwei sut na. Gima rino ma akes hon ba, ahwen nye di timiei Yehuda nya bu au. Leu api midikwas ndigban tut na bit leu nok akak tut dati.” Lene Sanherib buhup nihyet bikak tut noni bikrau perak nibuhunti kilo sribu simnai kin mas nibuhunti kilo sribu gom ba, bingot kep noni ser.

¹⁵Gima rino Hizkia mbus perak ei TUHAN De Ig kin nide ig nibou ndig cem hagom bipinak bak Sanherib.

¹⁶Lene noni cug mas di ibinggai kep dimbou meng hacem kin mas di nonti binggai kep nidihim nya ei TUHAN De Ig cem bipinak hagom bak Sanherib.

¹⁷Lene nibou ndig mem mben Asyur cuk nide tentara nya imang bibor ba, ijo leu Lakhis ba, ihwen timiei minu ndig Yerusalem nya. Nide nibou pran di inyeng jei ibou ningai ibie tut tentara dima yok. Ba, yo dini ne Tartan kin Rabsaris kin Rabsaki ri. Tirigi ikwei krau minu ndig Yerusalem lene idis yam ei mpia gom di ijem ninyeng bipia Mpia Yo Di Itot Sinsun Igkei di jo simiak minyei di yehek kwei leu minyei bousi gom di jo nai nindenti dima.

¹⁸Lene isok ighyet mem Hizkia kwei ngat yok lo, Hizkia pinak nitom nya ibou ningai biyuug ngat yok. Yoni ne Elyakim di nibou ig bei Hilkia nipmot kin Sebna di sekertaris gi gom kin Yoah di Asaf nipmot di sekertaris gi can ri.

¹⁹Lene nibou pran Asyur gom pai biyok “Ma jitri tut nibou ndig mem mben Asyur nihyet dini bak Hizkia ‘Nggon rino akan bipia asindem bibor i?

²⁰Jikan bipia nihyet di tibim ei juhui him sindem dor njiriek tentara nya ide nisindemti e? Tou rihati tut je tirigi jaham jimbuk kep nye di tentara Asyur i?

²¹Ningat ne jiba jingon com mben Mesir noro gima dem kep nok no di ba bika bitom no leu api dahat bidat ninda bia bei. Nibou ndig mem mben Mesir dem kep nok bika dima mem yo di iba ingon com noni.’ ”

²²Lene nibou pran pima binut bu bipai “He ma jibuhup dihyet bipia jiba jingon com jide TUHAN Allah e? Tirigi po Hizkia sok kep je di timiei Yehuda nya kin je di timiei minu ndig Yerusalem leu binhyepo jikuk je bak TUHAN ei nimbar hum dok gom ngat ei minu ndig Yerusalem pima lene Hizkia nonti rima bindei ba, tungwatu nya inggek nimbar hum dok nindigsi nya kin mpia hiter di mben Israel ikuk yok bak TUHAN eisi bi e?

²³Jikwei ba, ibingon yam tug hon nibou ndig mem mben Asyur ninyeng. Midiyai kuda ningut sribu can bije gino jidimig jide tentara di ibri kuda igkei nya ibou sribu can ei bou diyai him.

²⁴Gino ibinai yam lene jo nibreisi bipia nibou mien leu minu Asyur di ninyeng cun bon ninyeng jei dor njiriek je di nibou timiei Yehuda nya. We! Jiba jingon com kroba pran kin kuda di mben Mesir ipinak kwei mem jeni e?

²⁵Jikan bipia nikwei kon pran bit je bininggek tut jide minu dini hagom lo, TUHAN hati tut nye bi e? TUHAN Nonti cuk nye kwei leu binhyepo nikon pran bit je ba, nico kep jide minu dini hagom bingwig.”

²⁶Lene Elyakim kin Sebna kin Yoah ipai bak nibou pima “Andigpoi e, ma aba nihyet Aram bimbrap bit nye lewo nimiap nihyet dima. Ma aba nihyet Ibrani au. Lewo nyende limwa di igwam ngug tig dip dima yahagom imiap ahyet.”

²⁷Lene nibou buhup “Jikan bipia nibou ndig mben Asyur sok nihyet kwei bak jeni kin jide nibou ndig jengkom e? E bi! Ditri tut dihyet dini bak jide limwa nya di igwam ngug tig dip dima cem. Jei bi lene suar yo dima yahagom igyem yonti yooi kep inggum bidut yonti imbon kep inggobiausi cem.”

²⁸Lene nibou dima kiju biya leu api ba nihyet Ibrani bitri tut nihyet sindem bibor bipai “Ma jahagom jingig jitingou mem nibou ndig mem mben Asyur nihyet!

²⁹‘Ma jiba jingon com jide nibou ndig Hizkia nihyet au. Lewo bit bon noni teu je bijingwes ngun kan bi.

³⁰Lene ma jingig jitingou mem nihyet tirigi noni hwen jingonti leu binhyepo jiba jingon com TUHAN au. Ma jikan bipia TUHAN miteu je bijingwes ngun ba, njei bitot nye di tentara Asyur tirigi nikon pran bit je au.

³¹Ma jingig jitingou mem Hizkia nihyet au. Da di nibou ndig mem mben Asyur dipingok jingonti leu binhyepo jehei kwei leu jide minu dima ba, jikes jenti ei dindati. Mbigom lene midisindui je ba, jiyem ba anggur ningat kin biei ara ningat ei jide beisi ba, jidut minyei leu jide minyei bousi nya cem.

³²Lene nok gima kikau bibou dibuwak je ug ei ditimieisi di noyam kin jitimieisi dini. Ei sirima lene ba anggur yai ningat mem tungwatu nya ipot bidut ningei lene miai gandum yai ningat mem tungwatu nya ibikang roti. Biei zaitun ningat kin ningei kin ahwei lon ningei cem mpung kei ei minu dima. Gino jibit dihyet lene mijitug ndei nimai bi noro jiyaisi mijo. Ma jingig jitingou mem Hizkia nihyet bu au! Lewo noni ris bije tirigi noni pai TUHAN miteu je bijingwes ngun.

³³Mben ngkiai ide kwar di ikuk yok bak nya hi teu yok bingwes ngun leu dindati tu e?

³⁴Mben Hamat kin Arpad kin Sefarwaim kin Hena kin Iwa ide kwar di ikuk yok bak nya ingat rin ei siritou njap di ammani i? Apo tou rikwei teu mben Samaria bingwes ngun i?

³⁵Apo kwar di ikuk yok bak gi tou riteu nide limwa nya bingwes ngun leu dindati i? Gi nok lene nggon rino jikan bipia TUHAN miteu minu ndig Yerusalem i?’ ”

³⁶Noro limwa nya ibuhup no dima nihyet bi bit leu nok Hizkia nicuk yoti.

³⁷Elyakim kin Sebna kin Yoah irik ide sinsun lewo ingon buhun bibor leu api ingkwei hanyen bitri tut nibou mem mben Asyur nisrep huk yokti hagom bak Hizkia.